So 9 嗡

有一種失落

2009-08-03T12:43:00.007+08:00

最近一兩個月迷上左Golf。

呢個運動睇落好似好老餅，其實只係後生仔冇耐性去打得好。一粒咁細既波，用一枝咁長既桿，打出最多可以係講緊差唔多三個足球場既長度。你就知，其實難度係好高。你踢波、打籃球可以睇完電視，自己模彷再做出相近動作，已經可以足夠你有好表現。但打Golf就冇可能無師自通。

愈黎愈覺得，呢個運動其實就係溝女/仔。你愈溝唔到，你愈去想溝。咁樣可能已經足夠解釋，點解咁多上左年紀既人先至會玩呢個運動，仲係完全既沉迷。

岩岩過去的七月，高球壇四大個人公開賽之一，英國公開賽(British Open)開打，四日既賽事都係衛星直播。每日由下晝五點鐘，一路直播到大慨半夜兩點。我就睇足左最後兩日既比賽。今年爆冷爆得好勁，大家最熟識既Tiger Woods響打完第二日既賽事就要執包袱，係佢打左咁多年比賽既第二次，咁都有幸睇到，其實幾心涼！呵！（我知好多Golfers都係Tiger既球迷，但我唔係。）而今屆除左Tiger打左兩圈就出局呢單大新聞外，另一單一定係59歲既Tom Watson打完三日，以低標準4桿既成績帶頭。

呢位伯伯如果今次奪冠，將會係大滿貫比賽入面，年紀最大奪冠既一位。去到最後一個球洞既時候，Tom Watson仍然低標準3桿，贏緊其他球手最少一桿。最後呢個球洞，係一個Par 4 Course，佢用左3桿On，只要用Putt入簡單既最後一球，就可以完成呢個創舉！偏偏就響呢個時時失誤，Putt左過龍，要用5桿先finish，要同Stewart Cink打附加洞。始終打左四日比賽，Tom Watson都已經付出太多體力。最後就屈居亞軍。

我呢一刻真係有d失落，因為睇波而失落，睇曼聯試得多，因為我愛曼聯；睇籃球都試過，但其他好多運動，例如成日睇既棒球，我都未試過因為輸波而失落。我諗，我真係迷上左Tom Watson；我真係迷上左Golf呢個運動，話晒兩日都已經連續睇左18個鐘，足球都未試過。

再諗深一層，真係應該畀心機搵錢，因為打golf真係好貴。但胡九，你又記唔記得你岩岩失業？

頂！

同場加映，中七響Driving Range亂打既相，竟然搵到：

不過睇返真係好核突，d姿勢除左一個x字都諗唔到更貼切既形容詞。再飛帶，原來讀Year 2時候，都係只能用粗口形容：

到今年六月，打左個零月之後，終於叫見得下人：

其實好想快d學埋木桿（一d難用，但可以開波開得好遠既桿），到時再post畀大家睇睇。

啟事一則

2009-06-21T20:15:00.001+08:00

我已經「成功」達到200磅體重啦！唔好唔信，係堅過石堅既事！哈哈哈哈！

一個電台節目

2009-06-06T16:21:00.004+08:00

一向都算係903既聽眾，不過因為唔想聽漏左野，所以通常唔會揀聽拉闊，通常都只係單撈返黎聽。每日返工就聽返之前一日的「在晴朗的一天出發」，收工就會聽返之前一晚既「嘩！嘩！嘩！打到黎！」，有時都會單撈埋881既「左右大局」又或者「串」。不過早兩日，就抱住一個獵奇既心態，去單撈一個深宵節目，由陳強做既「你睇我唔到」。

呢個節目每晚一個鐘，扣埋新聞、廣告時間，其實大慨都係得返七個字既節目。呢個禮拜，陳強用左兩晚既節目，去訪問一個普通女仔，即係講個名出黎，你都唔知佢係乜水。不過，佢都冇講過自己既名。但係我真係好留心去聽，甚至有無限既幻想。

有必要先講講呢個女仔。佢係一個性上癮病幻者，六歲就有性幻想，但就唔係一般既性幻想，而係畀人強姦既果一種；到十四歲「終於」失身，但佢滿足唔到畀一個男人搞咁少，於是就不停上網搵性伴侶；到十六歲時，正式將興趣變成生意，加入援交既行列；由最初既單對單，到開雜交派對，唔係大家成日響AV睇到既一對二，係2對15；最後仲出價畀人強姦自己，滿足返幼年時候既慾望。但你千祈唔好以為，佢只係一個完全冇得救既社會寄生蟲，其實佢都算係一個高材生，作為文科生既佢，會考21分。星期一至四係讀書天，另外三日就係性愛日。

一住聽，一住幻想，一住回憶。幻想當然係將我代入女主角既位，2對15其實對一個男人黎講，可能真係嚴峻左少少，可能只限於幻想先得。我唔否認我咸濕，但我就係一個細膽既咸濕仔，一對二已經係下世先做到既事。諗下無害，不過諗到會傷害到最愛既人，又真係值得去忍既！

佢十五歲已經唔記得自己做過幾多次、幾多個。我亦即刻想用返我當年同年紀時候做個比較。我當年都已經失身，不過始終女友唔係同居，唔係成日都見。所以響夜瀾人靜既時候，AV碟同一雙手就好重要啦！（當時資訊未有家陣咁發達，上咸網就只有相，要睇動作就始於買碟方便）人地學校黑社會問題嚴重，我地呢間學校呢屆呢，最嚴重既事，可能就係沉迷AV。當年大家已經好少打交，因為我地大部份人，不論同班定唔同班，有好碟響手就係好朋友。當時大家一個月緊去信和、好景或者先達一次。記起當時已經唔係「放低一舊水，拎走四條女（意指四隻碟）」既年代。已經係「一百蚊八隻，愈睇愈大隻」，係四仔末落年代。大家月頭就買返八隻碟，睇一個星期就大家講講內容，有咩正野大家交換一下。只係有時好碟一去冇回頭，再加上BT出現，呢個咁大既咸片網絡先走上末落。

當時碟來碟去，但有一隻我到家陣都未能息懷。我搵左好多次都係搵唔返，當時係趙x新（唔熟所以唔響全朵了）借出黎，借左畀我，我畀完覺得正，當然就畀我好兄弟睇，結果就畀一個叫河x（又名x童）既好兄弟「話」整唔見左。呢件事仲令我地兩兄弟咁耐以來，第一次亦係最後一次，嘈起上黎。隻碟叫「出血大制服」，係藤琦彩花做的。童哥，如果真係仲響你果度既話，我唔會小你，但只求你可以燒多一隻碟畀我。（當然有其他好野，一樣都唔拘，Yeah!）

失敗並不可怕

2009-05-31T18:24:00.003+08:00

今屆決賽，咁我要返大陸做，所以要一支公響宿舍睇電視。其實開波前真係好有信心的，不過當然最後都係輸。最難受，仲要係畀人技術性擊倒。就套返我地平時一班仆街講法：「畀人強姦！」所謂希望愈大，失望都一樣會愈大。想喊，但喊唔出，欲哭無淚原來係咁解。

不過今屆真係寧舍傷感，一方面，除左利物浦，巴塞就係我最憎球隊，畀佢地強姦一定好唔開心。不過其實更加有可能係，真係有寂寞。諗起近幾年有咩唔開心，總有女友響身邊安慰。曼聯輸波到孱仔出局、出席率唔夠要重讀到工作唔順利，原來佢都會即刻安慰我。但今次就係冇。朝早五點完場，眼光光唔著，腦海入面兩個入波不過重複又重複咁播，真係唔著。

到第二日，理智先返返。諗今屆曼聯終於終於打晒所有比賽，響最多打67場可能性下，只係因為足總杯四強出局，打唔到入決賽而少打一場。成季足足66場比賽，曼聯做到了，慈善盾、世界冠軍球會杯、聯賽杯、聯賽拎到冠軍，而歐洲超霸杯、歐洲冠軍球會杯都拎未亞軍，而今季最差的成績，原本已經係足總杯，響256支參賽球隊入面，獲得並列第三。參加七項賽事，拎左四個冠軍、兩個亞軍、一個季軍；仲有一個打破聯賽連續不失球14場紀錄。諗深一層，你又仲想點？

曼聯近十幾年成功，令好多曼聯球迷以為曼聯成功係老奉，奶咀講得，其實我地都試過26年冇拎過聯賽冠軍、31年冇拎過歐聯，今年呢個成績仲係唔滿意都冇辦法。失怕並唔可怕、唔識知足先係好多曼迷大鑊之處。

今年已經好神奇一季，當然我深信下年可以更神奇，只要我費蛇一日都仲響曼聯，我一日都仲應該滿有信心。決賽後有人話曼聯其實仲有好多弱點，咁我又想問有邊隊係完美呢？同埋你又可以否認我唔係頂尖球隊之一？點都好，我覺得好幸福，因為我愛的女人同球隊都畀到呢個感覺我！當然如果工作都畀到呢個感覺我就更好啦！哈哈哈！

Come on kick my ass now.....

2009-05-08T19:46:00.002+08:00

原來成三個月冇打blog了！其實呢段時間真係唔算好忙，同時間都好想分享一d既睇法，不過真係又冇乜動力咁...

不過今日有一件事，我真係要記低佢！不過講件事之前，先off一off topic，講追返以前陣慧琳的一首歌叫Take my hand，當中有一句就係咁既：「Come and take my hand now　現在是多麼想你愛」。當時我應該係讀緊中學，仲係一毒不可耐既毒男，仲好鍾意改歌。而呢一句我仲記得我當時都會好順口的唱：「Come on kick my ass now　現在是多麼想你踢...」

其實我只係唱下，一直都未有企圖或意圖去附諸實行。估唔到，今日有條痴線佬，痴膠左的做左！

今日同女友，去左深水步，搞埋d Non-mean手續，搞完之後，落返樓，諗住去行下街先架啦！正當我等緊過馬路，行人路燈一轉綠燈，準備過對面馬路之際，無啦啦有人踢我屎窟！由於我屎窟其實係籮霸級組別，響肥厚多肉既情況下，「噗」一聲，十分之響！

第一下既感覺有兩個，第一下覺得好多畀車撞咁！我咁大個仔，試過一次撞車咁大把。仲記得當時正聽緊「時光倒流二十年」，E神唱到「遺憾印象　沒有你～家中那面牆」的果句，用假音唱到個「你」字，我坐響van既車頭，睇住另一架貨車炒埋黎...「Bomb」的一聲後，全部靜晒！今日我都有同樣既感覺！

第二個感覺係以為執屎踢我，因為我第一下諗到只有佢鍾意咁同人打招呼！不過原來唔係，我見到係另一個人，係一個唔識既人，我即刻就上去用最高分貝既聲量去兇佢：「刁利牢巫，你做乜抿野呀刁利！」（聲音經過特別處理）

之後佢竟然好驚，露出一個好驚既樣，掉頭走左。我見到，忍唔住笑左出黎，件事就咁完結左。究竟佢係傻既，定係壓力大，抑或係農夫個整蠱節目派出黎既，我真係無從稽考了！

不過可以好肯定的講一句，我以後改歌詞，一定唔會再改一d關於叫人踢我屎窟的詞了。

同場加映，好兄弟河童對事件既回應：
「咁佢傻得幾暈巡wo！！唔踢前面！！」

我祝你可以幫我實現呢件咁偉大既宏願！

負能量

2009-02-10T21:35:00.004+08:00

生命中總需要一啲衝擊，尤其係我呢啲蛋散。

我個人唔衰過，又總唔會好，每一次都係，成功之前總有一次係仆左街。事業上的停滯，我知唔係我的錯，經濟差，我賣的係奢侈品，又可以點做？

我想仆返次街，但偏偏我又唔覺得我自己而家係咁！唔上唔落咁真係唔知似乜！簡單黎講，有種好迆的感覺。而每次一迆，又總係會出現好多好多的負能量。

除左因為迆而唔開心，都總有d原因係會唔開心。

我好想開返張大單，但我迫自己都迫唔到；我好想讀書，但我冇錢；我好想投資一下，但我又冇多餘的成本去承受風險；我想休息一下，但我可能連份工都冇埋...

心情有點差，人有迷惘。好耐冇睇過書，又好耐冇做過運動，冇晒精神食糧都係注定仆街！畀多少少時間我，我要叉叉電先可以再上路...

向前看，2009！

2009-01-03T12:54:00.003+08:00

打左五年幾六年blog，每年開始之前，我都總會有一個回顧。但08年對我黎講就係不值一提！平凡過平凡。大事有乜？畢業囉、投身社會囉...冇啦！

好討厭太平凡，所以上年的事都唔想講咁多！

09年，我深信我自己可以創一番事業，我好快會開到一張單，然後又好快有張大單，再然後，又會好快有好多好多單！呢幾個月，好鍾意聽廿四味的《照做》，聽親都high。Quote返首歌的歌詞先：

KIT:
我信有命數　我相天無絕人之路
我信我地繼續做　一定可以做到
漫長嘅道路踏著沉重腳步
縱然現實殘酷　惟有向著上天禱告
生存就仿似生活響一個戰場
步步為營　拋開懦弱　要學懂堅強
眼前嘅事物　無一樣會係地久天長
你要珍惜每個機會　發揮你嘅專長
每個人嘅生命都係一齣唔同嘅戲
個個都想自己可以做到出人頭地
點解俾人睇死　點樣俾人睇起
點樣係呢個社會裡面　做番自己
堅持自己態度　踏著每一步
相信呢條小路始終會通往大路
聽日發生乜嘢事無人會知道
淨係知道呢一刻　我地要企出嚟做

照做　我有我地自己嘅路
照做　我有我地自己態度

照做　我有我地自己嘅路
照做　我有我地自己態度

PHAT:
一串光陰等於一串黃金
喺邊度跌底　就係邊一度爬番起身
唔甘心　唔可以再等　黃金機會來臨果陣一定要將佢好好捉緊
失敗唔會使我氣餒　就算前路茫茫亳無頭緒
克服恐懼　勇敢去面對　成功要靠你地雙手自己爭取
你有你哋自己身份　緊守岡位做番好自己本份
就好似軍人　危險任務正在執行
遇到敵人　死梗　一樣要奮不顧身
你知道你可以　我知道我可以
照做一定冇事　照做一定冇事
只要你勇於嘗試　只有勇於嘗試
有心一定唔怕遲　所以我哋大家一齊照做

照做　我有我地自己嘅路
照做　我有我地自己態度

照做　我有我地自己嘅路
照做　我有我地自己態度

Drunk:
Keep your way, keep your say
Keep your motor running don't delay
Feel the burn, feel the heat
Running on empty just feel the beat

Pedal to the medal and here we go
N02 ready and feel the flow
Eyes are burning, mouth so dry
Fumes are empty, still making it fly
I want to be there at the finishing line
Making it so will blow my mind
Jiu Jo is the way to go
Jiu Jo is the only road

Ghost Style:
Glued to TV screens all day
Got dreams but no say on the shapes they take
Destiny forseen for a kid so clean
Who’s high on green but still so mean
Streets is watching, fans be clocking
The watches on they wrist be tick-a-tocking
Like a bomb with an unlit fuse
I’m ready to blow-up and get on that cruise
80 days around the world
See I’m dreaming again
Even though I get up in the AM
But it’s the PM that pays me
Crazy
One tour will get you some luxuries
It’s not the time u spend, it’s the paper and pen
The words to describe the struggle you’ve been in
I’m sinning
But only God will judge me
When I’m winning, I’m grinning ‘cause of the girls who love me

JBS:
You see, in reality, it’s hard trusting anyone
Say they have a plan then they quick to run
You know the ones claiming they wanna be
But when it’s said and done, it’s the benefit they reap
Keep ya mind on the goal you stealing time
Don’t stop it rollin’ rollin’ till you put in that time.
If you sit back, relax and enjoy the ride
Then, the only thing gained is a lazy mind
You gotta step up yo skills in what you know
You got to do it day by day, everyday JIU JO

照做　我有我地自己嘅路
照做　我有我地自己態度

照做　我有我地自己嘅路
照做　我有我地自己態度

其實每一朝要六點半起身，八點返到公司，真係好惡頂！有人食枝提神煙可以提提神，但我唔食煙，所以就聽Hip-Hop黎提提神了。一路行一路un下un下，真係好正！先搞high自己先可以有動力去工作！除左24 Herbs，我亦都好愛MC. Jin，成日冇野做就係聽佢兩個的碟！

除左開單，我今年仲要幫孱仔贏到最後一次的足球冠軍！我要做到0失球！

當然仲有可能有一d個個意想不到的事會發生，我plan緊架啦！唔好問我住，成事自己會公怖！

It will be mine again!

今年，唔會再係銀牌

2008-12-28T22:40:00.003+08:00

今年，唔會再係銀牌

黎到2008年的最後一個星期，孱仔兵團復操。為的，係三個月後拎的港專杯金牌！

三個月都冇踢過波了，落返球場既感覺真係冇得頂，跑，冇慢左，只係感覺易累左！跳，冇再矮了，但迎頂時間要更準！雖然未返去最佳狀態，但真係好舒服好舒服！

今年隊友方面，沿用返上年的基本陣容，走了Bear，但多了更強的細庸兄！後防線仍然係我、粉果同子健，仍然唔錯！後備的薜記，比去年強了唔少！一條後防線，真係比上年更強！

但中場真係慘，得返Teddy係可以做到野，冇左陳柏，影響真係好大！冇左佢分波，我地一定要更多跑動先可以攻得好！

上年，我地係盾隊，防守係全校最最最好的！今年我地更可以毫無保留的講呢句！但上年的弱雞攻力，今年更弱雞！唔，時間已經唔算多了！點算好呢？要諗諗點用盡阿龍同肥龍先！

今年，金牌一定係我地，孱仔兵團！！

急屎學生字

2008-11-15T00:52:00.002+08:00

急屎都學到生字？聽落好似好不可思議，但我呢兩日就係有呢個經歷！（你吹咩！）

因為急屎，我學懂了「忙」的真正意思：

你忙到唔得閒屙屎，於是你忍左一整日。返到屋企，你好累，趕住訓覺。之後第二朝晨x早又返工，返到去你先發覺：噢！我尋日篤屎原來未屙的！咁我係咪又要忍多一整日？但到你諗都未諗完，就有人同你講野，即係你又要做野啦！篤屎點算？你收緊d個括約肌先啦！仲諗！

我諗，忙就係咁解！

就係呢種感覺啦！

2008-10-19T11:42:00.002+08:00

呢個月都過左一半有多了，即係話，我已經返左半個月工了！

每朝六點半一定要起身，刷牙、洗臉、剃鬚（好討厭日日都要做呢個動作）、著衫、畀未訓醒的女友一個Goodbye kiss、六點十一前要出門口、搭輕鐵、西鐵、地鐵、八點返到公司、八點三開早會、食早餐、打Cold call、出街見客或者搵客、食lunch、再見客或者搵客、返歸、終於見到醒左的女友、上網、食飯、再上網、十一點幾又要訓、發夢、又起身...

基本上，人人返工都係咁上下，分別可能只係你要面對的係唔同既人；可能係返唔同的日數，可能你係一個消防員，你返一日、放兩日，你搵多份工都仲得！可能你係一個普通文員，應該要返五日或者五日半。又可能你係一個工作狂，又或者你老細係工作狂，要你返六日甚至七日。可能我老細就係呢類工作狂，因為我一星期要返六日，even係一日假都冇。

日日如是，理應係枯燥，但對我黎講，又唔係果回事。初初真係好唔慣，一星期要返六日，仲日日倒屎咁早起身，返到屋企真係到仆街！而且初初冇卡片，出唔到去搵客，又係十分的悶。你只能夠響公司入面不停的打電話，但又顆粒無收，做好多野都係o徙氣。第一個星期時，放工果陣就係搵工。到第二個星期，有卡片就可以周圍洗樓（即陌生拜訪），雖然都係冇咩實質作用，周圍行亦好，但我反而就覺得好開心！

經濟差，我賣的卻是要成百萬的高爾夫球會會藉。初初都覺得係mission impossible，但灰左幾日，又有返果種感覺，上年十至十一月果種！當時又係忙到有氣冇訂抖，不過又忙得好過癮！果陣有三位好好的拍檔，而家又有一班好搞鬼的同事！縱使呢份工絕對唔係我夢想工作，但挑戰性真係好夠，呢個絕對就已經可以令我用心去玩了！

家下屋企得我一個出黎做野，負擔真係好重，所以呢個遊戲，我一定會用心的去玩！又係進步的好時機！我鍾意曼聯原來又已經足足17年了，曼聯就係一技遇強愈強的球隊，我覺得我係一份子黎，所以都一定有呢個性質！哈哈哈哈！掂呀！上啦！胡九！

返工了

2008-10-03T21:54:00.003+08:00

今日終於投身社會了！第一日感覺好不錯呢！返工係幾開心，不過都好累！

既然第一日返工，咁我覺得都應該同大家講講吧！

至於做老世的事，到搵到錢，買到幢樓，娶埋老婆，咁先再諗啦下！暫時封箱先！

十字路口

2008-09-17T11:53:00.004+08:00

如何能離開失樂園？

大專畢業，原來已經有足足三個月，一年黎講，已經過左一季。但我仍然仲閒賦在家，重未搵到工作。

之前搵唔到，呢排係冇搵。老豆做了差唔多三十年的公司要執笠，有一筆少少的遣散費，如果賣埋層樓，可以有d資金去做生意。「阿傑，你黎幫我搞壇野，一齊開間公司」老豆說。我推左好多次，因為我自知未夠經驗。「你讀左咁耐書，幫人地不如幫屋企！」我同老豆生活左廿二年半，第一次有答唔到咀的感覺。

女友都好贊成：「打工始終都係冇得出頭既！」「你咪用兩年試下囉！」「你得既！」「點解你唔諗好的一面？你平時唔係成日諗野都好正面架咩？」

就連幫我好多的導師Cheris都係咁樣講：「呢兩年你讀大學，咪用d時間試下囉」「兩年後唔得先再搵野做囉」「你得既！」「你都叫學左咁多Marketing既知識丫！你應該可以幫到你老豆既」「你老豆係外行，如果得佢一個做，咁就真係好危架啦」

基本上，我有咩解決唔到的問題，都只會搵六個人去傾，而呢度就佔左其中三個。三個都係話：「唔，你得既！」我知，我有能力，我的能力亦都唔少，我知，我呢個真係知的。但一個點有能力的人，你都總要等佢有d經歷，有d體驗；你都總要等佢學下野，錯一下掛......至少我知道自己都仲未係頂班馬，仲要一班人幫我磨一磨，又或者挫一挫。

感到抗拒，我唔係因為唔相信自己的能力，而係我太了解自己的性格。自信，從來都係自己的強項，有咩事我都唔會驚。其實呢種自信，只係我本身就係一個鍾意玩，玩得黎又輸得起的人。任何事，我都會當係一種遊戲，然後同自己講：「盡力玩贏佢啦，呢個唔係生與死的問題！輸左最多重頭黎過！」

所以我成日講，就算你叫我即刻做特首、做大企業CEO，我都未慄過！因為我就係鍾意挑戰的人，一諗起同人鬧，尤其係高班過我的人，我的身體都會顯示出，我打從心底的興奮出黎，一定毛管都戙起晒！就算做衰左又點？我都可以有翻身的一日，用緊的又係人地的錢，我最多咪受萬人指責，不過畀人點指，都可以拍下籮柚就走人，響第二度再玩多次。始終唔係生同死的問題，我可以有輕鬆的面對。

我個人又好善變，我做一件事，其實為滿足感。

唱歌，我有人讚，覺得得左了，就唔想再玩，走左去。

做格仔鋪，賺左唔少了，縱使仲有好多貨「責」死左，但滿足左自己了，又唔想玩。

玩比賽，贏在兩個大獎了，滿足左，又想搵新挑戰。

咁耐以來，只有足球係持之以恆。因為我去極都去唔到我自己想去的水平。我好驚如果好快的掂左，盤生意就會好快就變左我的舊玩具...

我抗拒幫屋企，係因為我覺得自己太冇責任心，而且未有果種能力。總括黎講，係我第一次覺得，我竟然冇信心....因為我玩緊的，係老豆做咁多年人的心血。諗到呢度，我真係覺得唔好玩，亦覺得玩唔起。

不過點都好，呢次都係幫硬架啦，就即管睇睇自己可唔可以上多一個層次啦！

有時打blog抒發完，原來真係有d幫助，我感覺到自己有返少少信心=)

潮語作文

2008-08-13T22:22:00.003+08:00

【例三】九仔，你搵左兩個月都未搵到工，你呢敞仲唔屌板！？

工程進行中

2008-08-10T00:39:00.002+08:00

終於肥到自己都容忍唔到了！岩岩呢個星期開始減肥計劃了，每星期keep住有三晚跑步、每晚最多食兩碗飯，唔可以清「尾」，夠七至八成飽就夠了！

節食計劃進行左一星期，未衰！不過跑就只係跑左一次...但係今朝早踢波就已經可以見到成績了！雖然冇入波，但體能、速度、轉身、跳頂，都已經回復top fit狀態...既五六成左右！可以講係自從踢港專決賽之後最好的一場！因為呢個原因，我應該會更有恆心繼續做落去！

終於迆（hea之正字）到自己都容忍唔到了！未搵到工既無業遊民，雖然都有機會見工了，但有冇都還係未知數。響屋企真係好悶好悶，唔係打機就係打機...所以都買左本書返黎睇下！

keep住呀胡九，千祈唔好懶！

魘

2008-08-07T17:44:00.002+08:00

我從來都覺得自己係一個豁達既人，事實上都係！但程度又可能冇想像中咁豁。

時間返返去上年的十一月，可算係我呢生人最忙的一個月C我上晝要去會展，參加ACCA搞的一個商業比賽決賽！我輸左，不過我唔Care（我同自己講）。

當日下晝，我幫孱仔兵團踢初賽，兩場我只出了一場...唔係！正確黎講應該係半場多少少！我有份踢果場輸左，冇份踢的果場贏！但唔緊要，我地晉級了！24號就要去四強了！

到24號，我地四強果陣，射十二碼贏左，入決賽，對住一隊叫「香港69」的東西。佢地攻力好強，但我地就守都好好！基本上我地係得兩個入球機會，而兩球都係畀我解決左！第一球，係中前場左路罰球，係由我搏返黎的，所以我都自己操刀，但射斜左！第二球，我上前接射角球，又係頂斜左。最後都又要踢十二碼！我覺得我射得唔算差，本身對面龍門就已經畀我呃左去左邊，咁我當然射去右邊啦！但結果佢真係好似足球小將咁，突然翻身救返！最後，我都都輸左，只得亞軍！其實我果場真係踢得好好的！粉果果日狀態唔夠，我就做多次隊長，於是亦因為做左隊長，我就更盡力的踢！我帶住成條防線去踢，可以話係滴水不漏，我真係覺得好好的！但唔好意思啦胡生，你都係得亞軍！

我還記得當日女友因為娘親回港而返左屋企陪佢娘親，我輸左有幾唔開心都好，都係有苦無路訴，亦冇時間訴！因為又要即時返歸，做第二日比賽的事。結果陪左我一晚的，姓工，單字一個作字。

最後，我地贏左！係開心！但那種開心，我而家竟然已經忘記得一乾二淨！反而我仲好記得比賽完同阿King講過的野。

但呢個唔係問題，最大問題係，我飛唔走足球隊只係拎銀牌的的傷痛！響呢幾個月，我成日都發返果球罰球、果球角球、果球十二碼。每次發我都好記得，因為幾乎係每一次都會醒。每一次，我都好似有一個新的機會去再射、再頂，而我再去射、再去頂，隻腳或者個頭都會跟住郁！就好似無啦啦抽搐左一下咁！女友初初都會畀我嚇一下，會問我做乜，但而家都慣晒了。

我知，呢個係永遠都冇得返轉頭的。呢個，真係一個惡夢，我得承認，我還十分介懷...

有乜好睇！？

2008-08-04T21:38:00.004+08:00

當你發覺，你一放工，九點幾返到屋企，累到仆街。然後你打開電視，發現播緊係一套翻炒又翻炒既劇，嘈到乜咁！你一定會火都黎埋！就算你好似「標基」咁有錢，你都一定好快破產！因為你每晚最少有一個鐘係要不停的打爆部電視，然後又要不停買返黎。再打、再買、然後再打、然後再買……

好撚悶、好撚嘈、好撚老土！無線，你知衰未？

觸動，進步

2008-07-26T14:20:00.004+08:00

全球人的觸動！(圖片：nbc.com)

呢幾日女友返了娘家，我響屋企多了空閒的時間。但太熱總唔想出街，所以就響屋企聽歌...唔係，應該用煲歌去形容。而尋晚返到屋企，煲左好多好多歌，其中Kary隻新碟聽得最多次，而當中我又特別喜愛「最後一秒鐘」。於是我揀左出黎，再加上上一隻碟的「座右銘」單獨去聽，竟然發生左一件好奇怪的事。

我聽到d眼淚係咁流係咁流，但我自問我呢排真係冇咩唔開心，最多都係搵工有d阻滯，但又未至於唔開心丫！兩首歌的詞又唔係話好有共鳴，Melody又唔係真係好特別丫！不過歌手把聲，真係觸動到我了，佢把聲好似真係好慘咁，於是我就聽到係咁流淚！

講觸動，唔止呢兩首歌，仲有一位仁兄，佢叫奧巴馬。

尋日睇到新聞片段，佢老哥去到德國演講，吸引左20萬人去聽！我睇新聞的時間真係毛管都戙直了！佢那演講的內容，真係真係觸動左我！於是我今日一踢完波就返去上網，睇左佢整個演講兩次，一舉手、一投足，我迷住了！之後有d我都聽唔足，意猶未盡，再睇返成份Speech，雖然有好多深字，要不停的查字典！但我仍然堅持的睇晒，用左個多小時先睇晒，但我唔覺得我o徙時間，反而覺得係有今生冇來世的事！

如果你讀過歷史，尤其係喜愛現代史；如果你討厭社會守舊，亟欲求變的話，你一定也會畀佢迷到！去片！

而成個演講入面，我最愛就係以下呢一段！

"Partnership and cooperation among nations is not a choice; it is the one way, the only way, to protect our common security and advance our common humanity.

That is why the greatest danger of all is to allow new walls to divide us from one another.

The walls between old allies on either side of the Atlantic cannot stand. The walls between the countries with the most and those with the least cannot stand. The walls between races and tribes; natives and immigrants; Christian and Muslim and Jew cannot stand. These now are the walls we must tear down."

呢一段完完全全的觸動了我！我的毛管亦完完全全的戙到直晒！！合作、放棄對立不單係國與國的選擇，更應係人與人之間的唯一選擇！所有分歧也應該溝通，唔係建起對立的牆，等彼此各走極端！

這讓我想起前幾個星期，睇到亞洲週刊入面，一篇專欄。內容係21世紀，教育同科技的進步，人們將會依循「三生主義」（即生命、生活、生態）發展。生命即係每個人對自己的層面，每個人因為教育的普及，而知道如何做好自己；生活就係人對社會的層面，人類只會做好對社會有益的事，唔會再讓極權主義控制到，社會唔會再有人show班政客搞一堆好似文革果類的激進政治性運動，社會逐漸平穩進步；而生態就好簡單，係人對地球的層面，到幾十年後，因為地球污染問題而經漸漸呈現，所以每個人都會注重點樣減低污染。

當然我覺得呢個想法係好烏托邦，但係理論當然就比較理想的吧！況且呢個係一個大方向，到上世紀中，人類已經明白一味的戰爭係冇用，於是就用冷戰的方式去鬥。

今個世紀，該到了民族間放棄唔健康的鬥爭了！但如何變？我幾時都覺得靠政客係死，因為佢地就係得一把口。應該由教育做起，全民一起改變、進步！但我信我地更需要一位領袖，我信佢已經出現了！正如佢的競選口號一樣：

Change We Can Believe In!!! Barack Obama!!!

唉...

2008-07-25T02:47:00.003+08:00

畢左業都已經一陣子了，其實都想正正經經的搵返份工。不過真係搵極都搵唔到，講真，幾灰的！但呢個冇得你怨，機會既野，你都只有係等既之嘛！正如我的座右銘「沒有懷才不遇，只有未臻至善」，應該自己未夠好吧，人地先至對你呢份resume冇興趣！不如就再做好一點吧！之後就去考考個IELTS試，睇下可唔可以考到再好d吧！

而我呢個座右銘，都好想分享畀我的學校的marketing dept.，我忽然記得我畀過你地訪問，用作鼓勵d A-Level失意的考生，終於出了新聞稿！老實講，我好失望！先睇睇篇野先！

港專生：失意高考勿氣餒，修讀合適課程及院校，

不斷提升自我，才最重要

(2008年6月29日) 2008年高級程度會考將於明日放榜，考生獲取優異的成績，升讀大學，固然高興；但成績較預期遜色的，亦無需失望，最重要的就是擁有一顆奮發圖強的心，努力向前，選讀合適的課程及院校，提升自我，才是最重要。

以上述是香港專業進修學校(港專)電腦學高級文憑課程二年級學生李文盛(Samuel)及商貿學(市場)高級文憑課程三年級學生胡瀚傑對今年高級程度會考生的勉勵。

Samuel回想最初在入讀港專前，本打算升讀本地大學，但當接獲在公開考試的成績單的一剎那，備受打擊，原因是英文科不合格，令他失去升讀其他本地學院的機會。在決擇未來的前途時，他曾幾番掙扎，最後決定報讀(港專)電腦學高級文憑課程。

Samuel說：「電腦科目一直是我的興趣，我一直希望將來能從事與電腦相關的行業。」

就是這份對學習電腦的熱情，激起他的奮鬥心。除此之外，他覺得最難能可貴的是在學習過程中老師對學生的照顧及關懷，令他徹底消除學習英語的障礙。他在學期間報考「國際英語水平測試系統」考試 (IELTS)。結果，考獲6分的成績，而本地大學畢業生總平均為6.67。儘管成績並非異常突出，但從昔日會考不合格，到今日英文成績幾乎可與大學畢業生英語水平匹敵，可見Samuel在英語學習方面，已獲得很顯著的進步。

現在，Samuel明白公開試的挫敗並代表永遠的失敗，只要在合適的學習環境下，終有突破自我，發揮所長的一天。他已計劃將來繼續升讀大學，向自己的理想進發。

而胡瀚傑於05年亦失意於高級程度會考，然而，當時他並沒有怨天尤人，他反過來安慰自己，認為失敗才能加速個人的成長。在反思過往在學習通過程中的錯失後，胡瀚傑認為選擇合適自己興趣的課程才是最重要。故此，他在放榜後，報讀港專商貿學(市場)高級文憑課程。

胡瀚傑指出，「以往中學教育太著重教授學生應付公開試技巧，而班內的人數又太多，老師根本不可能照顧所有學生的學習需要。」

他表示，港專與其他院校比較，最特別的地方它能全面考慮學生的需要及學習情況，提供獨特的學習支援及小班教學。此外，老師非常用心教學，這些是他以往在中學教育從未曾體會到的。

在港專三年的學習過程中，在老師及社工的鼓勵下，胡瀚傑逐漸重拾學習信心，成功衝破自我。他積極參加不同課外活動及聯校比賽，且在活動中屢獲殊榮。例如，去年他與其他同學組隊參加「EMax創業精英爭奪戰」，在比賽的大專組別中勇奪「創業大獎」「EMax最具創意業務大獎」及「EMax創業優秀獎」三大獎項，力壓本地大專院校，成為在是次比賽中唯一獨攬全部重要獎項的院校，奪得價值港幣二十萬元為期半年的舖位租約，實現創業夢想。這些優異的成績在以往的學習日子中全是他不能想像及預計到的。

剛完成高級文憑課程的胡瀚傑現在滿有信心地表示，他非常期待在未來的工作，而他亦已報讀市場學學位課程，繼續向他的目標進發。

只要有夢想，忘記過去，努力現在，掌握機會，您亦可以擁有他們優異的成績！

講真，其實我已經唔係介意畀你利用，反正都唔係第一次！況且幫下自己的學校亦都等如幫自己，我冇乜異議！但做乜你硬係要屈我批評對中學的教育不滿？我打黎同我做訪問果陣，我好肯定我否認我的中學係填鴨式的教我，我都好肯定我否定左你問「係咪中學太大班人，老師會唔會顧唔到？」、「港專的老師係咪比中學好好多？」的呢一類問題！但你為了快d寫完份稿而夾硬屈我，屈我批評了我的中學，我就覺得真係完全冇理由！

點解我地的學校成日抱怨政府支持唔夠，咁你又有冇反轉頭反省自身根本就仲有好多不足問題？需唔需要為左抬高自己，而去「無厘頭尻*」的屈一個人微言薄的學生講一d冇講到的話？當然，我承認我的情緒的確將事件講得過嚴了，但所謂見微知著！港專，你地經常抱怨「懷才不遇」，但問心又是否「已臻至善」了嗎？師資係冇問題的，有問題是你們這班「高層」！

p.s.「無厘頭尻」即我地成日所講的「無厘頭」。「尻」，音雖與廣東其一解男性性器的粗口字一樣，但解釋完全不同。所謂「尻」，古言意為「最尾」，又或「尾龍骨最後的一節」；而日文就意為籮柚（各位成日睇AV的性愛好者應知，因為好多唔同的女優都會出一套以「尻」為專輯名的片），大抵都有「最後」、「最尾」之意。「厘」，同「釐」，意為「量度」。所以，「無厘」，即係冇量度；「頭尻」，即係頭至到最尾的地方，呢度有「分寸」的意思。成句即係話人地做野冇分寸，所以「無厘頭」應作「無厘頭尻」先岩！當然文字、語言係「約定俗成」的，「無厘頭」而家已經係冇錯！但唔該我講「無厘頭尻」時，你又唔好話我講！甚至話：「你條x樣又爆粗！」

舊屎

2008-07-08T19:07:00.005+08:00

人生總有唔如意的時候，亦總會感覺到唔開心，尤其呢件事你係以前做到的，你更會有倍加失落既感覺。呢個就係點解老人家成日話「舊屎（舊時）果陣呀，我點勁點好呀…咁咁咁咁」我其實一向都好鄙視呢d人，因為最重要的當然係而家吧！

踏入了year 3後，體重急升左四十磅，由150去到最誇的190磅，已經廢左的腳法唔好講，就連一向最擅長的頂波同搶波，都會因為肥左咁多，而做唔到！好似頂波咁，你總會漏頂。以前瘦，可以跳高d，早半秒就可以跳起頂走個波；但而家肥左，不過頂果下真係好快，個腦真係唔記得自己肥左，要「tun」返兩步，個波落到低d既位，你先可以頂到。不一樣的體重，但同一個位頂波，當然係死硬！而作為龍門前最後的一道防線，你總會係一漏就會累球隊輸波。

而家主要同一班中學的師弟踢波，有一d踢左好耐，有d踢左一兩年咁大把。當輸波後，當然會有人講：「So-9，你咁x屎波架！」呢句係出自一個踢左冇耐的師弟把口。但冇耐，就有一個踢左幾年的講返：「佢以前唔係咁架，鏟波又準、頂波又岩時間...」另一個又講：「佢「舊屎」的確係踢得好好，如果唔係肥左咁多，可能仲keep到架...」

老實講，踢得差，已經足夠讓我失落一整日，仲要畀人話屎，真係幾唔好受！因為踢咁多年，我一向都係笑人，而唔係畀人笑的角色。有人講我「舊屎」，原來真係幾高興，因為有人肯定你的過去。但同樣的，亦肯定左你現在的不濟！諗到呢度，你就更加的唔開心！「如果我冇肥到的又會點？...」「如果我一路keep住踢，又會點呢？...」之後又會有一系列以前打得好時的片段響腦入面...當然亦同時反思下次遇到呢個情況應該點做。諗，當然一切都美好！但踢波始終唔係純講智力的運動，其實好講反應，所以之後都冇乜改進！

我好討厭Hillary Clinton（希拉莉），尤其係當佢同Barack Obama（奧巴馬）爭奪民主黨總統提名時，果一副潑婦罵街的樣子。但當佢決定退選後，演講辭中有一段的確令我好欣賞，甚至可講係另眼相看，係咁的：

'I want to say to my supporters: When you hear people saying or think to yourself, If only, or, What if, I say, please, don't go there. Every moment wasted looking back keeps us from moving forward.

Life is too short, time is too precious, and the stakes are too high to dwell on what might have been. We have to work together for what still can be.'

唔打算翻譯了，有字唔明可以問我。回憶唔係有問題，尤其我地讀史的，當然明白「借古鑑今」的重要！但不停的想「如果怎樣，我又會怎樣唔同」，就真係浪費時間了！我踢完波愈諗愈唔開心，但又突然諗到呢句野。躁緊底既我，即時冷靜了！

其實有時講下「舊屎」，係幾開心！但你總唔能夠懷緬一世而唔進步掛！死肥仔，你仲唔快d減肥！？

Double Double!! Again!!!

2008-05-22T16:14:00.002+08:00

We are the CHAMPION!!!

還記得九年前，響茶餐廳見證住曼聯拎三冠王的一刻。轉過頭，我由一個差唔多讀完中一個細路，變成一個差唔多讀完大專的一個大細路，亦見證住曼聯再登歐洲頂級頒獎台！

你得承認，曼聯兩次的歐聯決賽，都係踢得唔好，儘管我地最後都贏了！上次睇，99年決賽的時候，對手兩次撞門框，今次對手就射中三次！兩次都係，唔輸，係好運！再翻查，原來68年第一次拎歐聯冠軍時，對手都有一球係中柱的，但曼聯還是贏了！

坊間好多「反曼」球迷，就算對曼聯冇惡意的，都不會有甚麼好感！佢地大多數就話曼聯的個運字，冇實力卻贏冠軍，所以憎！

但我覺得做曼聯球迷就係有呢種幸福，因為你的愛隊永遠就係會堅持到底，而且經常都有戲劇性的事發生！人總愛呢D情節，所以做曼聯球迷，真係好幸福的！

如果唔係你，我應該唔係呢堆幸褔人入面！我愛了曼聯十七年，你也踢了曼聯又十七年！到今日你終於打了759場，破了球會紀錄了！多謝你傑斯！

CHAMP10N of MAN. UN17ED!!!

2008-05-12T09:09:00.004+08:00

16年內的第10次！

當傑斯響下半場最後十幾分鐘，射入奠勝的一球後，曼聯就得到了今年的聯賽冠軍！係16年內的第10次，亦係第17次的高舉頂級聯賽獎杯！但除此之外，亦係傑斯為曼聯第758次響正式比賽上陣，平左波比查爾頓爵士的記錄。

今場上場佢絕對唔係戥腳，上陣冇耐就入波了！呢球亦係佢應得的！17年前，老豆響電視前大叫「傑斯、傑斯好波」。可能係因為老豆的關係，亦可能係迷上了傑斯的關係，我亦從果日選擇成為曼聯的球迷。想不頭咁多個年頭了，佢仍然響隊中，我仍然係曼聯的球迷！！

今年的捧杯，我不大開心，尤其係隊長加利佬成季傷出，曼聯拎冠軍都冇獎牌拎。我諗大家都知我一定有一點唔開心，我的英文名Neville，就係因為佢，加利佬Gary Neville！今年佢有出席呢個典禮，但就文裝上陣，似教練多於球員！一班球員捧杯前佢逐一道賀，捧杯時亦只係企埋一二邊，冇入到鏡，冇一齊慶祝...呢下我的確從好興奮的狀態Down了下來，有一點「心up」...就係呢幅相，你何解唔一齊慶祝呀？你係我地的對神支柱黎的！

今朝起身想再搵返尋晚捧杯的果種喜悅，於是乎就上網四出搵返尋晚的相，開心返晒！因為響曼聯網見到下面的呢幅相！

起碼佢地心中還有呢位隊長！八月，隊長我地一齊再出發！高高高！

反省

2008-05-02T23:24:00.003+08:00

Yeah! 香港人又蠢左一大截啦！

聖火今日響香港境內傳遞，四圍封路，搞到交通擠塞！見到成條街都係著紅衫、拎住中國五星紅旗！市面上一片歡欣的氣氛，我有一種說不出的不快，返到屋企，我終於知道所為何事。

夜晚睇新聞，今日有好多人講「中國萬歲」，其實沒有甚麼反感；見到有遊行，但卻被禁了，心入面就銀住銀住。咁同大陸有咩分別？言論自由，係我地所proud of的一樣野，亦係法律所允許的事，警察憑乜野一見人唱反調，就即拉返上差館？市民可以噓呢班示威的人，但又憑乜去打佢地？而差佬又憑乜野唔去阻止呢d暴民，讓佢地繼續去以「愛國」之名肆意搗亂！？

新聞同時訪問了一些憤青，咩叫愛國。佢地大慨答了「愛國係一種情意結，不論你的國家做了甚麼，你都應該支持」。我即刻諗起了前幾日死左的一個作者所作的一本書，柏楊的《醜陋的中國人》。書的中心係「我們的醜陋，是在於我們不知道自己的醜陋」。我自己都係愛國份子，亦曾經用過憤青們的愛國方法，但睇過呢本書之後，我的睇法真係完全的翻過黎。

過份的愛面子，係中國人的一大問題。睇返今次傳聖火的路線，你就可以好清楚了。史上最長的路線，仲要帶支聖火上世界最高點，第一，過份浪費金錢；第二，真係好危險的！呢種過份愛面子、過份的自大，其實源自於我們的自卑。過去二百年，由馬戛爾尼叩關中國，面聖時唔肯下跪乾隆起，中國就開始同西方世界有衝突。呢種新與舊、開放文明與封建落後的衝突，就使中國一直的風雨飄搖，直到三十年前先慢慢改過黎。今日中國已成為「準大國」，經濟強勁，響全世界黎講都舉足輕重，但過去的唔光彩令我地一直都唔敢抬起頭做人，總覺得自己係差別人一點，縱使好多野已經可以同人地比一日之長短！到今日，縱使身份已經唔同，但個心都仍冇任何既改變！但為左唔畀人知自己個心唔得，但乜都要充大頭鬼，乜都要面子，乜都要講排場！

回歸左中國之後，香港政府都受到感染，阿爺要搞的，香港都一定「有錢出錢，有力出力」。「錢」係乜唔駛多講，「力」就真係做左更多野。好似今次咁，又封路，又拉示威者，仲不停的宣傳宣傳！成街人都係著晒紅衫，好不成功！但呢個係我地應做的嗎？

中國、香港，至少響四十年內，都應該仲係兩個唔同制度，我地的社會核心價值係「公平、公正、公開」！響香港傳得聖火，就係全香港的事，成班左派人仕去傳，你內部私訂左一張名單，卻話係「社會縮影」？何「公平」之有？如果呢個真係「社會縮影」，阿爺就唔會成日都唔信香港啦！你縱容一班會大喊「中國萬歲」的暴民打人，打人唔拉！你卻拉走晒一班和平示威，何「公正」之有？你有權唔畀人入境，但原因都唔畀（雖然大家心知肚明），說道「唔就個別事件作評論」，唔「公開」已經唔駛否定，但你驚唔驚下個會係你？

到呢d有關「國家」面子、民族情緒既問題時，所有我地引以為傲的社會核心價值都要讓開？最慘就係就連香港人都覺得不以為然，覺得冇乜問題！人又著你又著既心態，著晒紅衫去「支持」自己的國家？原來做左一塊大佈景板之餘，仲危害緊保護自己的秩序！

我唔係支持我的國家，我愛中國！所以更要中國進步而非護其短！中國係一個大國，呢一個大國並唔係由幼稚園生組成，我地唔需要不停的鼓勵佢地，讓佢地有勇氣去做一些事；反之呢一班係有好多經驗的國家棟樑，我地應該的就係監察佢地的對與錯！錯就要評擊，讓佢地即刻做反應去改、去進步！憤青們，你地愛國變成害國了！

真係服得你好交關！

2008-04-30T21:45:00.002+08:00

好野！又贏啦！

二月，曼聯落後左阿仙奴五分。好記得當日去完馬交搵完神（老蘇）之後，去買了鑽石耳環畀女友。當時serve我地的人話，佢本身都鍾意曼聯的，但而家就鍾意車仔，曼聯奪冠機會嘛？佢一句好肯定：「冇可能啦下嘛？」我當時只係出於禮貌，冇動肝火，冷冷的回答：「好，就睇下點啦，我仲好有信心！」

到四月，曼聯聯賽已經反先阿記，唔記得係五分定係六分了！而呢個月的第一日，就係今屆歐聯八強的第一回合，作客羅馬。好多人。認為唔易踢，因為曼聯上季曾大炒呢隊七個一皮，羅馬人一定復仇心切，打出個袋都要力拼到底！但事實卻完全唔同想象，羅馬踢得毫無鬥志，響輸第二球之後，更加似乎放棄了，只係曼聯把握唔到，唔係分分鐘響羅馬又黎多一鑊大屠殺！羅馬領隊話呢隊曼聯，比意甲球隊踢得更意甲！

94年，曼聯第一次蟬聯英超冠軍，兩隻快翼出波，中間的簡大帝同曉士緊有辦法孖你搞掂！當時老費53歲。

99年，我地拎三冠果陣，仍然係兩翼出波，但已經係一快翼拍一慢翼。碧咸、傑斯出波，中間用約基、高爾甚至老蘇、舒寧咸中間入涉，如果個波滴返出去禁區外，就史高斯或者堅尼後上轟入，當時老費58歲。

01年，老費眼見曼聯響99年之後，兩年在歐聯戰場都輸得好難睇，於是要將曼聯轉型，引入華朗、雲佬。多左地面推進，有咩波就質畀雲佬搞掂佢，當時老費未足60歲。

03-06年，碧咸、堅尼、雲佬等曼聯傳奇相繼出走，新引入了C朗、朗尼等80年代出世的球員，時逢阿巴莫域治入主車仔，打造左車仔盛世。曼聯連續三年失落聯賽。當時個個都罵老費老了。老費當時已經65歲。

08年，曼聯已打造出新一代班底，創出「天花龍鳳進攻法」（個名係我自己改的）。每個進攻球員都可以自由走位，敵方球員難以去Mark實。歐聯已經連續主場十一勝，當中贏得包括巴塞同羅馬。老費已經67歲。

我之所以咁強調老費的年紀，係因為係人都知，愈老的人，其實愈容易變得老頑固，變成固步自封的人。但我地尊敬的費Sir冇，由佢52歲時，第一次拎了英超冠軍；到15年後，今日已經67歲的佢，沒有一分鐘唔係變緊。講緊唔係為變而變，而係順應世界足球新潮流之餘，仲敢於打倒昨日的我，創出新的一套。最可貴的係佢昨日其實已經成功，但佢仍然追隨更高層次的成功！呢個真係已經夠了好服了！我最欣賞都係佢果個永遠熾熱的求勝心，「No the best, but better.」呢種不停鞭你自己進步的動力，後生仔們，你服唔服？

呢一代後生，可能唔太buy毅力，開口埋口都講食腦。講呢味，費Sir又係唔到你唔服的！唔講遠，就講返呢個4月，30日入面打8場，聯賽、歐聯各佔一半，每隔三至四日又一場，但場場都真係硬野！

歐聯四戰三勝一和，成功打入決賽，功力唔駛講！聯賽呢個月四戰一勝兩和一負，好多人都唔收貨，但反而我響呢度先最見到費sir的功力！臨場的調兵功力，計到最盡最盡的留力，雖然聯賽的形勢係冇月初咁好，但主動權一直緊握在手！而且其實車仔果場，差一點就可以搏到的了！

一個老人家，不斷力求創新進步，腦筋不退反進，費sir，我服晒了！

馬騮仔終於打飛機

2008-04-26T23:16:00.005+08:00

馬騮仔，你今日打左飛機未呀？

最後一個比賽，玩完了！今年埋單玩了五個比賽，以失敗作開始，也以失敗作終結。

今日去了睇BIA比賽，我地今年呢四個人所參加的比賽，最初的目的，就係為呢一個最後的比賽做好準備，但到最後的呢個比賽，卻竟然完全冇晒動力，更作要既係冇埋果份熱情。今日三組入圍的，水準的確唔高，但係咪完全冇可取之處呢？我覺得又唔係！

賽前賽會方面，叫我地準備好個power point，有機會上台present！因為其他組冇收過呢個通知，所以我地都自然的好有期望，以為可以「跌左落地都最少拎返一渣沙」，不過竟然冇！咁即係賽會明玩我地啦！不過嬲就冇既，但老實講的確好失望。

不過自己就覺得黎呢度唔會o徙左時間，因為所有的呢d比賽，你總會有野袋到落袋，呢個先係我咁鍾意參加比賽的一個原因。參加比賽，係一個最直接的方法，去量度、去觀察，你同最好的一群原來仲差幾遠。參加比賽，你可以睇到自己有咩不足、人地有咩不足，好既你就去學，衰既就唔好學啦！獎項的確就係一個鼓勵、一個肯定。

今次第一組的果個Presentation Skill其實幾好的，唔止係個女，男的都好唔錯！因為佢地係夠活，如果呢個係一個社會上的商業比賽，我覺得佢地未必會輸，因為佢地包裝得好好！

而第二組我係老細就唔會buy佢，因為我見到佢地的悶就已經唔想聽，最後佢地贏了，屎提話贏在內容！我唔知道，因為我冇聽到！不過證明評判們都係好務實，我輸都會輸得服，因為我地輸唔係輸我的的包裝甩皮甩骨，而係可能內容唔夠。

至於第三組，係搞笑的！但我覺得呢類人，的確幾時都有市場的！笑係每個人所喜愛的，唔理你係鬧住笑，定係讚住笑，人都總會喜歡笑多過喊！當然有人會覺得場會唔岩，呢d場合，應該比較嚴肅d，但我又覺得，其實響邊個場合，加一d笑既、幽默既元素，係咪都係會好d、令人印象深刻d呢？今年的頭三個比賽，我都有加入過呢個元素，唔錯丫！扯遠少少，我甚至諗過響自己的喪禮上搞笑，例如靈堂的牌匾上寫「英年早逝」、「天妒英才」等，我就想係「死有餘辜」又或者係「應有此報」等！當然十畫都未有一撇，但我覺得搞笑就等如我的生命，有何不可？

不過我覺得最有獲益的，都算係最後海洋公園代表Paul Pei的分享，幽默得黎又係有的放矢，雖然我呢篇blog響足足半個月有多的之後先至打，但仍好記得佢好多的分享，而我好鍾意佢一句「My time is my time, but yours are just beginning!」岩岩先踏入兩張野，大把年華，我真係好鍾意講一句：「我仲後生，你吹咩！？」不過我唔敢再浪費了，呢句野好似就係同你講：「細路，你一定有機會的！」有一刻的毛管都戙起！

最後，我地懷著有一拎硬獎的心情，去出席一個最後冇獎的典禮，一定好失望！就算認左真係好瘀，你都冇辦法唔認！不過好快就平伏左，因為諗諗下又真係唔值得有呢個獎的。儲足彈藥，出黎做野再爆過！Come On!!

XX三人組！

2008-04-12T23:59:00.001+08:00

傳媒好鍾意將某d三樣野一齊黎的事，稱之為「乜乜三人組」。而家曼聯有「攻擊三人組」；以前芝加哥公牛就用「冠軍三人組」MJ、Pippen 同 Rodman；返到前幾年，香港又有一個「重陰公三人組」老董、煲呔同梁錦松。而我一直有一個屬於自己的三人組，小弟稱之為「調high三人組」（唔好誤會，唔係「屌三人組」）。所講的唔係一個人，而係三首我一唔開心，又或者我一覺得down果首聽的，將我情緒調教返去好High的感覺。首先有一首「黃金時代」，再黎就係「衝口而出」同「第一類接觸」。一路唱，一路就係咁un，個人即時high晒！

呢一排講真真係好忙，有時忙到個人真係好down下！但「調high三人組」都竟然失效了，唔知係唔係人老左，有時聽呢類歌只會覺得好煩好嘈！當然唔係話呢幾首已經唔好聽，但係有時唔岩mood就係唔岩的了。

好在有新的「調high三人組」！全部都係黎自好多年前，E臣的一張大碟「Shall We Dance? Shall We Talk!」入面！有「信心花舍」、「Shell we dance」、「天使的禮物」。

揀「信心花舍」做第一首，係因為一開始佢好慢，會好襯返果下果種mood，但中間的歌詞同melody就會令你好不期然的起舞。尤其係副歌有一句「為你願托著沿路飛舞」，真係會有阿E臣托住紮花係咁跳下跳下咁！哈哈！之後的「Shell we dance」你更係冇辦法心情會唔靚。好輕好輕的在跳舞，講緊係你的魂魄。有一種你岩岩戀愛的浪漫，諗起到你的女人，這就係你工作的動力。而「天使的禮物」就已經好夢幻的一般，好未來的景象響腦海入面！眼前的衰野，就畀晒呢三首歌一掃而空。應該話一吹而空！因為「掃」要用力，但呢一野係冇用過咩力，而好似龍珠入面食左仙豆咁，突然好返、充滿力量而心情靚晒！

Wow！又要做野了！

潺蝦

2008-03-29T23:11:00.001+08:00

真係命運？？

上兩年我地班兵分兩路打籃球賽，我打的係阿King帶的「蝦片」同「蝦Go!」，從未出線。而另一隊係Teddy帶隊的「孱仔兵團」（當然我都係另隊波的足球部成員）。今年兩隊合拼，講真期望好大，但最後四強撻Q，得第三名。講真，我就好失望，但其實呢句又幾時到我呢d茄呢啡失望丫！有時命運呢樣野就係咁！

不過大家都有一樣野係好開心的，係大家果份Friendship！前排adidas有個ad我好鍾意的，因為個slogan 好 impress 我的！「打得一隊波就係好兄弟」！今年真係完全的感受到！算啦！都算叫有一塊獎牌啦！！

同場加映：胡九的唯一入波前一刻。

我個仔好開心！

2008-03-27T23:17:00.001+08:00

喂，死仔，開心死啦？

我諗好多人都知我真係好鍾意狗，所以當左三隻狗仔自己仔女看待，不過有時都覺得自己太忙，少左理一班仔女。尤其係對骰仔，少左夜晚同佢散步。出去遠d既地方又帶唔到佢，因為唔可以好似兩隻細既咁，可以偷偷的上到巴士。於是佢成日響屋企都鬱鬱寡歡咁樣，特別係當JoeJoe黎左之後，奶B都好少同佢玩，見佢成日響屋企都好悶咁。

阿麻做大壽，兩個表弟就響美國返黎，賀壽之餘，亦會響香港玩返幾日。而我都請左日假，去左長州玩返日。名義上係帶老表們去玩，事實上係想哄下個衰仔開心。苦於佢太大隻，根本上唔到巴士，所以我地特登租左架貨van，可以載佢出中環，再轉船去賓客人數多的地方。
一路上，其實佢地冇坐低過，一路都望實窗外的情況。冇計啦，佢真係好少出街。你睇骰仔個樣，就知佢其實可能有d都柏文，又或者狼狗的血統，所以佢好跑得，亦好鍾意自由自在的跑。跑到佢熱辣辣，不嬲都唔會出街飲水的佢，竟然好乖的飲了一整樽！！

飲完就好乖的看住架車了！

一向都覺得同狗影相係好難的，何況係兩隻...
如果三隻都肯同你一齊望鏡頭，其實真係好難得，所以影到你本人唔好睇，三隻野貌合神離都好，你都要同自己講：「算啦，唔好再要求咁多啦！」
全日最開心的，係同佢地兩隻野去玩水，骰仔第一次見咁多水，d水湧過黎果下，真係驚驚青青咁縮開，不過都睇到佢真係好開心！其實我都覺得而家未出黎做野，都叫做仲有d時間陪下班仔女，到第時冇時間部佢地，諗到佢地悶果下，其實都幾陰公！

其實政府講得好岩，養一隻狗，你真係要諗清諗楚先好養！一隻狗仔，你唔係話就咁畀間屋佢住，唔係話就咁畀飯佢吃，就叫做對佢好好！其實佢地想要的都唔係好多野，只係可以要你一日抽一兩分鐘，摸下佢個頭，講兩句，大家交下心咁就夠了！希望各位狗主又或者有養狗念頭的朋友，畀多兩分鐘你的仔女，咁大家都會開心d啦！

始終最鍾意都係贏你地！

2008-03-23T23:59:00.000+08:00

布朗都入到你地波，你睇下你地幾勁！？

一年入面，曼聯最少都會對利物浦兩次，兩次都會係我全年最想睇的比賽！原因無他，我憎佢地！唔係，應該話係好憎好憎好憎佢地！而你又知，曼聯實會幫你出呢啖氣！！！

今年唔例外，曼聯又一季入面，雙殺利記！其實贏，係冇驚喜的，因為你知曼聯係贏硬的！翻查返記錄，自四年前，賓尼兔上台後，曼聯未響聯賽輸過畀利記，入左12球，失左1球，贏7和1未輸過！

今年又係同童哥睇，佢又一次唉聲啖氣！算啦，你捧錯隊啦！

拿！我畀返你呢幾年唉聲啖氣的歷史你睇下吧！Look!!!
http://wuso9.blogspot.com/2007/03/blog-post_03.html

老麻子，八十快樂！

2008-03-22T23:59:00.000+08:00

老麻子，生日快樂！

我麻麻細細個就湊我，所以我地好好感情，我見親佢都會串下佢、摵下佢塊面咁。佢擺八十大壽，身為嫡孫的我，又點可以待慢？

可能我女友都知我同老麻子感情咁好，所以佢都特別的會錫阿麻，於是佢用左個半月，繡左幅野賀壽！

而我都買左舊金仔畀老麻子！

我唔只齋送野的，我都有執正自己的，不過就係唔記得剃鬚！但唔打緊，響的士剃囉！
哈哈，我都係第一次響的士上剃鬚！所以我好人有好報，第一鋪十三張就已經通殺六注！哈哈！不過唔d都係唔重要的，最重要的，還是阿麻生日開心！

Special thanks to.......my BROS!!!

2008-03-15T23:59:00.007+08:00

五年冇變，戇鳩依然！！

真係已經唔記得，我幾歲已經開始鍾意唱歌。唔同的歌又會響唔同的年代影響住我、勾起我唔同的共鳴。我同我女人的主題曲係乜，我諗唔駛太多講，因為好多人都知了！不過我諗好多人就唔太知我同一班好兄弟的歌，稱之為兄弟之歌！係呢隻了！！1874！去歌！

1874　陳奕迅
曲：王雙駿詞：黃偉文編曲/監製：王雙駿

仍然沒有遇到那位跟我絕配的戀人
你根本也未有出現還是已然逝去

懷疑在某一個國度裡的某一年還未帶我到世上那天
存在過一位等我愛的某人夜夜為我失眠

*從來未相識已不在這個人極其實在卻像個虛構角色
莫非今生原定陪我來卻去了錯誤時代

情人若寂寥地出生在 1874 剛剛早一百年一個世紀
是否終身都這樣頑強地等雨季會降臨赤地
為何未及時地出生在 1874 邂逅你看守你一起老死
互不相識相處在同年代中仍可同生共死

Repeat *

情人若寂寥地出生在 1874 剛剛早一百年一個世紀
是否終身都這樣頑強地等雨季會降臨赤地
為何未及時地出生在 1874 邂逅你看守你一起老死
若果不可相約在和平地方也與你暢遊戰地
為何未及時地出生在 1874挽著你的手臂徹夜逃避
漫天烽火失散在同年代中仍可同生共死

呢首歌係我童哥同砵仔的歌，呢個組合最初叫「蘇童砵」，又或者叫「砵童蘇」，不過後尾就索性叫做「廢柴三聯邦」（即係「廢柴聯邦眾合組織」既前身）！因為我地真的好廢好廢！哈哈！回想當年，岩岩中五考完mock，又唔想溫書，我地三個就每日唔係唱K就係碌Ling，而每一次去唱K，我地都會唱呢一首歌，直到家下，都一定會點！還記得當時砵哥每次唱親呢首歌，睇見個MV，就會講：「呢套好好睇架！」而我地兩個為左唔畀佢每次都講，我地都會用盡力嗌呢首歌，去蓋過佢把聲！所以呢首係我地三個的歌！

而我同童哥又有另一首嗌到抽筋的歌！當年我讀完中七，考晒A Level，又成日搵童哥去篤波或者唱K！而響當其時，我把聲仲係呢世人最靚的一段時間，好多歌都唱到，但就係唱極都唱唔到呢首！許志安！講也不要講！

許志安　講也不要講

填詞：黃偉文
作曲：伍仲衡
編曲/監製：舒文

不想嗟怨　現在歲數　已襯不起很幽怨
旁人問及　轉個話題就算
難題獨是　戒了又再想抽煙

怎可心軟　問六百遍　我也聳聳我雙肩
臨時作個　冷笑話講就算
失戀可會　神傷一臉
萬人正在仰望　看著我表演

＊傷不傷　慘不慘　講也不要講
　一開口　一生的　修養就泡湯
　不瀟灑　不好看
　情願扮成接近冷酷那麼善忘
　酸不酸　苦不苦　講也不要講
　想關心的　建議你　問我工作和近況＊

人大了　自有滄桑
全日顧著訴苦　怎算得好漢

多講多錯　就是有理　也怕顯得太嚕囌
無人笑我　我也得尊重我
即使觀眾　全都猜錯
但憔悴地答辯　會愉快幾多

REPEAT＊

人大了　自覺應當
能在最難情況　冷靜而硬朗

不解釋　不補充　講也不要講
不捨得將　這事幹　擺進大染缸
小家子　不好看
情願別人敬重我病態的開朗
怎麼分開　或失戀　講也不要講
想關心的　建議你　問我工作和近況
人大了　自覺應當
能在最難情況　冷靜而硬朗

後面果度有一段「不解釋　不補充」去到「想關心的　建議你　問我工作和近況」係好難唱，一級一級咁上，加上腦海中總有果個得一粒睪丸的許志安把聲，你愈想唱到好似佢咁，就愈係唔得！因為每次都黎到最後一段，都係上極上唔到，於是我地兩條友，就不停重唱又重唱，結果都係唱唔到！哈哈！不過我每次一聽到呢首歌，我就必會諗起童哥呢兜友！

最後就係大熱！我覺得呢首歌永遠唔駛多講！因為就係睇片就ok了！又係同童哥一齊玩，另外今次終於有屎人份了，哈哈哈哈！城城的「唱這歌」！唔再畀歌詞了，因為今次改做去片！

講真，呢次真係好爆！打呢篇blog係因為要多謝我的兄弟同我慶祝生日！我地當年戇撚鳩鳩的玩都唔怕，玩到五年後的今年，就頂多戇鳩算，都仍然好開心！打呢篇blog果陣，係睇返之前咁多年的日記黎打，睇左我三粒幾鐘！原來當年童哥試過響砵哥生日飲到醉發老四；原來砵仔試過有一輪入波入到激親獨仔；原來龜頭試過打winning半場贏三球，最後畀我追返四球而沮喪；原來屎人試過生日畀我炒佢8:1，而多謝我送呢份厚禮畀佢做生日；原來我試過踢波踢到發砵仔老四！原來好多野都發生過，大多都好搞笑！原來我真係打唔晒！Thanks my bros!!

我家有一隻新BB

2008-03-14T23:04:00.005+08:00

Hello，我叫Joe Joe，今年兩個幾月！

骰仔同奶B都已經不知不覺間大個了，兩個都已經歲幾，都各自有佢地的性需要，於是我同女友決定買一隻芝娃娃仔黎陪奶B，等佢地溝更多bb出黎！響精挑細選後，終於改左個名畀佢，叫「Joe Joe」。咁由於佢姓胡，所以個全名就叫「Wu Joe Joe」，而中文名譯音就叫「污糟糟」啦！

所謂「唔怕生壞命，至怕改壞名」，原本狗一樣都適用響呢句上面。呢個衰野，真係好污糟！佢竟然可以響自己岩岩屙完的一篤屎上面訓覺，真係好野！

而佢同奶B都玩得好癲，奶B第一日就整到佢其中一隻眼，搞到糟糟第一日返黎就響左單眼仔！最好笑係總之而家糟糟覺得痛，又或者將會覺得痛，都會單起一隻眼！不過影唔到佢相！

不過真係唔覺，原來奶B大得咁快，佢返黎果陣，同糟糟而家一樣咁大，但而家已經咁大隻了！See！

一隻只有四份一個階磚，一隻就有成個階磚咁大！而家睇奶B，原來真係好大隻！

咁當然，一山總係還有一山高！

Say Goodbye to my 21!!!

2008-03-12T22:19:00.003+08:00

愛死你......整畀我的生日蛋糕...生日布甸先岩！嘻！

同我fd的人都知，21係我的號碼，係我自己揀黎代表我的號碼！果然，21歲呢一年的確好過癮，人生的最高峰同最低潮（當然係暫時黎講啦下），都一年內嚐過！21歲好似做過好多野，但感覺又好快！是的，就係咁又過左了！22歲又黎左，但呢個生日，我發覺自己真係已經同以前唔同左！

以前會老早就睇定，自己果年生日係星期幾，諗住同自己鍾意的人當日點吃喝玩樂。但今年我竟然係去到果個星期都仲搞唔清生日係星期幾，只係女友問了一句：「星期三打算點慶祝？」才記得我今年生日，原來已經係差唔多到了。

今年生日我同了屋企人過，好似中二之後都未試過！本來都冇此打算，只係都係女友問了一句：「同屋企人過好嗎？」我也唔諗就答：「哦，好呀！」於是大家都好求其的，就去了屯門楊小坑的一間泰北菜（拿，同泰國菜唔同的）食了一餐。其實一路都聽好多人講過楊小坑有正野食，不過就係咁耐都冇去過！趁生日都終於去了！原來間野真係好好味！！

今年生日，生日禮物真係唔多，女友的果份都老早成個月前送左了！不過都好開心佢再整個特大木糠布甸畀我！好好味呀！不過你係咪想肥死我先，我響21歲的呢一年內，都已經肥左足足三十磅，而家已經170磅有多了！我自己都想wow自己一聲！

另外我自己都送左自己一份生日禮物，就係而家個blog的新theme，好悠悠然的一個theme！每次入親黎都覺得好舒服！哈哈！尤其生日呢一個星期，係成個星期都係生病中的時候！

仲有都要多謝各位send過sms，又或者響xanga同過我講生日快樂的朋友講一聲！些些！

p.s. 我轉了一個新的電話號碼，可能你send了sms黎同我講生日快樂，而我冇覆你。其實因為我轉了個no.，雖然我收唔到，但都真係些些你啦！

好彩！冇行錯路！

2008-03-08T23:48:00.003+08:00

Keep 住拎獎，哈哈(相片：屎提昏)

記得入港專之前，讀完中七之後的果個暑假，係做過物流倉的。由於見到當時的倉有千瘡百孔的問題，於是就諗過不如讀物流，讀完就返去倉度做，搞掂返D問題，話唔定可以有一番作為！而且自細都對交通有興趣。不過諗諗下，自己都係想讀一d可以發揮我創意的野，所以最後都係揀左Marketing！

其實我讀落，雖然都唔覺得自己成績好，甚至有d差，但我卻已經可以好肯定的講，我冇揀錯科！而今次呢個比賽，係香港運輸及物流事會搞的。比賽的形式係，比賽果日先抽籤，抽個交通或者物流case，然後你要用個半鐘的時間，搵好晒料、做好晒個Presentation要準備的野，即係PowerPoint同Speech。

其實真係好好玩的，尤其你的對手係香港咁多間大學的代表！比賽前好耐已經感到好興奮！肥仔問我係咪因為有機會，砌低大學生所以興奮；其實我知輸左九成的了，但可以同高班過你的人鍊過，知道自己仲有咩唔掂，呢個機會先令人興奮吧！

比賽之前，我地都準備了好多有關的資料，我比較準備得多的係陸上的交通，而屎提就比較多航空料。我唔係賣花讚花香，我覺得今次我地陸空的準備資料，真係好一流！我敢講未來十五年，香港有咩道路幹線、新的港鐵線路，我一定知！不過卻抽到了一張咁的題目......

好過份，竟然係有關「海」的一份資料！我地唔熟唔在講，最慘係我地之前所準備的野全部都冇用！不過做野做係咁，難做我地都要做！結果就只能夠響指定時間內交到PowerPoint......講稿嘛？真係冇時間！所以我出去都係冇講稿的，一路個腦諗到講乜，就即時Translate返做英文。我的英文嘛？仍然都係甩甩地咳，不過感覺好左了！

比賽中見到好多人，最深刻有三個人。第一個係黎自樹仁大學的一個肥仔，佢講英文發音都正的，但卻表情誇張、聲線更可謂有摟打之嫌。其實佢地的內容，我覺得都好好，不過誇張扮野卻係死罪。最後都好順理成章，入唔到三甲！而故事的劇情發展，都好順理成章，條肥仔黑面！Oh！老友，Game黎架咋，唔好咁啦！

第二個係嶺南的一個坡妹代表！佢不停的讚新加玻而踩香港！老友，你響香港比賽，d評判都又係香港人，你咁踩緊係死啦！仲有喎，做物流的就係個個都憎星加坡的！咁班評判又係做物流的，咁所以都拜拜了！

最後係壓軸出場的Poly代表！一個香港人，講英文卻是黑人腔！好正好正，佢講時完全知自己講緊乜，佢完全可以唔駛望住份稿或者PowerPoint，就可以一路用英文黎講所有野，包括好多有億億聲的數字！佢對想講的野，好明顯真係好熟！我忽然想起當年中學的副校長，柏柏sir所講過的一句話：「你要想做好一樣野，做到佢成功為止，你一定要對佢好熱愛！」從這個人身上，你完全睇到佢好愛物流呢樣野，佢亦投入左好多，所以表現得咁好！諗返自己，真係好愛做廣告的！我有果份熱誠架喂！

最後，當然我地入唔到三甲。但我亦為Poly拎唔到冠軍感到可惜，呢個香港奧巴瑪，真係好睇又好食的！

又一個比賽玩完，仲有最後一個！可唔可以keep住參加比賽的數字，同拎獎數字的比率響120%左右呢？我而家玩了四個比賽，有五個獎，有成125%，黎緊果個拎唔拎到呢？？

不過我還是覺得，最重要係做野果陣，大家都get到fun就夠了！

The Bucket List

2008-02-27T22:33:00.000+08:00

響睇呢套戲之前，都足足有個多月未入過戲院睇戲了！當響電視上睇左精華之後，我就知道，下一套一定係呢套！

故事係講有兩個到左癌症未期的老人家，因偶然的機會住埋同一間病房。一個窮，一個富。窮的發覺自己快要死去，但大半生都係要養妻活兒，十分遺憾的錯失了很多！死前諗返起中學時阿Sir講過的一份功課，就係響張紙上寫低有咩想做。富的享盡榮華，都唔想就咁死左去，所以決定出錢完成大家的心願，週遊列國咁。沿途大家以生命影響生命，響生命最後的的一段，都有唔同的體驗同放低了各自的遺憾。

其實呢套野最好睇係兩位影帝的老練的演技，更好睇係套戲本身！好多既對白聽了都好入心，聽了好感動。我覺得呢套野唔係可以人地可以轉述而感受到的，所以我一路都不停的叫人快d去睇！不過可惜呢排真係好唔得閒，一路都冇響呢度講過！算啦，有心唔拍遲！haha！！

另一樣好可惜既係成個香港竟然係得3間院上...喂，我喊到仆街呀！睇完我足足喊左成個字先平伏返！唔係講玩笑的呢套野！認真d講，我睇唔到有邊個冇喊到，離開果陣，個個都係用紙巾印印下的走。其實有時睇戲，真係唔係一d好大製作先好好睇既！好似呢類窩心的小品，可能更好睇，亦一定更襟睇！miss左的，買vcd啦！

神與女人

2008-02-27T00:28:00.011+08:00

2月14日，我地的第三個情人節
2月20日，去馬交見心中之神；
2月21日，同女友慶祝佢又大一歲......

咁講好悶呢？係啦！不如睇相啦！

情人節+女友牛一(要用facebook睇喎！)

情人節那特別的花，加上生日那對鑽石耳環同洲際酒店的buffet dinner，妳說很貴，但妳開心就已經乜都值得了！其實妳買的銀包同神的波衫夠好貴啦！不過我就覺得係我應得的！哈哈！我好鐘意！兩份都係！

不過講返果個buffet，其實真的有點失望，特別係我本身最想食的生蠔，可以講得上係難食！最好味的係果個鐵板燒牛柳粒！入口鬆軟，肉汁亦緊緊鎖住響肉粒入面！你一咬落去先至必出黎！Wow!! 講到我又想食了！而甜品亦好多選擇，亦很好味！最好味的可算係那個夏威夷榛子雪糕，入口即溶係Minimum requirement，果隻淡淡的雲呢那味入口並不會好震撼，但卻有一種慢慢湧出黎的感覺，而種感覺亦留了好耐！正呀！

當然最重要都係佢覺得開心吧！

與神見面！(都係要用facebook睇喎！)

因為曼聯要在澳門開設旗艦店，所以我心中的四位神級球員之一的蘇斯克查都去了主持開幕！又因為曼聯網響星馬泰省港澳油尖旺的曼聯fans群體入面都係領導者(吹大少少一定有)，所以果面都分左幾十張Free的來回船飛畀我地，雖然有關方面一直都畀唔到好好的配合我地，但見到神就已經好開心！

只要買夠$300就可以拎神的簽名，我當然會買啦！排隊的時候，我畀一個老外訪問，大慨都有分半鐘，而對住鏡頭同咪，我都可以十分鎮定的答晒！我d英文響呢幾個月真係進步左好多！多謝Jack Sir！排左十五分鐘倒，Ole開始同我地簽名了！而等緊既時候，吉祥物Fred一路都同d排隊的人影相，等的時候都唔會太悶！等夕多五分鐘左右，到我了！我拎了印左Ole個名同number的上年曼聯歐聯主場波衫畀佢簽，以下係我地的對話：

佢：Hello, sign on here?(指著佢想簽的地方)
我：Um...No... Could you mind sign on here?(我指住個number)
佢：Sign on the number?
我：Yup! Could you mind take a photo with me?
佢：Sure!

之後二話不說就望住鏡頭，但大鑊既係，佢唔知邊部先係我的相機！！結果佢望左其他人的相機，拍左好幾幅都係貌合神離咁！不過拎到簽名同合照，已經好開心了！

值得一講的係，Ole同你講野係真係會望住你的，亦對人好有耐性！其他所謂的球星，學野啦！

多謝Jim Sir！你給我的總是驚喜！

2008-02-01T12:56:00.005+08:00

你可以想像到這樣的一個人去誘惑我嗎？

響31號考完law之後，我地即刻就飛去灣仔的演藝中心睇「萬千師奶賀台慶」。如果之前的男人之虎係講傳媒的問題；萬世歌王係講自由同選擇，咁今次就係兩者的combination。

「萬千師奶賀台慶」係講而家絕大部份香港人，因為畀無線電視不停的薰陶下，變左都係師奶！你又會講話︰車！有咩可能全個香港都係師奶﹖做師奶起碼要結左婚先啦，又要係女人先做到，咁又何來成個香港都係師奶﹖

Jim Sir話你知唔係的！你諗諗何謂師奶呢﹖師奶對屋企其實係好野黎的，佢地對屋企人盡心盡力，默默耕耘！但佢對卻對世界發生的事一d都唔理！佢地唔想亦唔打算去知道呢個世界的新事，世界不停的變或許對佢地好冇安全感！對新事物不能適應而驚慌，於是佢地就匿響一個佢地覺得安全的地方，但原來佢地可能只係仲係五十年前的水平，可悲的一路毫無進步，更可悲的係大部份人亦唔打算要求有進步咁生活落去！由於新的世界令佢地不安，佢地身邊的人如果做呢個世代應該做的事的時候，佢地會用返自己過時的一套黎指指點點。呢d就係師奶的特性，如果你係咁既人的話，話知你係男人，話知你未結婚！你係師奶！！

但點解可以成個香港既人都咁師奶？Jim Sir響呢次的Show指出，係自稱「屬於香港人的電台」無線電視的錯！1967年無線電視開設之初，一直都被認為係社會的先鋒，所有時代最新的事，你可以在無記睇到，呢個係值得去appreciate的！就算係好似我呢個年紀，係80年代中的產品，你都可以不時睇80年代初的「網中人」阿發哥同DoDo姐激咀30秒（講真係咪網中人我唔肯定，但一定就有呢幕！）！當時社會已經好前衛，無記當年仲係帶領潮流，但今時今日？無記的劇集，就好似只係一篤不停屙完再食，食完再屙，然後再食返的食一樣，不單係一兜同一樣的物料，而且係愈黎愈臭、愈黎愈爛！

好似我咁，做左差唔多22年人，我記得我識性以後，無記就係不停做重覆又重覆的劇集！90年代初的大時代，到90年代中的天地男兒，再到千禧時代的創世紀，之後近年的酒店風雲，然後就係最近的溏心風暴……呢類爭家產、爭女片，每年無記起碼一部，每年係演員同劇名唔到，故事劇情卻套套一樣，就係宣傳的Slogan都係一樣！！！「劇力萬鈞」、「扣人心弘」、「全城話題」云云… 你聽過幾次？

可憐的係香港人真係唔會厭！你兜友鍾意睇嗎？我唯有繼續做了！我覺得無記的責任無Jim Sir所講的咁大，佢地只係一間牟利的機構，的而且確冇任何責任去提高市民的知識水平！所謂有咁既需求，先有咁既供給！所以我覺得責任就係一班香港人度！

我好記得之前兩年倒，有一套叫棟篤神探的劇集，劇中黃子華係一個好有偵探頭腦，卻十分孱弱的CID。最後一集講子華要同蔡少芬結婚，去影婚紗相，影緊的時候子華見到有個賊，然後出去追個賊，可惜最後體力不繼，追到哮喘發作，最後都香左。之後就好多人投訴！其實真係好戇膠，人地套劇合情合理，可唔可以唔好次次都大團圓結局？咁都有得好投訴！？又記得當年無記買左BBC一套講述人類身體的紀錄片，叫人體漫遊，好多赤裸的鏡頭，但全部都係有意思的！不過同樣又好多人投訴！喂，唔係咁民塞下嘛！！

講返套劇，其實呢套比男人之虎、萬世歌王的悶！不過個劇的意思同共鳴卻比前兩套強！因為呢個正正就係切實的講你、我、他，人人有份！睇完的震撼，其實真係好大下！

值得一提的係，我今次坐前排的第二行的最邊果個位！就如男人之虎的劇情一樣，Jim Sir會揀個觀眾黎開玩笑，而今次係我。佢著住一套一件頭的泳衣黎誘惑我，哈哈！完左個劇之後，佢就送左一件Tee畀我，呢個可算係劇團的小傳統！多謝你先啦Jim Sir！你給我的真係好鍾意，不論套劇同件Tee！

心不在焉

2008-01-22T19:55:00.000+08:00

已經考左兩科了，仍然都係入唔到局...

考左的英文考得好好，尤其係份作文！我癲到用「PEST」去分析時下的情侶應唔應該生BB！我覺得應該係我呢世仔最好的一篇英文！不過「射o者o者market」(Strategy Marketing) 明明識晒的，卻做錯了唔少...

今年響第一個sem參加了好多的比賽，個人係好有衝勁，而我亦好enjoy！因為我係好鐘意同人鬥的！所以我仇個sem不停的參加比賽！而每次比賽你亦一定袋到d野走。今年我就學到唔太在意自己贏輸的事，當然，贏到係最好！但只要pay the best 同 enjoy the game 就已經好夠了。好彩，so far 都好enjoy。

其實唔只係enjoy，而係不能自拔！呢幾個月已經為3月的logitic比賽而興奮，但眼前的考試卻係心不在焉...點算！？

Anyway，3支火箭(3科A)目標仍然未玩完，捱埋呢個星期啦蘇剿！

過癮的一年

2007-12-31T11:15:00.000+08:00

未死得未死得，哈哈

無啦啦又到左2007年的最後一日了，講真，今年真係過得好快！過得好過癮！一年內有低谷有高峰，呢種感覺，係非常過癮！

2007年，我21歲，21呢個數字，對我黎講意義好重大！因為呢個係我波衫number！係千挑萬揀的一個number！所以我一直都對呢年滿懷期望！

不過點知出一閘就脫左腳：返得太少學，考唔到year2第一個sem的兩科試，到第二個sem仍然係咁，考唔到三科，要辛苦的留返響year3讀！年初同自己女人關係都係好一般，甚至有分手的危機！足球比賽方面，孱仔出局出得離奇，大熱要首圈出局！銀包又唔見左，辛苦玩返黎的馬仔機戰績冇晒...

響上半年的一切一切，好似好負面！下半年開始痛定思痛，重新出發！同女友關係愈黎愈好我覺得最令我開心！又開始搞一下小生意咁！而學業上方面都發展得好好，Cherry的入組，加上原有的阿彤同屎提，個陣容真係一時間強左好多！結果我地都拎左兩個EMax大獎！而我自己另外又拎到兩個ACCA的獎！而足球方面，港專杯最後都只係拎到第二，但我覺得冇悔了！十一月響三個唔同比賽入面，連拎五個獎，可以話係高峰！當然EMax比賽贏左之後，有一間鋪係令人頭痕，問題到依家都好似仲係沒完沒了，不過有得見一下報，而佢真係訪問你之後見，而唔係為左報導其他野而順便報導你，呢種感覺係過癮的，呵！

以前我的日記，總喜歡做大事回顧，回顧返過去一年做過d乜。但今年我覺得反而多謝下人好似更有需要。

首先係我女人啦，你為左我真係改左好多好多！抵錫左好多！人地話成功的男人背後緊有一個勁女人！我未成功，但你已經係勁女人了！你生活上幫我做好多野，小生意又係幫我好多好多，就連我d比賽你都不停幫！我唔想只講一句多謝，因為我覺得講到我啞都係唔夠的！

之後我後老豆，你不停的support令我好放膽的去做所有野！不過一向都的了，所以唔多講啦！

都極度的多謝Cheris，不停的畀機會我！係你話我聽我真係得的！多謝，我在你身上學到好多，多謝你！

仲有阿彤，我知同我做partner係痛苦的，但你可以頂足咁耐！勁！你永遠可以令我諗完的野實現！（唔該，我岩岩諗到要隨意門！）

都多謝Cherry，你入左組之後，我覺得成組個衝擊真係好大，大得黎又好正面！你令每一件事都做得好有效率！你入左黎，有時我覺得我係可有可無咁！因為你太勁！

屎提，你呢件口水怪，同你做野有時真係想打爆你個咀，不過我覺得你今年肯多左做讓步，呢樣我好感謝的！你做野真係好得！keep住！

最後係一班孱仔，尤其係粉果同子健！我踢得好開心，尤其同你兩個夾，我覺得好鬼過癮，竟然大家的長係可以完全彌補到大家的短！！

多謝好多唔好的經歷，我今年大個仔左，哈哈！預祝各位Happy New Year，新一年更過癮！

心死！

2007-12-22T01:39:00.000+08:00

心死，唔係話我同我女人感情變淡！而係一d玩拆字的遊戲！呢一掛又開始了！「心」「亡」者，忙也。好多無窮無盡的事要做。其實好多野想同大家分享，但真係上網的時間也少了！希望響新年前可以同大家講講！

「神探」、「魔間傳奇」、「破事兒」，好正！等我！我想講！

上報...

2007-12-07T09:46:00.000+08:00

2007年12月4日，我地4個贏左EMax比賽的，接受了文匯報同大公報做訪問，老實講，咁大個人都未睇過呢兩份報紙，但唔緊要，份報紙出了，我都要作出我的第一次！

呢份係文匯報：

呢份就係大公報：
冇相之餘，又好短的篇幅...

但奇怪在，兩份冇黎採訪的報紙亦居然有登！首先係只係訪問了屎提，冇出我地三個名的星島：

但我覺得明報更加之過份...

全程都冇我地的名！我地四個就叫「港專四子」！？頂！我唔係姓港，又唔係叫專四子！你當我日本人呀？

不過點都好，黎緊應該仲有訪問的，到時再睇下點！

話時話，但呢個比賽完左，冇左工作個人真係好down...仍然好想要多d挑戰！我好鍾意呢種感覺！我要挑戰！呢個星期好頹呀！

一則呼籲

2007-11-29T10:43:00.000+08:00

http://www.donotgamble.tv/polling/donotgamble07_polling_api_o.php#s

投06，做睹鬼！

我老死Zero做的，請幫佢！

暫告段落

2007-11-28T10:24:00.000+08:00

十一月的所有回報！

黎到呢個十一月就完的時候，我終於叫有得抖下！因為參加的四個比賽都完滿的結束了！4As、ACCA、港專杯、EMax，由九月尾我都仲返緊倉的時候，就開始了4As的準備工作！不過呢個大家都諗唔到什麼好橋，所以好自然，會無聲無色的落弟了(你選緊科舉呀？)！

到十月返學，聽到ACCA同EMax有得報名，本身都唔想玩的了，但大家商量過後又想玩下咁，於是就兩樣都玩，連帶準備左有兩年的港專杯足球賽，我知忙係走唔甩的事了！果然，呢兩個月訓得夠的日數肯定唔會多過三日！唔夠訓一日，訓三日都補唔返，我根本成兩個月都訓唔到一覺好的！終日就係與Red Bull聯群結隊！

ACCA兩星期前贏唔到(不過其實我當贏左的了，始終入到決賽都係好難)，呢兩個星期就係準備25號的EMax比賽！24號的港專杯比賽，根本就未練過一場好的波，我同最新入隊的隊員都未夾過，又話要比賽了！加上一星期前，我係有一點傷，拉親的係大髀連住何B仔的果條，學名叫鼠蹊筋。自己以前拉傷過好多次鼠蹊，呢個對平時生活係冇問題的，只係一運動就奶野，你一跑，佢就會痛！而且佢幾時好你係估唔到！我曾經試過一傷就係四個月，四個月入面只有不停的守龍門，因為跑只會令自己捉蟲，但亦試過2日後又就冇事。所以我都唔睇好自己24可以上陣，亦唔睇好孱仔可以入到決賽。

24號當日，第一場本身係2點鐘有一場的，係分組賽對住組的魚腩，只要贏2球就可以好肯定的出線了！不過點知隊魚腩退出左，當我地贏3:0，即刻就出線了，去到四強的比賽！四強對住我地Year 1時炒佢6:2的Own Goal的進化版，即係New Own Goal。其實我地好早就已經打開記錄了！但好快又畀人入返！之後「咁」住黎打，都係入唔到，都怪我地係防守隊伍，入波的辦法真係唔多，到最後都係要互射九碼。孱仔第一球派我出去，但我射高左...講真，我射之前信心真係好大，冇諗過會Miss！不過好彩Bear最後都撲到，最後都贏左，入左決賽！

決賽就對住攻力最強，第一場贏左我的係香港69。呢一場可以講係最利的矛對最硬的盾，我地作為盾隊，當然係主守！而因為今日隊長粉果的狀態唔好，佢決定唔正選上場。咁呢一場港專生涯最後一場比賽就由我做隊長！我覺得幾有意思的係，孱仔第一場係我做隊長，而港專最後一場又係我做，幾過癮！做隊長我覺得意義在於負責擲毫之外，就係要Motivate一班隊友！而我一直踢波都要做呢一樣，我鍾意提醒各位有咩需要去做，咁樣唔止幫助到防守的集中力，仲可以激勵起各位的意志，所以我其實都幾鍾意在場內大叫大嚷！

今日的兩場，我都冇任何Mistake，尤其係尾場，我真係覺得自己的表現好好好好，一球都冇漏過，一次foul都冇食過，好好！而最後我地都係成功迫和到對方！又要射九碼，第一球又係派我射，又Miss左，之後Teddy都Miss左！最後我地再一次拎亞軍。其實正式輸果陣，真係幾想喊，始終我地夾左咁耐，拎唔到冠軍始終都係個心銀住銀住...不過其實我覺得成隊的表演真係好好好好！

我要多謝三年來的所有孱仔兵團的成員！
龍門：Bear、Eric
後衛：子健、粉果、Matthew、薜記、肥凱、拉屎、仲有一個記得名，哈哈
中場：Teddy、陳柏、家豪B
前鋒：阿龍、肥龍、Evan

Especially thanks to 子健同粉果，同你兩個夾，我真係覺得好開心，三個人唔同的特性可以互補長短，好完美的防線！

踢完港專杯，就要返屋企，準備25號的比賽，返到去都成8點了，得返屎提仲響我屋企，而阿彤就怕了我的狗，Cherry就返左去了。我返到去之後食個飯、沖個涼，再開始做野，做呀做呀做，又睇下曼聯咁，做到三點幾我就做晒d野，但屎提就仲未做完！佢唯有繼續，咁我就唯有訓先！

第二朝我一早九點就起身，但打極畀屎提都係冇人聽！佢book左車10點黎，我又想改時間改做10點半咁，唯有自己打電話去貨van公司果度改，好彩改到！而我地擾擾攘攘，都十一點半到達目的地，為我地呢個EMax比賽努力一番！

去到我地就開始set場，而我地的主題叫「出氣樂園」，係一個地方，畀人地去發洩日常的壓力。入到出氣樂園之後，客人會變身成為一個出氣戰士，以打到出氣王國為目標。而老豆今次幫左我好多好多！因為我呢度所有紙皮造的關卡或者紙盒，全部都係佢提供的！Look It!

出氣巨人，用左老豆72個中size箱，34個小size箱，1個特巨size箱，總值$7xx，但因為老豆關係，一蚊都唔駛。不過當然我未計A4紙錢啦！

出氣碰碰車，車場關卡，同樣由老豆贊助！同樣叫佢d馬運貨黎屯門時運埋過黎，實行公器私用，一毫子運費都冇畀過！不過老豆就用左$3xx的錢，請班大陸人，即係幫佢做果組人食飯。據老豆的線報，如果街客要訂呢個車場，要$8,xxx，不過我唔駛！因為就係父子勾結！

出氣城堡，同樣老豆供應！原價$5,xxx！不過我都係冇畀過錢！

而我，就係負責「出氣碰碰車」的一關，就係要由頂渣架車落黎，撞倒晒d野！果d小朋友愛死呢關！好多小朋友都有好好的禮貌，不過當然有一些冇！由一點到七點，擺檔呢六個鐘，當你面對唔同人，你會完全的領會到「一樣米養百九億樣人」呢個道理，你都會睇到呢個世代，d o靚仔根本已被縱慣，可以個仔喝返個老母而老母怕；有d 老母又做唔好榜樣，自己玩唔掂就話我個game「一d都唔好玩」，搞到個仔都冇禮貌講同一樣野（縱使個仔本身係玩得好開心）；有d老豆老母又過火的嚴苛，個仔玩得唔好都要鬧（呢個真係冇陰公）！有d就典型香港人性格，細細個就同我講價，話「投左我四票，一陣拎多四粒糖食啦！」（我個關卡贏左有糖送的），我一句就話「咁你拎返4張走啦！我地呢度最多投一張的！」其實佢地有冇諗過害左自己的下一代？唔識教就咪生啦！

不過當然，都有一d好好既小朋友，有一個好深刻的，佢不停想破自己記錄，於是玩左六、七次，每次都會幫我擺好要set返的果d野去！然後就全心全意的刷新自己的記錄！玩得咁認真，真係好值得人鍾意，因為我自己都係咁！哈哈！

企左成日，掛住做野冇食過野！到五點幾，人少d先去搵d野食！不過個商場d野食太貴，最後都係要去些粉買個叮飯食！

到七點，領獎前，阿葛又黎過我地個檔口同我地影合照，我知創業大獎，應該走唔甩係我地的了！

當終於到頒獎的時刻了！阿葛係其中一個評判，佢開始講我地d檔位，但個個都捧到高高再踩，唯獨係我地冇提及過！果然，創業大獎係我地「出氣樂園」拎到！但最估唔到係最後係我地拎埋最具創意大獎！即係話兩個最勁的我地都拎左！兩個獎夾埋有$14,000現金、一間免半年租的鋪頭同一間免兩個月租的鋪頭，但所有雜項都係我地畀，所以呢個獎都令人幾頭赤！仲有就係總值$57,000的獎品，除左禮券之外，就係呢一大堆要黎都唔知做乜的獎品：

而同樣開心的係，阿King同粉果都係最優秀大獎！即係話我地三隊港專，包辦左頭三甲！Good Show! 同大家又分享一下拎獎的相先！

港專包辦晒最強的獎項，就連Kong U的都企埋一邊！

多謝Ami同Cheris幫我地三組要贏呢個獎！Thanks a lot again!

最後都要多謝我女友，幫我地計好盤數，又幫我地砌好機械人，又幫我地買膠紙，又幫我地影vidio，又幫我地...（下刪26億3千萬字）

又要多謝我老豆，幫我搞掂好多技術上的問題，甚至幫我整左好多野！又黎支持我！（不過有邊刻佢唔係？）

仲有再次多謝Ami同Cheris，不停的幫我的！Thanks a lot again again again!

最後當然要多謝屎提分、Cherry、阿彤，呢組係Perfect的！以後大家拍住上，拎更多的獎！掂呀！

最最後要多謝到過場捧場的親朋戚友！多謝！

I am the special one!

2007-11-24T10:15:00.000+08:00

麥卡倫終於終於落左台，不過英格蘭就出了局！我想摩連奴做英軍領隊，唔止鍾意佢的才能，更鍾意係佢果種擋唔住的自信！佢的「I am the Europe Champion, I think I am the special one!」一直都係我好愛的金句！

電影方面，自從Pursuit of happyness 之後，我已愛上了Will Smith！今次呢套戲，一定會令我更愛佢！因為佢會話你知，Neville唔止係Special one，而係世界的The last hope！呵！我打從心底的鍾意佢呢個角色，縱使套戲係未上！

http://iamlegend.warnerbros.com/

可能大家仍然睇到一頭煙，唔緊要，有故事簡介！

在《魔間傳奇》這部科幻驚慄鉅片中，韋史密夫(Will Smith)飾演一個傑出科學家羅拔紐維爾(Robert Neville)，但是他對於一種擴散至整個地球、無所不摧、無藥可治的人為病毒朿手無策。由於某種原因紐維爾身懷對抗這種病毒的免疫力，因此他成為了紐約市，甚或至地球上唯一的僅存者。在這漫長的三年期間，紐維爾不斷發出電波訊息，希望能尋找及聯擊到其他倖存的人類，可是一直得不到回應。但是，他絕不孤獨----受病毒感染的變種人類一直匿藏於黑暗世界中，窺視著紐維爾的一舉一動，靜待他稍一鬆懈的機會，肆機將他徹底殲滅。紐維爾已成為人類的最後及唯一希望，他必須以他具有免疫力的血液，去破解將令人類滅絕的病毒。在千鈞一髮之間，在變種人環伺之下，他能否完成任務？

真係好勁！Wow! 我話Will Smith，Also me! 哈哈！

我認輸

2007-11-21T11:09:00.000+08:00

尋晚放學塞車塞到仆街，用左足足兩個鐘先返到屋企！累嗎？這個當然！但我隔離條友真係好臭好臭，我同佢一齊坐真係終極的頂唔順！

其實呢排病了，成日都放屁！我去到邊就放到邊！尤其響車箱入面，塞住耳仔聽住歌咁放，先係最高的享受！因為你耳住都聽唔到你自己的屁有幾響了，唔駛就住黎放，響括約肌放鬆下一個一個的放出黎，就算幾響都係人地的事！所以呢幾天雖然病了，但週圍放屁其實令我幾開心！

不過我尋日終於遇到對手！我d屁都只能一個一個的放，攻勢都總叫斷斷續續丫！但尋日坐我隔離條友，佢成身香料味，濃到呢...唔識講，總之好濁好濁！而佢同時又食薄荷糖！天呀，同時又極濁同極清的味走入我的鼻！我完全係鼻無可避！

雖然佢的攻力係咁勁，但我都唔係浪得虛名！我呢期d屁彈都唔係講玩笑，要黎就黎，幾多都有！砵...砵...砵..........正當我諗住放多幾個，中和返佢d味的時候，我竟然冇貨了！oh!呢d咪就叫「用時方恨少」囉！

我輸左，返到屋企已經呆左，焗到我呆左...

敬請支持！

2007-11-15T10:50:00.000+08:00

EMax係一個響九龍灣的商場，響工業區的另個商場，可以都係隔涉左一點兒，所以人唔多！個商場有見及此，搞左一個比賽諗住谷人流。比賽就係要我地諗，響佢果度開一間1000呎的鋪頭，你要有賺之餘，而又可以因為你呢間鋪令到整個商場多左人流！而個比賽就有公開組同學生組。我地當然就係參加學生組啦。據講我地個組有60組，我地港專有3組參加，3隊都入晒best 5！不過可惜有一隊HKU的阻住晒，令我地學校唔可以壟斷左Best 3，只有我地組同阿King的一組入左總決賽！

而總決賽就響返個商場搞，個商場就會畀個地方我地做個攤位，到時我地就會介紹自己的產品咁樣。而現場觀眾除左可以試玩之外，仲可以即場投票，當然如果當局冇改變d咩的話！比賽的詳情如下：

地點：九龍灣國際展貿中心 (EMax)
九龍灣地鐵站有接駁巴免費接送(唔好上錯Maga Box的車呀！)

11/25(Sun)

1-7pm : Roadshow time - 展覽時間，向公眾介紹產品、服務

6pm-7pm : 評分時間，評判會向參賽者詢問產品或服務詳情、評分

7:15pm-8pm - 頒獎典禮

而我地的產品名叫「出氣樂園」，一個類似冒險樂園，但係係畀人用黎發洩的一個樂園！你黎就知有乜野好玩！

希望各位能夠抽空出席！你投阿King定投我地唔緊要，但真係希望各位老友黎投寶貴的一票！

The best is yet to come!

2007-11-14T12:10:00.000+08:00

冥冥中自有主宰

星期六，我諗過左我一生人入面，最多比賽的一日！

一朝早，六點幾我地就出左門口，去到會展參加ACCA的總決賽，我地係160隊中的1 of the best 6，去到draw lot，draw到第六隊出場，即係最後一隊。我心諗，「掂啦呢次，注定我地係主角，壓軸出場喎！」事實上都諗唔到有什麼會衰的理由。不過最後我衰了！做左咁多次MC，上台表演過咁多次，都冇話試過發台瘟，偏偏咁重要的決賽竟然發了！可能自己口窒窒，影響埋其他的隊員。到最後Q&A，Listening差的問題完全表露無遺！完全唔知人地問乜，又點去答呢？最後當然衰左，拎唔到頭三名，只得四至六名中的一席位。不過我堅信我地係第四位，因為另外兩隊四至六名，都拎唔到一d獎項，而我地就拎到一個Best Budgeting的獎，事實上都應該有99%係我女友做出黎，所以呢個獎就歸左佢。最後就有兩千蚊，四個人分，我同女友兩個夾埋就一千！

自己非常唔滿意自己的表演，但都過去了，好多謝Cheris同Ami的用心教導、幫助同安慰！失望左一會兒，好快就收拾左心情，去樂富參加港專足球比賽。今年孱仔編左入死亡之組，三隊入面，有兩隊都強得很。而自己真係好累好累，講上黎由開學都未訓過一覺好的，呢個兩星期仲要踩左四晚通頂，比賽前五日都只係訓左23個鐘。所以落到球場，自己都唔知自己做乜咁，夢遊球場，最後第一場都未踢完就因傷被換出，響我錯失左一個黃金機會下，孱仔都係入唔到波，最後輸一蛋。

被換出時心情好差，其實明知自己身體已經撐唔住，但心又唔想放棄，被換時不停鬧自己場邊的隊友：「換我出黎就乜x野？我仲x踢得架喎！」到一個鐘後，第二場要出場就正式唔得了，拉親條筋，根本一跑就痛！真係黐筋！不過最後幾分鐘都係有得出場，Bear守龍時整傷左隻手，我都要臨時拉夫出場打龍門。最後只後接左一球冇力的射門，當然的冇失過波！但之前Bear有失，所以都係贏3-1，一贏一輸，不過已經搞掂左最難搞的兩個對手，所以晉級的機會高唱入雲了！有時好多野都覺得係整定，如果我唔傷，我第二場就會出，咁但係出我又會少左攻力！分分鐘落後一球下又追唔返！

其實由中五開始，都經歷好多唔如意的事，但你又諗唔到，到最後又會幫到你的！你以為好的事，但原來又會害左你的！中五好輕易的升到中六，你以為好野，其實係衰野，中六中七係我做左咁多年人，最懶最冇進步的兩年。不過中七衰又反而激發我的鬥志。

到讀港專，交晒學費，過兩日嶺南先打黎話收到讀h-dip，一間大學，一間野雞大專，而且大學仲係收我讀傳理，仲要做記者其實一向係我志願(中學階段)；但我響野雞大專，搵到真正岩我的科目、搵到我鍾意的人、搵到我想走的路、搵到讀英文進步的竅門，搵到一個屬於我自己的舞台。到上年，又成日懶，唔返學，最後冇得考試要retake，但今年的英文阿Sir又係正野，教得好好！今年我都發奮了！結果加埋有一班好同學，令我又可以入到兩項比賽的決賽！

有時有好多野，都覺得冥冥中係有主宰，總覺得世界係有一種規則，就係可能有任何事響你身上，但到最後對你係有益的，如果你可以樂觀的默默忍受。有運冇運反而已經係一樣虛渺的事。因為根本好難去界定一件壞事，究竟係冇運而發生，定係因為你好彩，而個天畀考驗你去領悟一d事令之後更好呢？真係好難知！不過我就知怨天怨地就仆硬街既，即然一d野係你點到要去face的，咁呻下冇問題，但成日呻又有乜謂？

今日真係累到頂唔順了，諗起要上law對住果個阿sir，都決定走堂，終於有時間畀我打呢一篇blog了！聽日要上廣州入貨，後日就係龍足球日同鋤dee日，大後日就要同孱仔練波，下星期就全力為emax衝刺！下次打blog應該就係玩完emax的了！

半天假？半天價！

2007-10-27T21:10:00.000+08:00

睇黎要有咁多隻手先掂！

今年響學期初，期待已久的比賽，居然一黎黎足三個，我就十下十下，一口氣就參加晒佢！

先有ACCA，ACCA即"the Association of Chartered Certified Accountants"，其實係一個全球性會計師公會黎的，我女友都有畀過成千蚊入會，又畀過成雞野上佢地的堂。比賽係畀四隊band同四個香港場館你揀，然後你幫佢度條橋出黎，搞返一場有賺的band show。本身真的冇打算玩的，女友好想玩，自己班入面的拍檔又唔想玩，其實自己都唔想玩的本身，但Miss話「交份PowerPoint去就得架啦！好易做的！」就係呢句，加上都想了結女友呢個願望，響10月5日報名的deadline都仲未報名，好彩ACCA果邊d人8號都仲肯收Form。結果響交PowerPoint的deadline前兩晚開始做，前一晚踩夜車到三點幾，終於頂唔順，要第二日搭巴士時，一路搭一路拎住部notebook去做，然後趕五點的deadline，好彩三點幾已經搞掂，再畀Cheris睇，而冇乜大問題，那是10月11日的事。

之後趕的係4As的比賽。4As即係"The Association of Accredited Advertising Agents of Hong Kong"的簡稱，係香港廣告界唯一的廣告商會。本身自己想做Ad呢行，更想借呢個機會出位！！所以就老早的報左名了！而今次的比賽題目，係"YouTube"！可以用做何形式去promote。老實講，呢個比賽，我諗到的橋其本上唔少過廿條！（不過都老實講，起碼十五條係廢橋！）已經諗左差唔多成個月，其實都冇話諗到一個好絕的橋。最後響17日deadline前的一晚，上左屎提的公司度由7點幾做到3點幾！過程其實好過癮，可惜我唔識PhotoShop，平日用開的PhotoImpact又畀屎提話係垃圾，於是的圖都係畀晒佢搞算，而橋又係佢出，做佢又做左九成，最後都係交了，不過又係好普通，可能真係趕得滯！那是10月15日晚16日朝的事。

最後就係EMax，呢個係九龍灣一個冇人去的商場，聞說個商場七點鐘之後就收晒鋪的了！所以個商場就搞了個比賽，要我地做份Proposal出黎，係做一間響果度開鋪頭既計劃，你點響度賺同點帶人黎個商場咁！而贏左的一組有五雞野現金獎，同埋有一間鋪位！初初聽到呢樣真係覺得好好，贏左有間鋪喎話晒都！不過睇真d，原來係搵笨的，話就話免半年租，但要簽足一年約，最大問題頭半年除左租金之外就乜都唔包，點做？所以最理想就拎到第二名，有兩雞野又唔駛要間鋪丫！冠軍真係可能贏左返黎就破產！呢份野26日Deadline，我地都諗左半個月有多，但真正做，都係Deadline前的一晚，今次到我擔旗，做左大部份，通宵的響屎提間公司做，八點做到第二朝六點，那是10月25日晚26日朝的事！

今日已經27日，忙完第三個比賽，又要玩返第一個！ACCA比賽我地入左決賽！唔只係Best20，而係best6！Wow!記得上星期四收到通知，話我地係Best6同有得去決賽，真係超級興奮！！仲記得當時七點三、四倒，ACCA打黎話我地入到決賽，我即時響地鐵月台入面跳下跳下，另一方面就振臂而不歡呼，因為ACCA果個人就仲未掛線！不過我已經聽唔到了，因為我真係好開心！其實成個月台的人都望住我，哈哈哈！（咁開心係因為以為有大概六百組參加，但後尾先知，其實得百六隊，感覺真係差左d！）那是10月18日的事！呢個星期個腦都不停係EMax同ACCA比賽的事，好累了！

5號就要交份Proposal，但我地打算1號前交畀Cheris睇睇先，等佢改下有乜問題，所以黎緊的一個星期又係密密手，冇得停！但今日真係做唔到野，尋晚響觀塘訓，因為女友七點就要去將軍澳做part time job，應承佢送佢返工，但其實真係好累！前日冇訓過，趕完份proposal就返學，之後尋晚都成點先訓，今朝又要五點九起身，送女友返工，送完佢返工又要趕返去屯門踢波，踢完波發覺唔係好夠錢，就自己煮飯，四點幾食個飯之後真係昏迷了！一路訓到九點幾，又起身煮飯，煮完就睇曼聯的第八場連勝！

呢半天假何止係半天假咁簡單！我諗真係要有買半個天既價錢先買到！就係珍貴成咁！

但其實我個腦都冇放過假，仲係咁諗ACCA的野，仲有就係Cheris講我唔岩做Ad的，但就係做Marketing人才的事，其實都幾大震撼！自己就鍾意做Ad多d，但的確做Marketing發揮到我的長處多d！呢個問題，可能要困擾到我畢業之後....

165.8!!!

2007-10-14T00:45:00.000+08:00

未有耐，未有耐！

165.8，呢個數字，冇錯就係小弟的最新磅數！

呢個磅數，應該係我呢生人最高的一次，之前一次上到160，原來已經係2年前。無獨有偶，都係岩岩做完倉的一段時間。做倉其實真係幾辛苦，冇冷氣，又不停咁搬呀搬呀搬，所以都係不停咁流汗流汗流汗！理應就會瘦，但兩次做都反而肥，深究返個原因，可能就係太累，所以才食得更多，吸收更多！但上次都係160，今次足足又多左5磅，我諗朝朝飲奶應該係當中的主因了！

上到呢個磅數，衫同褲都緊了，望落個波都大左唔少，不過同時肚腩都大大個！而對於踢波黎講，呢個磅數都幫我搵返感覺，搵返落場的感覺！

回想我巔峰時期都應該係兩年半前，讀完中七，等考A-Level果陣！當年溫書仲少過Cert. level果陣，就係走左去踢波了！當時同龜頭都真係黐的，神奇的夾，於是踢到曉飛咁，果陣就算冇龜頭，我單拖上陣都一樣掂，因為果陣我唔錫身，而且位置感好好，加上有返咁上下身位，踢七人場基本先「擔」身位後再踢波都唔係問題，身位加位置感就發展左一套好霸道的踢法出黎，當時真係好好的！

兩年半前我體重由150(Top Fit)，到兩年前做倉的肥仔160磅，再到讀左港專後，成日唔夠訓急降到127磅(最瘦)，一個骨重的人得返咁輕的磅數，唔好講話擔人位，你想頂住人地都冇可能！於是就諗住打全路數型啦，即係下下都捉人路先，唔用身位，只係靠估！當然死硬！但自己知死想返轉頭已經唔得，縱使磅數可以維持響最fit的150磅左右，但就係冇左個感覺，兩年來未踢過好波，真係一場都冇！

但今日，上到165，就開始搵返個感覺！霸道的踢法找回了，但係位置感仍差！放鬆d啦胡九，你的狀態會好快返黎！

工作月

2007-10-08T00:18:00.000+08:00

參加左3個公開的比賽，目標唔係贏，但都想人注意自己d作品！

我知今日工作的忙會令以後更忙，那是豐收的忙！

去吧！胡九兵團！

胡九你是甚麼人？

2007-10-01T21:07:00.000+08:00

九型人格分析
第三型	成就者、事業型、成就型、實踐型 15%
第七型	快樂主義型、豐富型、活躍型、創造可能者、享樂型 15%
第八型	領袖型、能力型、挑戰者、保護者、權威型 15%
第九型	和平型、和平者、和諧型、維持和諧者 15%
第二型	助人者、全愛型、助人型、成就他人者、博愛型 14%
第五型	智慧型、觀察者、思想型、理性分析者、思考型 9%
第六型	忠誠型、忠誠型、尋找安全者、謹慎型 8%
第四型	藝術型、浪漫者、自我型、憑感覺者 6%
第一型	完美主義者、完美型、改革者、改進型、秩序大使 3%

我的九型人格分析？

所以呢，始始終終都唔覺得網上的心理測驗或者性格測驗準！我自己其實都幾肯定自己係一d乜野人，但做九形人格，答案就永遠的唔同，估唔到今次仲離譜成咁！

我講係離譜的準！

輕取車仔！

2007-09-24T11:59:00.000+08:00

冇雞蛋，冇奄列，老摩走左乜都冇！(圖片：sina.cn)

今年車仔本身踢得已經唔係好，老摩走埋更係雪上加霜！老摩講過，今年車仔傷兵太多，冇晒d靚雞蛋，所以煮唔到靚的奄列！其實最靚的蛋乃係老摩本人，佢走了，車仔自己冇晒靚奄列賣！

雖然老摩已經響離開後的第二日，返去車仔的大本營同班舊將講，希望佢地唔好鬧情緒，做返好一個專業球員的本身，唔好佢走又話要跟佢走咁！但事實上一班主將都係佢心腹，佢走了，車仔班友一定踢唔起！

而今場曼聯雖然仍然有隊長同夏格係負傷中，但代替佢兩位的布朗同卡域克都踢得好好，完全冇問題！而前場的2R+T組合仍首次一齊陣，講波佬話覺得佢地亂，我覺得一d都唔係，佢地做的野可能好相似，但相互的走位已經冇之前幾場塞車的情況，而迪維斯亦開齋了！

今日車仔踢到一pat野咁，可憐的雲達沙只係企足全場，冇乜野好做；前場壓住黎踢，如果唔係施治神勇，車仔食半打蛋都有之！

贏車仔唔係寧舍開心，始終仲係一支讓晒公車馬炮的車仔。開心的係曼聯終於打返起，我地終於第一次入多過一粒了！殺埋阿記同YSB吧！GoGoGo!!!

摩連奴追悼會

2007-09-24T11:42:00.000+08:00

Goodbye! Chelsea boys! (圖片：sina.cn)

摩連奴辭去車仔領隊一職，其實都已可算係舊聞一單，但家下先得閒打一下我的睇法。其實自己好欣賞好所賞老摩，一個咁後生的人，竟然可以帶一隊世界級的班霸，而且仲要係帶得咁成功，一入主球隊就連拎兩年聯賽，帶左三年，每年都有杯拎，三年以黎拎左五隻杯，只係歐聯未拎過，但帶左三年都有兩年入到準決賽，講真老費都唔得，你仲想有得彈？

的確一個咁無得彈的領隊，九唔搭八的被炒了，車仔方面聲稱老摩同球會關係破裂，而且仲嚴重到影響到一班球員，所以先將佢辭退。但明眼人都知又點會係，只係個油王d有錢佬臭脾氣，唔慣畀人食住罷了！

正如老摩話齋：「I'm the European Champion, I think I'm the special one!」

「特別的一個」，祝你有美好的前程，也為愛隊曼聯惋惜失去左一個咁強的對手！

捐血

2007-09-23T22:45:00.001+08:00

多多益善，少少唔拘！

唔經唔覺，原來足足兩年冇試過捐血，上次捐，我記得係兩年前的九月。而捐的原因，到而家都仲記得，係為左一包餅同一杯野飲！因為果期冇錢，而當晚又係當時鍾意的女仔生日，所以決定都係留返d錢出席個飯局！果次真係成日都冇食過野，但又唔想用錢，唯有賣血，回報就係果一包餅同一杯橙汁。

最經典的回憶，應該係中五響學校第一次捐血時，童哥打算捐，但被拒絕了，因為佢唔夠男子捐血榜數底線，即90磅！佢那種無奈的樣，我到今日都仲記得！

而今次又係未食野而去，為的唔係兩包餅，而係想食果間餐廳過十點有半價，唯有用捐血呢個行徑黎攝下時間！不過認真的講，捐血真係趁後生有得捐就捐，功利的睇係一次免費的驗血，當然仲有免費的小食吧！其實要貪就唔係話要貪呢d野，而係真係幫到有需要的人，種善因食善果，尤其係我地呢d O型的，真係好多人都需要！何樂而不為？成日聽電台報數，每人全港捐血的人都係around 800人，但一日需要輸血既人相信唔會差好遠的，無論係咪O型的你，都總有人等緊你！去捐吧！

女友今次趁我捐血時，落左下兩層的波衫鋪買左一件我話鍾意的衫畀我，捐完血就去我落去睇波衫咁，個saleman遞件衫過黎，話：「喂，你既！」

其實今次已經唔係第一次，今年的情人節女友同樣送的都係波衫，用的手法都係同一，都係駛開我去第二度，然後自己落訂，再一齊的上去拎，一樣的手法，一樣的咁甜！講多謝已經唔夠去形容我想表達的果種心情！你令我覺得我真係真係好幸福！^^

小粉果！

2007-09-20T14:01:00.000+08:00

Hello，我係小粉果！(設計對白)


粉果：頂你呀！關我鬼事呀！
(設計對白)

上星期尾，請了三日大假，而星期五就同女友去左旺角剪髮(呢間野超抵！剪電染都係三舊水！)，之後就見到呢個小粉果，似嗎？

呢個小粉果，可能係粉果本人食左返老還童藥，因為佢一見到我，就同我扮到好熟咁，同大粉果都冇咁親果隻仲要係去到！所以極有呢個可能！

佢仲不停的玩我隻狗，即係阿奶B，仲要想餵佢飲檸茶，又餵佢食《兒童週刊》......

拿，有相為證的！！不過奶B又好似幾鍾意小粉果咁，哈哈！

出埃及記

2007-09-15T11:48:00.001+08:00

張家輝其實真係好有料！

尋晚走左去睇《出埃及記》，又一套彭浩翔導演的作品！彭浩翔係我愛的第二號導演，而第一號就係導左《西遊記》、《天下無雙》、《無限復活》的劉鎮偉。而兩者有乜相同？就係一個怪字，再加創意兩個字！

呢套係好彭浩翔的風格，好怪的劇情，但你又會睇得好投入！尋晚睇完覺得好正的一套戲，但返到黎卻係發現，Yahoo!所有人都炳緊呢套片！炳佢悶、炳佢九唔搭八！我覺得有d人先將一套戲定位，然後再去睇，發覺唔係自己本身所諗咁樣，就會炳人！唔知d人對彭浩翔呢三個字，就只會諗到搞笑，因為由《買兇拍人》到《大丈夫》再到《AV》，都係笑片黎！但其實定位錯了，彭先生佢係就係拍幽默，但其實係黑色幽默！呢點，到呢套都冇變！

好多人頂唔順佢慢，我覺得而家d香港人，耐性低得好過份！快餐文化令香港人都過份的急，就連睇戲都要求有不停的感官刺激，只要有即時的東西就可以唔理其他野！而呢套戲，正正就係好慢好慢的交待，各角色、事情點發展，所有野都好細膩的描寫出黎，你Miss左一句，又或者Miss左一幕，就好可能成套戲唔知講到邊了！

但睇黎都市人都唔願意睇戲時投入一點，只會因為自己唔滿意就不停炳人！由我當年睇《常在我心》到今日的《出埃及記》，港產片拍得幾好都好，只要夠慢，真係死硬！

呢套戲個結局好正！好反高潮！

一分鐘漂亮

2007-09-13T11:04:00.000+08:00

作曲：Davy Chan
填詞：黃仲凱
編曲：Davy Chan/Joey Tang/Gary Tong

隊友拼著風雨　踏破了天空
偏偏整晚也沒有　看見你走動
即使這個你　從來未被看中
仍願意坐冷冷凳上　情緒未凍

望了八十九次　就斷氣的鐘
終於聽到教練說　要派你出動
不管這次算　臨危或是看重
餘下寄予你那認同　無意斷送

死守多久的念頭　才能令旁人認購
轟走多少的石頭　尋回草地一畝
流汗你也要趁快地流　謝幕便要走

＊皮球終於撫摸得到你的衝勁
(全場終於呼吸得到你的衝勁)　
　一瞬間的遠征
　讓餘下疾風　給你助興
　無負你最美率性　用你的一生懸命
　留待最尾這分鐘　舉腳做證＊

大戰拼著風雨　劃破了天空
追趕比數教你隊友　氣數已很盡
此刻只有你　仍然是熱烘烘
難道要冥冥之中　由你命中
REPEAT＊

大戰拼盡風雨　掠過了天空
多得這晚你帶著我　看你的夢
即使跑跳碰　傳來陣陣刺痛
沿路也有我一生中　等你大勇

鄭融咁多隻歌，真係最鍾意呢隻！雖然上一隻碟「Honey」已經唔經唔覺的出左1年，但呢隻歌，一路都留響我機入面，而每一次聽，都總有一點興奮，就好似打左一支強心針咁，做乜都好起勁！

我有時做好多野，側邊的人都會笑，但仍然準備好為夢想去衝，係好男人，好man的事！而做一件咁man的事，當中一定有失敗同挫折，但如果有一個女人默默的支持你，就乜都掂了！

食、色，性也！

2007-09-05T07:22:00.001+08:00

有乜好老尷？古人都畫到呢d畫，我地仲要保守d乜！？

今朝一起身見到呢篇野，我覺得有必要大家分享一下！都話蘋果係香港最好的報紙了！

性工作坊　女士發洩對男伴不滿
「睇 AV 多屈人性冷感」

【本報訊】「女人好憎男人事前唔沖涼！」「男人最怕女人唔主動、性冷感！」前天晚上，單身女士小嵐、年輕夫妻 Mary 與阿 John 終可拋開顧忌，暢談兩性關係。關注性工作者組織「紫藤」早前舉辦以教授性愛「實戰技巧」為主的「水乳交融性工作坊」，發現香港男女都對性伴侶有諸多不滿。專家及參加者指歸根究柢，是由於香港人羞於談性，結果衍生更多問題。　記者：雷子樂

小嵐、 Mary 與 John 都是上述工作坊的參加者；全班學員共有 32 人，當中有三對夫婦。學員在其中一課，分開男女兩組，討論兩性問題。女士們反應熱烈，歸納出 18 樣最討厭事項，包括男人在床上「前奏唔夠」、「死狗一條」、「事後諸多批評」、「做做下訓著覺」等。女士們原來最喜歡男士「為我口交」、「事後攬攬錫錫」、「懂得欣賞女人」。
男士們則最期望女性「外表斯文，內裡 open 」、最討厭女士「不主動、性冷感」。談及有關調查結果，小嵐反擊說：「係 d 男人睇得 AV 多之嘛，點解你地既智商會唔明白到，套戲 d 野係假架？剪接過架！現實生活冇辦法做到咁就以為女士性冷感！」阿 John 承認，很多男士受日本 AV 的「潛移默化」產生了誤解。

專家：欠缺溝通

阿 John 稱，香港夫婦在性生活上最大的問題，是彼此都覺談性是一種羞恥，令問題惡化。籌辦有關工作坊的紫藤職員林依玲表示，討論時女性的反應較熱烈，反映香港女士很缺乏談性的空間，「男人都可以透過鹹書、四仔得到一 d 資訊，但係女人既渠道就少好多。」該組織明日會舉辦專為女士而設的「女人夜」活動。
紫藤較早前舉辦另一個性教育講座，其中一名講者香港大學社工系副教授何式凝表示，男女之間對性伴侶的看法出現上述落差，是受到社會上既有的觀念影響，兩性之間對有關問題欠缺溝通。「西方好主張用傾偈形式解決問題，其實透過跳舞呢類身體語言都可建立默契，改善問題。」

香港男女對性伴侶看法

【最討厭對方之處】
男：以性愛作鬥氣工具
女：事前唔沖涼

男：怕羞
女：前奏唔夠

男：不主動，性冷感
女：進行時睡著覺

男：受制於宗教和傳統思想
女：做完冇「後事」

男：不配合
女：睡夢中被「搞」醒、以為自己好得，其實一都唔得

【最期望對方】
男：外表斯文，內裡 open
女：多些溝通

男：主動、有技巧
女：多些用說話及行動表示讚揚

【最喜歡對方】
男： /
女：為我地口交、溫柔體貼

資料來源： 32 名參加紫藤「水乳交融」性工作坊學員

紫藤出性教育雜誌

【本報訊】正當《中大學生報》被幾頁情色版弄得焦頭爛額，一班紫藤義工卻「躊躇滿志」，正密鑼緊鼓籌辦一份專為成人而設、圖文並茂的性教育雜誌，希望為對性好奇又難於啟齒的「沉默大多數」，提供多一條獲取正確性知識的渠道。該份暫名為《性愛！ Fun 》的雜誌，預計在年底出版，將透過互聯網發佈，並在部份娛樂場所派發。
《性趣獵奇》、《情慾食療》 … … 該雜誌會開設多個專欄，內容包括講述兩性之間出現的性問題、找專家提供建議、介紹性用品、情色地點獵奇等等，更會向公眾介紹與性有關的法例、保障等資料。
其中一名義工小嵐表示，希望透過這本雜誌，促進兩性溝通。此外，紫藤又會在未來個半月，舉辦一系列性教育活動。

原文：http://appledaily.atnext.com/template/apple/art_main.cfm?iss_id=20070905&sec_id=4104&subsec_id=11867&art_id=10115524

認識我的朋友都知，我其實好鹹濕，不過當然係合理的果種！其實做愛呢樣事情，我覺得一定要多交流先可以做得好。同伴侶交流、同朋友交流(當然兩者係完全唔同！)其實真係好重要！我覺得同伴侶交流做愛的事，重要性等同於交流日常生活的相互問題。

成日都話溝通係好重要，普通事上兩個人有乜唔可以講呢？當然大家還是要互相尊重，我尊重你的睇法，你也要尊重我做人的風格！當然大家一定有唔同的取向，咁就要取一個平衡，而且平衡其實一定有，只要還有愛又點會拎唔到？但個平衡又點拎呢？當然就係要大家交流了！

而我覺得做愛一樣，只有肢體上的交流其實冇意思的！唔知大家睇戲會唔會睇埋字幕既呢？又會唔會留意到以前港片的字幕中，「做愛」的「做」，當時通當會寫「造」字。我唔知呢個係唔係先係「正字」，但我覺得用後者黎表達更好！「造」了愛出黎，愈「造」愈多，幾浪漫！但其實肢體上的交流，只係「造」愛的一部份，另一part還是要傾！有好多人，尤其係女仔覺得講呢d野好老尷，「做完咪算囉！」呢類說話不絕於耳！但咁樣你地咪唔可以享受性愛，更重要係二人的關係，好可能因為咁而每況愈下了！因為第一次就埋牙而做得好其實好難，你唔傾，對方有d咩不滿你唔知，你有咩不滿佢又唔知，長遠咁落去實影響到兩人的關係！！

其實響二千幾年前，孔子都已經講過：「食色性也」，食野同色情一樣，係本性、天性黎的！你食完野，覺得好唔好味，都會畀一下意見，咁點解對於同樣係天性的另一樣野，又要感到老尷呢？

再者，兩個人之間的事，兩個人傾而又冇其他人知，根本都唔駛老尷丫！做愛唔應該就係一pair人會做的一件正常事嗎？

至於同朋友交流，當然就冇得肢體上的交流啦，但言語上的交流，即係交換意見，我覺得又係一件好事！尤其同異性朋友傾，會知道原來異性係咁諗的，再問返自己的情人「你都會係咁的嗎？」可能會有意想不到的收獲！

同男人們，同女人們傾計，都會聽過唔少女人覺得「討論呢d的女人，好似唔係咁正經的女人」。喂，錯的觀念黎架！討論呢個係只為追求兩人的快樂、追求兩人關係的更好，點會係罪？係應份的！

男人們，尊重你的伴侶，唔好成日當佢只係件性用具，AV女替身！又唔好介懷佢唔係處女，咁你又唔係處又點計？冇得咁雙重標準架嘛！主動d傾下吧，可能佢又等緊你傾呢！hohoho!

另外就係好想讚「紫藤」呢個組織！會宣揚正確的性觀念！又會為弱勢的性工作者爭取褔利，呢d係所謂敢言的議員，永遠唔敢支持的一群人！響父權社會仍然當道的今日，呢個組織其實真係好不畏強權，好野！

如果這一秒你跟我講你不愛我

2007-09-01T15:54:00.000+08:00

如果這一秒你跟我講你不愛我
作曲：蔡一智　填詞：黃偉文　編曲：王雙駿

如果這一秒鐘你跟我講從未愛我
還怎聽到這刻咖啡已滾了在叫我
爐火會給潑熄某種氣體瀰漫散播
郵差碰巧按鐘瞬間引起強烈爆破

一句一句　越說越遠
直到逆轉世界
一點一點崩解
一級一級一反常態

一塊一塊　越跌越快
像塌下的骨牌

情感干擾世界
情感顛覆世界
來為愛是無涯
下註解．．．．．．

唔～　請繼續：

牆壁炸穿滿天碎片跌於樓下去了
沿街汽車也給瓦礫壓得全部碎了
其中有輛裡邊正好有位什麼政要
明天國會結果缺少了他投下那票

一串一串　越去越遠
直到逆轉世界
一點一點崩解
一圈一圈一反常態

一塊一塊　越跌越快
像塌下的骨牌

情感影嚮世界
情感拖垮世界
來為愛是無涯
下註解......

或許因由你　而起
如連鎖般　緊緊扣起
愛惡之間　干擾了天地
存亡興衰　榮辱悲喜：

那次你說你寂寞　（中英談判）
那次你吻我額上　（東德開放了）
那次你引我妒忌　（關西地震）
這次你與我道別......hey～

那次你怪我負累　（中東內戰）
　原來戰爭會因某君那一票避免了
那次你抱我入睡　（波斯灣政變）
　如今炮火卻一吋一吋的蠶蝕世界
那次你怨我乏味　（東歐核試）
　如果有天這一切一切都全沒有了
這次世界會末日......hey～
　全因這一秒鐘你跟我講從未愛我

從一點　改變一切
從這點　一切牽連

呢排返工，都有聽收音機，食完飯開始，《五天精華遊》、《萬世巨星》、《好．回家》直落！有時夜少少收工仲可以聽埋《妹妹妹妹》。

細蘇的《好．回家》同Eason錄了一個環節，係Eason同歌迷們分享佢的歌深一層的一面呀咁。而前幾天有一次就係講呢首歌。而當我響上年睇完《Get a life》演唱會之後，呢首歌火速成為「So-9 最愛E臣歌曲榜」的第二位！(當然第一位仍然係企硬的《黃金時代》！) 而我愛呢首歌，係因為頭幾句中，填詞人的果種幻想力的鬼斧神工，亦令我勾起返當年Miss Tsang送畀我地睇的一本小說《Meet 5 people in heaven》，小說話世界每事間都有個環緊扣住，你做一件事可以影響世界，只係可能你自己唔知罷了！唔信？你睇頭果幾段就知了！

如果你講唔愛我，我就自然的唔記得我煮左咖啡，於是冇熄爐！冇熄爐當然的又會好自然的有野滾瀉！到漏煤氣，郵差按鐘就爆炸了！而爆炸就爆死左隔經過的國會議員，國會決定打唔打仗的投票，就係因為差果票而開打了！

其實一d都唔誇，有時你做好多野，係會影響好多野，至少你身邊的人，乃至你本人！

再聽多兩次先！Na...Na...Na...Na...

如你有興趣我對你講一下近況

2007-09-01T15:04:00.000+08:00

不停返工，但我返得好開心！好細個好細個已經入運輸業的了，我鍾意大家同事間，應該話係男人間果種粗獷！

響呢度，你不用講禮貌，要講的，就只有粗口！

「x你，你搞y掂果板b貨未呀？好y趕架！」
「x你老味，我而家忙到含y都冇味啦，你催乜y野呢催？」
「你條陷家富，我真係畀你吹到蕭都攣y左！你做乜z唔做呢板先呢x你老母b！？」
「係喎，我做乜唔y做左果個先呢x你老味？」

做倉係咁的，個個都係咁爆，但我真的好鍾意咁，起碼呢度唔會講錯野，做錯野又冇事發生！hohoho！

不過近排有d唔好的事係，可能太累了，病都病得幾密下！今日又病了！

仲有多謝Zero換了鄭融的飛畀我，但我本身要返工，而家病又去唔到，我自己都想喊！！聽日踢波見啦！

兩日濠遊（二）

2007-08-24T18:40:00.000+08:00

打開了的心形，說明我地好開心！

上個星期日同星期一同女友去了馬交，一個好完美的旅程！上次就講了我地的免費房幾正，今次就講返最最最正的一part，就係食！

由於我地買了一本介紹澳門旅遊的書，於是我地都懂得「捐窿捐罅」去搵野食！由於我地的酒店係響仔的，所以我地都決定由仔食先！事實上，我地出發當日出門口都成十點幾，雖然有食早餐，但去到酒店，都將近兩點了！所以放低行李後，都立刻出發搵食，而第一站，係仔的「興記冰室」，正正就響仔的食街「官也街」。

我地去到雖然都已經好餓，但由於都接近豬扒包出爐時間，所以我地兩條友，只係叫左一個雞扒炒通粉。

雞扒係絕對的冇得頂！塊皮好似有被炸過的感覺咁！而入面的雞肉又好彈牙，最緊要係仲有肉汁響度！真係好正！

但d通粉就比較一般少少，有少少過淋，下次應該就會叫返比較傳統的炒意粉！
食到污糟左都唔知，不過我成日都係咁的吧！

去完興記，我地就諗住去買豬扒包，但就買唔到，於是就去左另一間書中有介紹的食店買野食，都係響官也街的，名叫「莫義記」。而書上面寫呢一食大菜糕的，但我就食了一個木糠布甸。木糠布甸我覺得似雪糕多一點。

木糠布甸其實就係響d雪糕上「沈」d餅碎，但究竟果d係咪雪糕，我真係唔肯定，但木糠布甸係食唔到有布甸味的存在！不過的確幾好味！

之後就去了荷蘭園果頭的「禮記」。

一間不論網上定係書上都激讚的雪糕店，我卻覺得被人強烈推介的「雪糕三文治」真係不外如事，甚至唔大好味。事實上我地未食前都抱有好大的寄望，你睇我女友拎住舊雪糕就知，佢本身係幾咁高興。
所謂「雪糕三文治」，即係用兩塊威化餅，夾住一舊三色雪糕。當然唔會係即整的，而問題就係出響度，夾住雪糕的果兩塊威化，已經長時間放響雪櫃內接觸空氣同水氣，、咁塊餅就一定淋晒啦，唔脆的餅根本已經唔好食了；加上果舊雪糕根本平平無奇，講不上係製雪糕專家！

你睇我個死樣就知一點也唔好食！另外叫左隻香蕉船，一見到成浸朱古力就知奶左野！識我的都應該會知我根本好憎食朱古力！不過d朱古力反而又唔差，輕輕的朱古力味，帶落兩條香蕉同一堆雜果度，有輕輕的甜味搭上濃濃的果味，正！而我最愛係雜果下的果舊咖啡雪糕(初頭以為係朱古力，真係想死的！)，咖啡雪糕有好濃的咖啡味同奶味，苦苦地中又有一點的奶味！呢個雪糕我覺得真係好唔錯，尤其係鍾意飲咖啡的人！

食完雪糕，我地去左新葡京，本身係打算去食8:30 pm的果輪自助餐，因為個個都話好正！不過佢地的服務就好差，我地本身5:30去到間野book位，但又唔accept我地book位，叫我地8點鐘上去排，但點知去到又大排長龍！之後我地見到有一d人話book左位，咁我地就問企門口條友，做乜有粉腸可以book位而又唔accept我地既booking？佢地支吾以對，我地都算數，只能嘆句有緣無份啦！

咁我地就繼續留響新葡京，響「自助山」下一層的「粥麵莊」。我女人就叫了一碗肉丸豬潤粥。
而我就叫了一個臘味糯米飯。
兩個都好普通，放在一間咁大的酒店我就覺得未到酒店水準了。兩條友食左$85，唔算貴！可能佢都知自己的野普通吧！呢間野主打的應該係麵吧！

左兩個應該係刀削麵，右面的那個就應該係拉麵。

響新葡京食完賭完後，都返去酒店了！由於頭先果餐食唔飽，於是我地就打左去一間名叫「華峰食館」，響仔燒味飯店，叫左外賣做宵。我地叫左燒味三拼：燒肉、燒鵝、叉燒；另外一碗齋米同一盒白飯。

呢一間野係「食神」梁文韜介紹的。係啦，就係果個肥到隻粽咁，食乜都叫人點d頭抽果條肥佬。事實上，三拼入面，叉燒同燒鵝都係太監騎馬(無x得頂)的！叉燒真係滑溜溜的！不過你要講明同佢講要「拖地叉燒」先有咁滑，咁當然你要有咁滑就要另加$$啦！而我覺得最特別的，唔係佢滑，而係d叉燒好似有花雕味咁，好香好香！事實上，我都食唔晒，第二朝雖然凍晒，但d味仲正！而燒鵝，隻鵝我就叫左要肥鵝，因為我食野就係食咁肥的！但佢肥得黎卻一d都唔膩！而d皮又鬼咁脆！我肥到乜都食晒d鵝！oh!~講到呢度，我都好想即過澳門食！！不過d燒肉，我頂唔順佢的鹹！食完就好似放左一羹鹽入口咁！所以下次都係唔好叫了！

第一晚的濠遊太夜訓，原本諗住早d黎呢間，但卻遲晒，人地收兩點，我地就差唔多成點先去到！雖然得返好少點心，但都總算仲未走寶！講緊既係開業超過五十年的「龍華茶樓」。
店內一切都非常古色古香，但舊而不殘，你唔會覺得有污糟的感覺！
洗碗呢d野緊唔駛我做吧！

不過睇黎都熱得滯，所以都要用筷子夾住黎洗！
響呢度，唔會有人推點心車，要自己去搵！不過講真，可能我太遲去到，先冇人推車吧！結果我拎了馬拉雞、燒賣、排骨。
而三樣入面，排骨同馬拉糕都係太監騎馬的！！馬拉糕夠鬆軟，有入口即溶之感！而排骨你食得出係好鮮既肉味之餘，仲有好香的蒜香味！正！

不過最正都真係呢碟「蔥油雞」！我不嬲都好鍾意食蔥，但我唔太鍾意食雞，但呢碟我真係起勢的食！隻雞好入味之餘，d肉亦好滑！就連雞胸都超滑！黎澳門一定一定一定要食呢個！呢碟野亦係成個trip中最推介的一樣！
店內古色古香，好有味道！可能已算晏了，所以有大量空座。茶樓的窗外有一個小露台，你可以行出去，感覺寫意。
對出就係紅街市，有好多熟食小販，不過我冇幫襯，因為已經好飽了！你睇，真係冇淨乜滯架，你話飽唔飽？我影果陣都未食完！
食左$90，算中等價錢，但我覺得物遠超其所值！
[吳唱K mode] 龍華，My飛佛！[/吳唱K mode]

食完之後，馬不停蹄，又再食過，今次就係甜品。目的地係一間荳品店，名為頤德行。叫了一碗荳花同一杯荳漿。
你食得出，佢地賣d野一定係自製的，因為同出面的完全唔同味！！荳漿d荳品濃過大家平時飲開的多好多，不過甜味就少d！而荳花，不論荳味、甜品都係剛剛好，而荳花亦非常滑溜！一定好過香港果d！不過就建議大家先飲晒杯荳漿先再食荳花！如果你食左荳花先的話，你杯荳漿就會冇晒味，只係得返荳香味。

埋單計數都十蚊唔駛，抵玩！

黃牛、黑牛，相信大家響香港都食過。就係放雪糕在汽水上。正因為咁簡單，所以冇驚冇喜！唔多講了！事實上，比大角咀的「車品品」還差！(咁車品品又真係好好味，咁比似乎有d唔公平！)

而離開馬交前，最後一餐，就係最馳名的仔豬扒包。第一幅相係第一日去買果陣影的，咁長龍，所以我都買唔到，只能買一個「豬扒多」。
第二日，終買到一個豬扒包！我都排到身水身汗！不過真係值得的！因為豬扒多同豬扒包根本係兩樣野！豬扒多唔夠豬扒包咁好咬，同埋豬扒多就鹹過豬扒包唔少，所以不論口感同味道，都係豬扒包高幾班！
食既報導就完啦！去馬交當然就一定要去賭！仲有買手信！下次先再講呢幾瓣吧！

爆粗王

2007-08-21T22:56:00.000+08:00

其實小時候，屋企真係冇乜人爆粗，但真係好細個已經識粗口，可能係周星馳同晶哥的關係吧！每次一聽到戲中的人爆粗，就會覺得好開心！可能你覺得係黐線，但係真的！

我真係唔記得幾時開始好爛口，但我身邊的人，總會畀我搞到好爛口，最明顯的應該係童哥同我女人，初初佢地係一句都唔講，而家可能勁過我！

我鍾意做倉，儘管忙到一至七，要返朝八晚十，但你見人就x一下，x下x下心情就靚好多了！

我知係一個問題，但我唔打算解決，因為爆完粗我真係relax晒、開心晒！

其實每個人都總有壞習慣，而且唔捨得改的，我爆粗又冇害人既，對人對己都冇害，你禁我做乜y野呢？x呀x呀x...打你兩鎚咩，岩唔岩呀！

公司有個o靚仔，讀完中五入黎，話我不停爆粗，你做咕喱，自己唔爆，都冇理由唔畀人爆吧！！我返到屋企，我都仲要爆呀！我上到台做MC都爆過，咁又點呢！我係要x你y你z你！吹咩！吹咩！吹咩！

萬子哥！

2007-08-19T00:42:00.000+08:00

講真，我真係好鍾意萬子哥！我套《賭俠大戰拉斯維加斯》，睇左100次有多！我一有時間就睇，一有時間就睇！都因為萬子哥，我鍾意佢果種爛，我鍾意佢果種大聲夾惡兼淫賤！！我更鍾意佢成日自創一d對白，搞到套戲更啜核！所以我鬧鐘鈴聲都係佢響戲中，一d最頂級仆街的對白！

我同過阿彤講，《賭俠大戰拉斯維加斯》係我的最愛時，佢不停話呢套係垃圾，頂，你真係唔識貨！不過我就搵到網上一個blog友同我一樣咁識貨！而佢就唔係因為《賭俠大戰拉斯維加斯》而鍾意萬子哥，而係一套19年前的戲《專釣大鱷》，呢套當然都係我最愛之一！！所以我搬字過紙，將呢位blog友的正野同大家分享一下！

「《專釣大鱷》（1989）」

Bruce Willis主演的《Die Hard》（港譯虎膽龍威，1988）描述一名婚姻面臨破裂邊緣的幹探被因於一幢大廈內，靠個人智慧及地理環境，與一群恐怖份子周旋，最後獲得勝利。因為故事構想的新奇，取得全球性的成功。受著《Die Hard》的影響，香港電影亦進入了「Post Die Hard」Era，其中的代表作有由張學友及李連杰主演的《鼠膽龍威》（1995），張學友扮成龍、午馬扮龍爸爸、曹查理扮陳自強，超有趣的，日後再討論；《專釣大鱷》（1989，導演王晶）是另一齣「後虎膽龍威」時期的港產片代表作。

「《Die Hard》（1988）」

《專釣大鱷》中萬梓良飾演的臭口全，自卑又自大，那種輕佻與燥狂混合的爛，只有他做得到。

名場面1：

臭口全因為激怒了女朋友莎莎，打算送她一隻假金錶賠罪。於是找拆家老鼠明幫手。
臭口全出名無賴，拿著假金錶嫌三嫌四：

臭口全：嘩！呢隻呀，流到出面啦，粒的呀，仲大過你阿媽個鼻呀！有無老鼠貨呀？
老鼠明：老鼠貨，都要萬二啦！全哥！
（此刻，臭口全又來一個瘋狂的還價，請留意老鼠明的表情變化。）

臭口全：咁好兄弟，打個九折……

臭口全：千二！
老鼠明：唔？！

名場面2：

臭口全相約新拍擋趙快樂（英文名Happy Chiu，劉德華飾演）到警署飯堂吃午飯。與伙記有一段超絕妙的對話：

臭口全：我碟飯呢？
伙記：嚟啦嚟啦。
臭口全：唔？咩嘢嚟0架？
伙記：你碟飯囉。
臭口全：喂喂，我叫嗰碟呀，係鮑魚雞鵝鴨絲飯炒底加煙肉雙蛋番茄綑邊生菜墊底飯喎，呢碟？甚麼東西呀？
伙記：照你吩咐咁做0架囉喎。
臭口全：哦～？我唔覺有生菜墊底喎，咁點呀？喂，你咁唔醒目，第時點做captain呀，換咗佢～
伙記（邊走邊低聲說）：唉，食得咁「了lung」嘅嚟，真係麻煩！
臭口全（對Happy趙說）：喇，你都睇到0架啦，呢啲咁嘅細路呀，袋錢落佢袋咋，喇喇喇，吟吟噚噚咁，記住我啲教訓。
Happy趙：係嘅係嘅。
臭口全：喺學堂出嚟幾耐呀？
Happy趙：哦，五年囉。
臭口全：唔？五年老散先轉CID呀？慢王之王喎，貪件馬騮衣靚呀？
Happy趙：哦，唔係，我俾人調咗去第個部門呀。
臭口全：俾人燉冬菇就燉冬菇啦，寫字呢？
Happy趙：唔，係S.D.U.。
臭口全：哦，我知……用中文講多次吖。
Happy趙：係飛虎隊呀。
臭口全：呀～？呵呵呵，你估兒童節咩飛虎隊？！
臭口全：話時話呀，我啲仇人個個叫我臭口全，不過我啲Friend呢個個叫我做英俊全，義氣全，不過你少啲機會咁稱呼我之嘛。

名場面3：

趙快樂與臭口全將倀雞英（吳君如飾）從監獄帶出來，倀雞英多番使詐逃走，臭口全於追截途中，為了救險被滾油淺到的小孩，捨身相救，滾油淋在自己的雙腳時，發出以下呼喊：（慢動作）呀呀呀，好心無好報呀～!

名場面4：

《專釣大鱷》的後半部，萬梓良全裸的傾情演出，在被封鎖的大廈裡跟匪徒作殊死戰，Top Fit！Look！

名場面5：

《專釣大鱷》中段臭口全與Happy趙互相傾吐心事，臭口全談到自己的婚姻，Happy趙問他借妻子照片一看，臭口全拿出關芝琳的照片，Happy趙不以為然，以為臭口全又在作大。最感人一幕，臭口全最後逃出生天，分居的妻子看到新聞報導後趕到現場，出現的竟然真的是關芝琳！

最後，亦是最重要的一點，臭口全在《專釣大鱷》中唱出多首經典金曲，內容全部不雅，歌詞不便披露，相信這都是萬梓良的私人創作，事隔十年，他在《賭俠大戰拉斯維加斯》（1999）重唱了這些首本名曲，躁底程度更是有增無減：

唔該晒blog友！以下就唔該Zero，因為佢知我鍾意萬子哥，就send左段《專釣大鱷》的片黎畀我睇，大家都可以睇下，笑下！而《專釣大鱷》呢套戲，我次次都係響有線同Now睇，一路都想買vcd睇，不過就係搵唔到！不過網上面竟然有人賣，我即買啦！！好！去片先！

兩日濠遊（一）

2007-08-13T22:17:00.000+08:00

間房真係一個字：完美！

今年同女友夾份做下生意仔，有一點斬獲，於是就獎勵一下自己，去馬交玩下！原本係冇諗住咁快去的，因為仲想留返d錢黎做入下一轉貨的本錢，但老豆突然話有免費房住！oh!咁就即刻仆都仆唔切咁去啦！

我地入住的係仔的君怡酒店，本身諗住免費野，好極都有限啦！雖然，寫就寫住免費入住一晚「高級套房」，不過學老豆話齋，「乜春都加『高級』兩個字架啦！」，所以都唔存咩厚望，只係覺得起碼都唔會差吧！

點知又唔係喎！原來「高級套房」真係好那高級：

有兩個廳；

有房，房又有大床，大床上面又有懶豬一隻；

仲要對住澳門馬會的馬場！

講真，真係好正！呢個肯定係我做左21年人，最正的一間房！不過去旅行，當然唔係只係屈響間房吧！我地三點鐘去到酒店，即刻就去左搵野食！而食係我地今個trip最主要的一個環節！我之後會同大家分享一下，究竟我食過d乜，係每餐食過d乜！當中有好多都極力推介！

最後畀你估下間房本身要幾錢：

原來成兩叉幾野的！！！

一條波罅

2007-07-31T00:28:00.000+08:00

老友，教我點整條罅好冇？！

以前成班日日都踢波，而家想搵時間踢下波都唔得！

「時間就好似波罅，你用D力，左擠右擠，點都會有D」

但我有波罅時，我d Fd又冇，到我有，我d fd又冇！

大家有同一條波罅，真係咁難？

如果個天畀一億你（下）

2007-07-30T18:18:00.000+08:00

兩日後就已經係要補考了，但仲係一pat吉咁，不如打打呢篇blog算！

一億，其實好似好多，但又好似唔係好多，你睇楊嘉誠，買伯明瀚30%股份，都已經1500萬鎊，即係差唔多兩億半港紙了(以1兌16.2計)，所以你講係咪好多？其實又唔係的！

至於你問我覺得自己之後可唔可以搵到？我又覺得應該可以，因為果陣睇過三次相，有兩個都話我可以事業有成，可以小富小貴咁。點為之小富小貴，就係搵到大慨1至2億倒囉！(呢d都係睇相佬講的，唔關我事)再加上世界係會通脹架嘛，到時一億可能只夠你買幢樓！(又係講歷史既時間，其實嚴重通帳真係好可怕，響國共內戰既時候，買一張最低面值的郵票可以去到$460000，d人的銀紙係一舊舊磚頭咁用的，所以一億有時只係一個好細的數字！)

就係諗到呢個問題，我覺得趁而家的紙水黎講仲有利可圖，點解唔要呢？況且我玩左$50m去，淨返$50m畀身邊的人，都已經好好用啦掛！

銀碼又唔細，又有一年時間，又幫到身邊的人，y not?

如果個天畀一億你（上）

2007-07-28T00:40:00.000+08:00

前兩日，上 fdzone ，有條友開左個好有趣的topic，我都反覆咁思索左好耐！

Topic係：「如果如果你會不勞而獲的得到一億，但條件係要一年後要死，會要呢一億嗎？」

之後好多人答埋一d九唔答八的答案：「如果十億會考慮下」果類

於是我再響曼聯網開同一個問題出黎，不過就改左銀碼係「十億」！照咁問人！

而家，我問你了，你會要嗎？我兩日後話你知我點諗！

讀屎片

2007-07-24T08:26:00.000+08:00

如果你只係考四科都要re-exam一科，而你封信仲要比正常人慢，你話你呢d係咪叫讀屎片？

如果你考完之後，直頭係有信心拎A，但最後要re-exam，你話呢d係咪叫讀屎片？

如果你經常放學都會成日溫習呢科，但最後都係要re-exam，你話d係咪叫讀屎片？

如果咁多樣條件都係符合「你係一個讀屎片的人」，咁你仲係唔係仲只係讀屎片咁簡單？

仆街！......................我要re-exam CB呀！！！

不過我係唔會沉的！

大丈夫
作詞：黃霑　作曲：劉家昌　編曲：金武林

男兒一生要經過世上磨練共多少
男兒一生要幾次做到失落與心焦
我有無邊毅力捱盡困難考驗　 立折披荊斬棘心裡
更願永不折腰

大丈夫一生要經過困難（世上）磨練共多少
大丈夫一生要幾次落魄失望與心焦
冷雨狂風歷盡人格更光耀　 立地頂天男子心裡磊落不折腰

大任降於斯人，必先苦其心智，勞其筋骨，餓其體膚。我信的，就向住果點衝吧！

我欣賞你的過份！

2007-07-24T00:28:00.000+08:00

陶傑短評：焚滅淫

影視處淫審塔利班再施襲，派出人員，脫穎於書展，作怒蛙恐嚇狀，揮棍挺進，指台灣參展商的《愛情神話》西洋裸畫封面不雅。經記者質詢，見犯了眾怒，蹂躪不果，遂又龜縮萎軟，支支吾吾收場。

影視處如此無厘頭一露械亮劍，登時把特區一干童男童女的出版商和讀書人，嚇得尖聲大叫，面無人色。原來各大公共圖書館中，西洋藝術欄下的藏書，甚麼大衞、阿波羅、邱比特、維納斯、畫皆陽具充斥，乳頭橫行，全無黑膠封套，淫褻不雅，不受監管。
經影視處書展突擊行動，確立標準，市民不妨就各區公共圖書館的奶不雅物品，發動大投訴，迫令特府來個「焚坑乳」道德大肅反，在中央圖書館門前的維多利亞公園，搭起柴堆，把所有西洋人體藝術圖書，投入烈燄，化為飛灰。焚聖火，傳遞的路線圖，最好由「明光社」辦事處開點，經提倡「通識育」的育局辦公室，傳至影視處、淫審處、廣管局三大部門頭頭手上，有關人等，身穿白袍，齊集維園，在書堆之前齊唱：「熊熊聖火，憐我苦痛多。明明亮光，燒盡乳頭，焚清陽具，為我特區消災去禍。」吆喝三聲之後，一齊點火，只見黑滾滾，火舌熊熊，為香港這座「國際大都會」，平添姿采。

一直都好鍾意陶傑，因為佢寫野真係好過份，不過我就係鍾意佢這一種意識過晒界，但人地實情又吹佢唔脹的文筆！佢既可以作一d好細膩的好文，但又可以寫一手咁市井的仆街野！但佢仆街得黎，你又總會認同！

好多人覺得佢太過份、太誇張！但我就係欣賞這一點，有些事就係要鬧，但鬧得大聲總係有失斯文，反而陰d陰d，咁先有種味道響度！

大家都係叫阿傑(當然佢的係筆名)，大家都係咁仆街，點解差咁遠的呢？哈哈哈哈....

新貨部筍！

2007-07-20T01:21:00.000+08:00

在剛過去的星期六、日，同左屋企人去左批發市場，主要黎講都係補充返一d既舊貨，仲有搵一d新的貨同貨源，而今次發崛左四款新貨，有一款未影過相就拎晒出鋪，所以同大家分享唔到啦！而另外的三款，就可以同大家分享一下！

第一款係羽毛玫瑰，除左個莖部，葉、花瓣、花咢，都係用羽毛做的，夠真吧！？
仲有白玫瑰、黃玫瑰、紫玫瑰，一支$39 only！如買一束仲有價講！

之後係煙民恩物，香煙辟味劑，用法好簡單，只需要放響煙灰缸的底部，遇熱即刻發放香味，唔止成間房都冇煙味，仲要有一陣陣的幽香！

有五隻味，百合味、紫羅蘭味、薰衣草味、海洋味(極力推介)、士多啤梨味！$28一包only！可用10~20次！

最後係日本最潮拼花袋，有中碼同細碼！中碼出街已經好夠女仔們用，而細碼，已經可以
袋到銀包、鎖匙、手機、相機之餘都仲有空位，而且仲唔會改變個袋型！

先黎係中碼袋：
另外係細碼：

中碼袋$78，細碼袋$58！

補充一句，小弟響信和的櫃，已經改左租第二度，影完相之後，再同大家分享一下！

做運動

2007-07-17T22:29:00.000+08:00

有時真係覺得做少陣運動，個人都好似好唔知點咁，會冇乜神氣，會冇乜心機咁！差唔多成個月冇踢過波，係尋日踢返，終於的畀我搵返狀態，仲要入左一球！

之後今日響廣州落返黎後，仲要打左兩個鐘羽毛波！仲要玩野，要自己不停雙腳跳咁彈下彈下去打！玩係幾好玩，但真係好鳥累！

不過我想成日都有得咁打波法，起碼個人都醒d丫！

係喎，入左d新貨，遲下同大家分享一下啦！

孫耀威 - So Far So... Close(新歌+經典精選)

2007-07-10T16:49:00.000+08:00

So Far So... Close，孫生原來已經十年冇出過廣東碟。今次新曲加精選，分開兩隻賣，Disc1係新曲，Disc2就係精選。

講真，我唔係好識聽歌，叫我評我唔識。不過真係舊的好聽d，新的硬係有d怪怪的！愛的故事上下集，可能已經係孫生的代表作。過左十年仍然咁正，但過左十年都仍然係呢兩首，再過多十年，仲有冇呢？

不過既然呢位老兄都可以出返碟，我都想趙學而可以出返，有一晚聽903的「一切從音樂開始」，個主持人整左個「趙學而之夜」，原來佢唔止係皆大歡喜的林玉露，只係識恰老公咁簡單，原來把聲真係可以令人流出耳油！等你呀趙學而！！

我最鍾意的一首：

歌名: 尋開心
主唱: 趙學而
作曲: 周初晨 
編曲: 王雙駿
填詞: 林夕

別來扮　　伶仃孤苦身世　　你是我哪位
誰也學會　　拾得起　　放得低
而眼淚嗎　　我不敢發揮　　就如洞悉一切
亂世的情侶　　誰亦滿身傷勢
別忙著　　狂抽煙的手勢　　以為愁腸是美麗
你令我　　有歡慰　　才是實際
你讓我　　有安慰　　誰亦不必理虧
你別要　　再幽怨　　和慚愧
我尋你開心　　你尋我開心
我們還有甚麼可以恨
你贈我體溫　　我贈你興奮
男或女來製造愛我不關心
愛情求開心　　沒有所謂敵人
快別要弄壞美好氣氛
別在乎甚麼　　所愛非人
誰能讓你愉快　　便算　　合襯
誰能讓你愉快　　便安枕
誰能讓你愉快　　和安枕　　也就能合襯

號碼

2007-07-06T13:07:00.000+08:00

球迷們，又要花錢了！

波衫、臂章、字體、號碼，今季對阿榮（朗尼）黎講，四樣野都係新的。對於一班好似我地呢類咁既Die Hard Fan，一定會追求落去！不過對於阿榮的新號碼，講真我又唔太鍾意了！

10號，對於好多足球員、足球迷黎講，呢個係球場上最神聖的號碼！就算可能連唔鍾意睇波，但睇過足球小將的人黎講，都知10號應該係一隊波最重要球員的號碼！你睇下戴志偉、小學時既小志強，到各個國家的隊長、靈魂人物，高橋陽一都一定會畀件10號佢地。就連李克勤唱既足球歌，歌名都係叫「我著十號」。

但在我黎睇，10號係代表過左氣的足球，一郡只懂扭波既人著的號碼！所以我真係唔想咁有朝氣的阿榮著呢個Number！而且，曼聯既10號，一直都係代表住係曼聯的攻勢終結者，曉士、雲佬都係呢類。但阿榮根本就唔係囉！

不過我幾時開始唔鍾意10號呢？呢個問題我都唔記得！94年，我第一件曼聯波衫到手(當然係冒牌的了)，我記得我諗都冇諗，就揀了7號黎印，當然係因為簡東拿。

不過我之後都冇印過7號了！因為我冇耐後就轉打龍門，以一個小學生黎計，我當時打龍門真係算唔錯，尤其我可以救到阿sir的九碼，仲要係唔止一次。作為小學校隊正選門將，背脊好自然印的就係1號啦！但上到中學，超早發育的砵甸乍，已經高我成個頭，我作唔係正選龍門，但踢返中場的我，仍然係著1號，因為把關的砵哥，竟然要10號！

但久而久之，我由一個中場，變成一個輔鋒，只要有波，我就塞畀當時係龍一號神射手，表面入波多，其實浪費更多的獨仔(叫得獨仔，就知佢幾獨食)。對絕少讚人的獨仔黎講，當時竟然讚我：「佢d二傳真係一流！」「二」同「一」，係呢句話的雖一2個數字，於是我就揀21號，直到現在又已經改踢後衛都冇變，講起都7年了。

至於好多人見我著4號，其實只係因係校隊有人揀晒其他號碼，得返3同4，咁4就4啦！加上屎人響我18歲果年，送左件4號畀我，於是4就係我第二最愛！

反觀10號，我真係唔鍾意，不過阿榮既然決定左轉，都希望曼聯新10號仔，可以繼續發光發亮啦！

時辰未到！

2007-07-05T12:39:00.000+08:00

做乜冇人幫襯我！！

回歸十年的日子，都係我第一次做街邊小販的日子，我入左好多風扇，本身打算七一趁有回歸杯，響大球場賣，但當然，如意算盤打唔響了！因為果日始終唔係太熱，我打道回府時仲超大雨，真係好彩走得快！下次英超香港杯，有得做嗎？但都要出動了！

響旺角租櫃的生意唔多好，反而在銅鑼灣唔錯！不過唔知做乜冇人肯買我d貼紙！風扇都總算可以支撐，但過左九月，風扇就冇可能賣的了，咁賣乜呢？大家有冇乜提議？

不過其實反思返，今次賣野個look係騎呢d！始終都係要搭個檔口出黎！

不過都好彩走得快，你睇下！個天喊得幾慘！！

以前...

2007-06-28T11:52:00.000+08:00

總覺得自己身體真係太不如前......

以前試過一日踢波踢13個鐘，拎住碗雲吞麵繼續踢，不停曬最多甩皮，但唔會有事！

以前試過為左玩，三日夾埋訓左九個鐘都冇事，仲好精神！

以前試過響倉做果陣，踩左兩日通頂，都係冇事！

而家？

而家踢三個鐘，只係曬少少，再沖凍水涼，就已經病了！

而家夜晚最夜三點訓，唔係第日一定頭痛！

而家，我真係病到五顏綠色，感冒得黎又會好辛苦，唔係頭痛、肚痛，而係呼吸困難...

我踢波要週圍跑，跑完都唔會索氣；但呢幾日，齋抖氣都要大口吸大口呼！行兩層樓梯會見暈！

頂唔蒲了，今日真係要睇睇醫生了！

因為七一我要去大球場賣風扇，七二許可就要去沙田馬埋賣！

我一定要撐住，我個仔下星期一定要睇到醫生！

p.s.我個仔過兩日一歲了，但禮物竟然就係皮膚病，好令人擔心...

戲王之王！

2007-06-26T23:59:00.000+08:00

Jim Sir首次響大銀幕擔正，要睇！

我諗識我既朋友，都知我好迷Jim Sir，佢一套《男人之虎》，我買飛都買左四次！今次係響銀幕第一次擔正，又點可以唔睇呢？

今次個故事，係講一向好熱愛做戲的陳文龍(Jim Sir)，本身係一個差人，而每年都扮警察Annual Dinner的天才表演獎，警察們深信佢係最好戲的警察！恰逢臥底阿仁畀大毒裊狂森(杜汶澤)發表其臥底既身份而被殺，仲畀狂森響條屍上面寫「演技太差」四個字！大粒的差佬們認知到佢地的臥底們演戲唔夠好！於是就派最好戲的陳文龍，去演藝學院培訓一下，然後先去做臥底。

但陳文龍拍左八年拖的女友Judy(葉璇)係一個現實的女人，佢好反對文龍咁做。而文龍就堅持入去受訓，響入面識左身材有34C-23-34的三級女星單丹(阿Sa)，自此不論生活、戀情都開始左新的一片天。

呢套戲我覺得其實幾似「喜劇之王」，不過唔同既係，周星馳本身係有料的，只係冇人認同佢果一套；而Jim Sir的戲本身就係靠誇，入到演藝學院佢先慢慢進步落去。好多人講呢套戲Jim Sir d表情太誇，呢個我認同的。但佢個角色就係要咁表達的嘛！！同埋到中後段，同阿Sa響空地度傾計的時候，講到自己因為學戲而一無所有，果段內心戲，唔單止tough，其實佢一d都唔誇張，你睇到Jim Sir係知幾時個角色要誇，幾時唔要的！

至於阿Sa，其實自從「戀情告急」之後，我而經覺得佢絕對係一個好演員，而且唔係一個普通的好演員咁簡單！佢唱歌仍然好Suck!但演戲我覺得佢係真係好得的！今次佢的演技，絕對係去左另一個層面！由頭到尾要用「鄉音」黎去講黎，而且好似！

不過我覺得個故仔最後個ending有點馬虎，令人有點兒失望！但總括黎講，係必睇！要笑，你可以滿足，要睇toughing野，亦有得睇！要睇劇情，唔計最尾一part都好唔錯！

不過睇還睇，千祈千祈唔好去巴倫紐睇！大聲到我隻耳睇完半粒鐘都仲痛緊！

新分店開張！

2007-06-22T21:51:00.000+08:00

09 Decoration 銅鑼灣分店全體仝人鞠躬！

尋日，出左信和，諗住睇睇本身個櫃的生意點，點知原本只係維到個本。人流係多，不過大多係電車男，班友去信和，都係睇下機咁。就算買精品，都係果d個波大到有成隻大髀咁長的膠公仔，對我果d冇乜興趣...之後同樣響信和，見到有一間又係做租櫃生意的，竟然開到分店，仲要係銅鑼灣地帶，於是就租住一個月玩下先！

新店比舊店大間，我租的櫃都大格左，但我畀既租就少左！但我最鍾意，都係佢夠光猛！間鋪夠光猛，就連櫃入面，都每個櫃有一盞燈！

而地址就係：

銅鑼灣怡和街1號銅鑼灣地帶 219-220號鋪 62號櫃

< >

2007-06-19T01:40:00.000+08:00

一個都不能少！

在網上見到一篇寫得好好好好的文章，希望各位養狗人士、另一半係養狗人士(尤其你唔鍾意隻狗的)可以睇睇！

當我還是傻裡傻氣的小狗時，一舉一動都會令你樂不可支。你稱我為自己骨肉，喚我作心肝寶貝。雖然，我解剖過你幾個枕頭，咬爛過你不少鞋子，但我們還是成為了最親蜜的朋友。

每次我「壞」了，你都會指著我，大叫：「豈有此理！」，但轉眼又會按捺不住，眉開眼笑地把我反過來搓肚子。

我記得多少個晚上，我在被窩堙A鼻子哄著你，聽著你說秘密、說理想、說夢話。噢，那是多美滿的日子。我們一起散步，一起奔跑，一起遊車河，一起買雪糕 (每次你將雪糕吃光，把雪糕筒留給我，便開始說雪糕對狗有害)。

你上班，我會晒著太陽，半睡半醒的等你回家，有時夢見你，有時想著你。
你愈來愈忙了，除了工作，也開始拍拖。我仍然每天等你，在你心碎、失意時安慰你；無論你對或錯，我都只會默默支持你。你回家，我當然雀躍；嗅出你戀愛的喜悅，我更欣喜若狂。

她，現在是你的妻子了，並不太喜歡狗，但我仍然歡迎她。我對她唯命是從，嘗試用熱情感動她。你快樂，我便快樂。

嬰兒一個個出世，我和你同樣興奮。看到他們嬌嫩粉紅的肌膚，嗅著他們的氣味，令我覺得自己也是父母，我也想照顧他們呀。但她，和你，卻擔心小孩子的安全，最後我不是被關在工作間，就是給困在籠子裹。

唉，我是這樣的愛他們；愛，卻把我囚禁起來。

小孩子慢慢長大，我終於成為他們的好朋友。他們扯著我的毛，戰戰兢兢地走出第一步；他們用小手指戳我的眼，好奇地拉開我的耳朵研究，又熱情地吻我鼻子。他們怎樣搞，我都無任歡迎，畢竟，你已經很少和我玩。我願意付出性命，來保護他們。我會鑽進被窩，聽他們的小煩惱、小夢話，我又會和他們一起，等待著你每天回家開門的鑰匙聲。
從前，朋友問起你有沒有養狗，你會急不及待從銀包拿出我的照片，興奮地講我們的故事。

這幾年，你只會「嗯」一聲，就轉話題；我也早從你的「心肝寶貝」，變回你養的「一條狗」。

我更留意到，你對養我的支出和費用，開始縐眉頭了。

現在，你要調去上海工作，公司為你租的大廈不准養寵物。你為「家庭」，作出了理性的抉擇。

只可惜，沒有人提醒你，曾幾何時，我就是你的「家庭」。

很久沒遊車河了，我真有點興奮，直至，我進入了「愛護動物協會」，貓、狗、絕望、和恐懼的氣味湧進鼻子堙C你填好文件，說：「我知你們會替牠找個好歸宿的。」
工作人員聳聳肩，一臉無奈。他們都知道，就算有出世紙，為中年犬隻尋找一個家有多渺茫。

你的兒子尖叫著：「爸，不要讓他們帶走我的狗！」你要撬開他手指，他才肯鬆開我的頸圈。

我實在替他擔心，我擔心你剛替他上的一堂課，會令他一生對友誼、忠誠、愛、責任，和所有生命都需要尊重的價值產生懷疑。

你留下了頸圈和皮帶，避開我的視線，拍拍我的頭當說再見。趕著開會的你，看看錶，時間已無多；我不用開會，但情況，似乎一樣。你走後，兩位工作人員談起來，說你幾個月前就知自己要調職，為甚麼不自己嘗試替我找戶好人家？她們搖搖頭，說：「豈有此理！」。

工作人員忙得要命，但很看顧我們。當然，每天都有食物供應，但，我己經喪失食慾很久了。

起初，每有人走近「囚室」，我都以為是你回心轉意，連跑帶跳地衝向鐵欄杆?
希望一切只是場惡夢。後來，我開始期盼會是想收養我的好心人，任何人，只要把我從這夢魘救出去就好。

最後，我明白我不會是中心其他幼犬的對手，牠們活潑可愛，沒有包袱，我開始長期縮在「囚室」一角，靜靜等待。有天，下班前，我聽?鼽}步聲來找我，跟著她，我蹓過長長的走廊，入了一個房間。靜得像天國似的一個房間。

她把我放上桌子，揉著我耳朵，叫我不要怕。我的心砰砰跳著，估量著下一步會是甚麼，暗地裹卻有點如釋重負。做囚犯的日子，似乎走到盡頭了。

我的天性不改，看見她邊拿起針筒邊流淚，又開始為她擔心。我明明白白到她的情緒，正如我明明白白你的一樣。我輕輕舔著她的手安慰她，就如從前安慰著你。

她專業地把針滑進靜脈，刺痛帶著一陣清涼的液體流遍我全身。我累了，躺下，想睡了，抬頭望著她慈愛的眼睛，我喃喃怨道：「豈有此理！」

她不知是看得懂，還是聽得懂，抱著我，抱歉地說對不起。
又匆匆地解釋一切都是為了確保我不用受苦，不用受遺棄。我去的地方充滿著愛，充滿光明，會比這個世界更適合我。

我用盡最後一分氣力，重重地擺了擺尾，想告訴她，那句「豈有此理！不是對她說的，是對我最愛的主人說的。我會永遠想念你，也會永遠等你。

我希望你一生遇上的所有人，都和我對你一樣有情有義，都和我對你一樣忠誠。

註：有人在美國，用七千美元在報紙買了全版廣告，來刊登Jim Willis 寫的這篇
<> 。Jim的英文版歡迎轉載，我這篇翻譯也是一樣。有心人，先多謝了。

倪震

有得揀，我鍾意做老闆！

2007-06-14T19:22:00.000+08:00

09 Decoration Godown 未仝人鞠躬

其實呢年一路都想搵d野搞，只不過一路都係得個講同諗字，直到幾星期前上大陸，發現真係有利可圖(哈哈，少少咁多啦！)，於是就入左一批貨響網上賣！

到今日，2007年6月14日，賣了一個星期有多了！響信和見到有d鋪，將個廚窗間開一格格，於是我就租往一個試下玩，個鋪位人流應該唔少，希望好賣吧，各位有時間都可以上去睇下^^

我Yahoo! 拍賣入面的架步：
http://hk.user.auctions.yahoo.com/hk/show/auctions?userID=wuso9&u=:wuso9

09倉響信和的架步：

旺角信和中心商場
1樓145號鋪
寶貝發展中心
B3號櫃

大家可以睇下呢幅圖，我果度就係紅色箭咀指住果格啦：

Take me out to the ballgame!!

2007-06-13T15:11:00.000+08:00

日本鄭浩南(圖片：Yahoo!)

唔知係咪因為成日玩Wii Sports，最近的而且確的迷上了棒球。雖然鍾意的程度同足球、籃球、欖球、桌球(英美式都岩我！)仲有一段距離！

最近成日都睇ESPN的MLB比賽，播得最多的係NY Yankees既比賽，我都好自然的鍾意了呢隊波。而松井秀喜呢個極似鄭浩南的的球手就係我的最愛，當然都愛A-Rod羅德基斯、Posada、Jeter。點解鍾意松井？因為佢真係好冷靜，出佢就好少會有甩拖，九成都有安打！(打中個波但唔係全壘打)

仲有第七節半果陣，全場一齊唱「Take me out to the ballgame!」都好正！我睇到毛管都戙晒！我都要學唱，下次一齊唱！

不過其實有時有d野都唔係好明，不過睇睇下都明明地，就好似睇足球咁之嘛！

128！

2007-05-27T23:59:00.000+08:00

128場，Salute to Jim Sir!!

2005年2月尾，我岩岩考完中七的mock，等緊對卷同放Study leave，諗住搭地鐵去唔知邊度。就響就車之際，我就睇到以下呢個Ad響車鐵路軌對上果度賣緊：

果排Jim Sir剛剛做完「大丈夫」，一句「谷精上網特惠超值套餐」同「98咋！Unbelievable!!」再加上之前「買兇拍人」入面的「雙槍雄」都十分出色，於是Jim Sir就成為我地一班「廢柴聯邦」的話題！而見到呢個ad果陣，我就即刻撥個輪過河童，問佢睇唔睇，睇就幫佢買埋！結果佢都好爽快話好！於是我第二日去屯門市廣場果間Tom Lee買飛，買到最貴飛220的最後一行！其實話就話最貴果隻，其實學生半價，兩條友睇都係220！仲要講緊係頭場！！不過唔知個位係點的，因為果間Tom Lee竟然係冇座位表睇！不過仍然好好好期待！

3月17日，我記得我同河童兩個膠人，行左好耐，兜左好多冤枉路，不過仍然早到！我見到的，有上面的快必、Jim Sir弟子林嘉欣同容祖兒，仲有我影唔到佢，我兩個最鍾意的導演之一彭浩翔。不過林嘉欣就冇入場睇。到排隊入場時，容祖兒同快必竟然一前一後的夾住我地排隊入場。

入到去先覺得好彩！因為我地的兩個位，就係最後的三個連位中的兩個！有一對情侶睇住佢地要分開坐！(咁又何苦一齊去呢？)

睇完當然覺得好好睇，於是決定再睇多一次！到六月，同河童加埋屎人同龜頭再睇多一次。自此，Jim Sir的演出，我有錢買飛都唔想錯過！

到今日，已經係Jim Sir第六度公演「男人之虎」，亦係佢的第128次！由第1次同第128次比，地方由細細地藝術學院，去到演藝學院度做。而Jim Sir亦明顯老練左好多！同觀眾的互動都多左！而內容都改左少少，例如「查找不足做大Show Live」(04年尾，胡主席同董伯伯講，要「查找不足」)，亦都跟得返時代步伐，變做「我要做好呢個Show Live」(07年曾特首競選口號「我要做好呢份工」)；何偉途呢類現實中被人遺忘左既角色，亦都飛左！而對男人中年危機既刻劃亦比以前再多左！

But Anyway, 都係咁好睇！再一次Salute to Jim Sir！下一次的「蛇鼠一窩」再見！

p.s.本身係睇上星期日，5月20的第121場的！不過跌左銀包，連飛都唔見埋，好彩我女人知我想睇，再撲了今晚的飛！多謝！

老虎扯足一星旗

2007-05-18T00:12:00.000+08:00

離開左小學，都未試個一個星期日日都有功課交的了！呢個星期，終於覺得自己似返個大專生，起碼自己原來係有能力去衝，亦到做到d野出黎係有人話你唔錯的！呢個感覺對我黎講幾好，只係同周公的關係有點疏遠左！

其實今個星期仲未完，只係想趁有少少時間，想同大家講：

我好想踢波！星期日先考得唔得呀X！
仲有黃貽興你真係好x有型！

We got our trophy back!!!!!

2007-05-14T03:43:00.000+08:00

唔畀你再走！

今日，我地又贏了英超！

Manchester United 9 : 0 Suck Liverpool

YSB, you never get premier league once! You will won 0 times for ever!!!!

今季的回顧，下星期前送上，今個星期要做太多太多的野！ Look forward to 513！
We will be the double again!!

If you want to go to heaven when you die,
You should keep the red flag flying high.
You should wear a red bonnet,
With f*ck the scousers on it.,
If you want to go to heaven when you die.

心死！

2007-05-13T14:00:00.000+08:00

好耐之前上網睇過，人忙得滯，就等同快死一樣。常言道古人造字，係有佢的道理。「忙」字，「心」加「亡」，意指心死啦！

我個心呢排死到唔死，呢個星期將會有好多好多野等住我造，同時我又想打好多好多好多blog，為免大家以為呢道摺得，我唯有求其的打少少野！上星期中文堂，我同肥仔、阿彤一組，present「人類的小動作」。自己係滿意的，因為幾過癮，更有幸上埋Youtube。睇野先啦，過兩個星期先再打！預告係，將會有你有我有情有天有海有地！

p.s.好唔情願的要戴返眼鏡返學，因為真係好薯，加上個頭又唔得悶剪，係薯上加薯！唔信可以睇睇片就見到！

眼疾

2007-04-15T10:46:00.000+08:00

盲咪盲囉！一隻之嘛！(設計圖片)

前兩個星期，戴左十幾個鐘con之後，發現有一粒白點響個眼珠度，咁為安全起見，都費事再戴con住！我女人好似好擔心我咁，但我自己又反而冇擔心過！但好鍾意拎呢個問題黎玩！試過同佢響大陸，佢做我的盲公竹，而我就合埋眼黎，搭住佢膊頭行！其實又真係好冇安全感的，因為你乜都唔知，尤其係條路凹凸不平果陣！不過同時又覺得幾好玩！

諗住去睇眼啦，原來唔理係公眾定私家，都要排期！大佬，急診黎的！不過都照排啦！本身排左尋日，但book果d原來只係視光師...唔係眼科醫生...所以都未知幾時有得睇，又要重新排過！不過我自己就唔係好擔心，反而的確有d唔方便！睇電視睇得耐d，隻眼就會好累！不停咁流眼水，可以用黎洗面咁滯！

打到呢度，隻眼有d累，抖下先！

七一大遊行！

2007-04-15T10:23:00.000+08:00

我返黎啦！(圖片：Sina.cn)

七一呢個字，對好多香港人都唔陌生！有d人好鍾意，有d人卻好討厭！冇錯了！就分別係曼聯同羅馬的球迷！

7-1，歐聯成立左十幾年以黎，第二懸殊既比賽！但厲害在，曼聯對的唔係香港08呢類渣滓，而係我另一支都好喜愛的球隊，羅馬！其實更正確d黎講，我鍾意的只有羅馬的羅馬尼亞人捷禾。不過冇計，對住曼聯，其他有幾愛的都要行開。

其實7-1呢個比數，真係估唔到！我覺得係有兩個原因令到呢個比數出現！第一係羅馬班友仔都係太想入波！佢地輸到5蛋都仲攻緊！而攻既同時，後防又好鬼雞咁！而第二個因素就係老費既變陣！今場照打4-4-2，但前鋒既組合，竟然係史密夫搭傑斯！而阿榮(Wayne)竟然就同傑斯調左位，踢左中場！而羅馬後防肯定老早收到柯打，要睇實阿榮同C朗！尤其阿榮要緊盯！因為阿榮個位更接近佢地的心臟地帶！但殊不知佢竟然係踢中場！如此一來，羅馬的後防就拉到空晒！尤其係20分鐘之前！

當然卡域克突然神勇，有堅尼同史高斯一齊上身都好重要啦！

7-1之後，我地要面對的，係另一支意甲球隊AC米蘭。對面隊的球迷話，要幫羅馬報仇，仲要係雙倍的報！即係14-2！喂，阿老友，玩FM都唔得啦！不過我就唔敢睇少AC，雖然，我係樂觀的！至於三冠王的獎項，我覺得仲係言之尚早，過多兩星期啦，應該有d眉目的了！

尋找快樂的故事

2007-04-04T11:46:00.000+08:00

1981年，美國陷入經濟的困境，Will Smith所飾的Chris Gardner，同好多美國人一樣，都要因為加稅，而面對住生活上的困難。自己錯誤估計，入了一大堆賣唔出的貨，「責」死左自己，冇收入，拖了幾個月租之餘，老婆亦因為日日趕兩班已對自己好不滿，於是狠心的拋低左Chris兩父子。而Chris響老婆走前，Sales呢份職業搵唔到收入，仲決定去做了冇薪金的股票經紀見習生。

公司每年請20個見習生返黎，但只有1個最後會獲聘！而Chris因為冇收入，被包租公趕走，搬到Motel住，再響Motel畀人趕走，要住公廁、要去露宿者之家度日日排隊。為的，係堅持自己的信念！

其實一早已經好想好想睇呢套野，當NowTV播了預告片之後，我更肯定我一定走睇！尋晚本身諗住會睇9點半場，點知得返頭兩行，於是就睇了11:50分的那場，其實已經好眼訓的了，本身都唔係好想睇，但女友話照睇，我諗佢係唔想我講左兩三個星期都未睇而失望吧！於是就照睇了呢場戲！

套戲的內容，主要係講一個男人的堅持，另外再加一d父子親情再為點綴一下咁。上面都有講過了！而我覺得最正係Will Smith交到出黎的內心戲。其實呢套野絕對冇過份搧情，但每一個shot都係觸動著你的心靈！

好似Will同佢戲內戲外都係兩父子Jaden Smith之間的果份真情既交流，你除左睇得出呢兩仔爺除左好有默契之外，感情係一流的！呢外你睇到Chris Gardner果種執著，係男人都會好感動的，尤其呢個係真人真事改篇！

睇完你難免心會up住up住，你難免會有反思。試諗下你老婆走佬、你冇錢要訓街，你會好似Chris Gardner咁奮鬥，還是自殺？我諗我自己未有呢個資格去選擇住，當然都唔想會有呢個情況，但如果發生左的話，我真係會唔知點，我唔會自殺，但可唔可以再奮鬥，真係未必！

套戲有幾個反思位，而反思位都係窩你個心窩得應一應的！

其中我最愛Chris兩父子入左露宿者之家，之後有一班聖詩團黎左，並且大唱聖詩。而內容大慨係：「上帝請你不要移走障礙，那只會令我懶惰，請不要移走障礙，請不要移走障礙...」而Will就一邊聽，一邊攬到自己個仔實一實。而眼神中，除左不停流的淚，就好似講：「我一定可以，我一定得的！」好簡單的一個反思，你有怨天怨地嗎？係冇自信，唔相信自己做到而賴個天嗎？

另外響廁所訓的那晚，Will帶住個仔響廁所訓，外面有人不斷拍門，Will蓋住佢個仔的耳，唔駛佢受驚，另外自己就忍住唔出聲咁喊出黎，呢幕又係好touching！一個人要背負咁多包袱同壓力，其實真係好辛苦！但我仍然係要堅持！你想到呢個，會真係覺得好感動！

最後就係.......唔講！我要你地自己睇，因為真係好值得一睇！

有兩句野，我好鍾意的，都係Will響戲入面講的：

"Don't let somebody tell you, you can't do some. You have the dream, you have to protect it. People can do something themselves and they tell you, you can't! If you want to get some, go get it, pay for it."

"If I don't know, I will say I don't, but I will find out the answers."

第一句真係好正！真係好極力好極力的推介！

生日月．結章

2007-03-31T23:15:00.000+08:00

再見了，一一一一馬房！

屬21歲的生日月，終於黎到最後的一日！呢個生日月，最初係開心，開心我的狀態終於返黎，我增肥的計劃係冇錯的！曼聯苦戰YSB 90分鐘之後，神奇獲勝！好波不妨一睇再睇！

月初令我開心的係足球，令我失落的，同樣係足球！參加過唔少比賽，但今次真係有好強烈的感覺，今年港專杯係我地的！到而家，3月都完了，都係一樣有呢個感覺！我地一場都冇輸過，但我地卻因為制度而失落左呢個出線的權利！我到而家都唔願意接受！

我生日的時候，就係一份驚喜，最驚喜唔係因為我女人送了部Wii過我，而係我同我女人開始解決大家溝通上的問題。如果我係超級冷靜，佢就係一個比較emotional的人。我一直都唔明點解女人總係要發自己男人老四，而對其他人冇問題。大家傾下，的確好好多了！呢個係生日月的大驚喜，比得到Wii係驚喜得更驚喜！

踏入月的下旬，我有了多一個堂細佬！係黎自大伯的！響今晚同阿麻慶祝80歲生日的時候，終於見到了呢個細細細細佬，嘩，似足大伯的！拍埋阿麻身邊，有種相映成趣的感覺！而呢種，係一種令人窩心的感覺！

上面係一種溫馨的窩心，而尋晚唔見到陪了我三年的銀包，就真係兜心窩埋我個心度的感覺！我唔係因為要補領呢樣果樣而覺得肉赤！而係我唔見了d相，仲有去睇最新一輯《男人之虎》的飛，仲有係我張馬仔卡！！！我有兩隻中獎馬響入面的！我仲差2場就G1制霸了！天呀！天呀！天呀！你點解咁狠心要帶走佢.............

再見了，我的一一一一馬房！

殺手九

2007-03-29T20:20:00.000+08:00

我師父，阿倫狄龍。

星期一同星期四，總係令人覺得好疲累！雖話好多時星期日晚同星期三晚播波，搞到第二朝唔願醒！但其實講到尾都係一個懶字！

不過講真，星期一同四，上4個鐘的英文，仲有2個鐘的Consumers Behavior，我都好鍾意好鍾意上的。其實都有點內疚成日呢兩日都唔返學！

星期一同今日我上足了！而星期一的Consumers Behavior，有個Psychological Test，得出黎的結論，我係一個冷靜、有創意、有interpersonal skill、well organizing 、好粗魯的人！而個Test話我知，頭三樣我都係果個性格中好極端的一群！

冷靜與熱情之間的分數，大慨係23左右，愈高分，你個人愈有Passion，反之愈冷靜。我得6分！Miss話未見過人做呢個test時，係得單位數字！證明我個人係極冷靜，所以成日唔返學，搞到學校唔畀我考試，我都係未驚過；而呢種程度，係去到殺手級的冷靜！我承認我人係好冷靜，以致我由細到家下咁大，都未打過交！(我講你都唔信！？)有事只會用腦或者人地雙手去解決！就算要打，我都要用兵器啦！拳頭交，有作為嗎！？

到今日，再上呢堂，Miss講廣告帶畀人唔同的聯想。佢又用左我黎做例：「如果講So-9，你會諗起乜咩？」

「踢波」、「阿Ling」、「唱歌」、「女人」、「粗口」、「曼聯」、「狗」、「唔返學」...

Miss則諗起「青松觀」！Oh！我的形象百變到咁！？而家仲可以做埋殺手了！

我諗自己會諗到乜？第一個反應響我個腦閃出黎，就係劉青雲響《呆佬拜壽》入面，最後返去招家時候，見到人就不停指住人講：「賤格！」「賤格！」「賤格！」

「賤格！」「賤格！」「賤格！」

如果有得揀

2007-03-24T13:56:00.000+08:00

出局到今日，都隔左兩個星期了！

兩個星期後，再返黎係龍踢波！Oh!今日竟然入左2球波！好耐都冇試過了！其中一球仲要係靚的！攝前柱撞入！但講真，陰影仍然係散之不去！

兩球波，其中一球兩星期前就搞掂了！

如果有得揀的話......

如果有得揀的話......操！

究極失望！

2007-03-14T09:46:00.000+08:00

星期六，雖然冇輸波，球差亦冇輸到，只係得球唔夠人地多！咁就出了局！！！

講真，我真係好失望！到而家，都五日了！雖然今次唔係第一次輸波，但感受的確好強烈好強烈！冇諗過第一圈就會出局......

五日了，我每晚一定會發夢，都係發第一場時，我頂波頂中柱角、頂高了；第二場頂得太正了、最後一擊射失了........

一得閒，腦海就浮現了呢d情況！

因為我真的真的好失望！好失望！！！

生日好快樂

2007-03-12T23:34:00.000+08:00

生日禮物打生日禮物

都唔記得由幾歲開始，我愛上了「21」呢個數字！所以唔理買六合彩好，揀女友好(女友係21日生日)，揀球隊號碼好，都要21號！

今年21歲了，更加的覺得係屬於自己的一年！首先要好感謝我一班識左好耐的好兄弟，同我食餐飯，雖然唔齊人，但真係好開心！多謝晒！

不過更想多謝我女人！前排其實日子真的好難過！但原來兩個人之間，冇乜唔可以傾的！問題大慨也解決了，細節就大家慢慢再遷就吧！

今日收到兩份禮物，先係我女人親手整的熊仔，再收到一部wii！收到的一刻，真係呆了：「你唔係送部機畀我下嘛！」

正如Zero所講，「呢d女人去邊度搵呀！」

對唔住&Thank You！

孱仔兵團，冠軍首選！

2007-03-09T09:56:00.000+08:00

今年我地要奪金！

上年既孱仔，得三個人識踢波！但你唔好理，我地都爆冷有亞軍！但我地絕對唔會滿足的！今年隊長已經唔係我了，而係轉了本身的隊長，即係粉果。唔好理邊個係隊長，今年我地的確係加強左實力，加入了一個快翼，快得好交關的家豪；加了一個體能爆了燈的後衛，又多了一個好拍擋！佢比我更兇狠！但也正正係我欣賞的一瓣！跑完十公里仲可以踢波的子健；又多了一個前鋒，把握力好唔錯的阿龍！

加埋keep返水準的粉果、我同Teddy！亦有進步了的Eric！當然還有不可或缺的肥龍、薜記、肥海！仲有努力進步中的謙謙！睇牌面係唔錯的！有正選之餘，每個位都有替補！

我唔想講那隊有香港09隊員的那隊係有幾勁！勁又點呢？我地d防守唔係流的！邊個勁，我地防線都有足足三個人可以鏟斷你地腳！未打又驚定先，點贏！？

我反要想講，我地一定要團結！！有私人恩怨唔緊要，你想殺左我老母的，都唔緊要！但球隊如果因為私人恩怨，而缺乏溝通，最後輸波的話就仆街了！有咩都好，響聽日，足球係至上！
I kiss Football!
I love all of you, teammates!

聽日，冇得輸，金牌會係我們的今年！！！

情深說話未曾講

2007-03-09T09:40:00.000+08:00

我需要的不是這樣！！妳都唔明！其實真係好無癮的！我鍾意講廢話！我鍾意有自己時間！我鍾意妳！但我唔鍾意咁！妳明嗎？

黎緊係大家的難關，可以渡過嗎？Hope so.

巴士阿叔

2007-03-07T10:45:00.000+08:00

上年hit過的巴士阿叔，名符其實係一個搞屎棍友！但其實佢係好成功的！因為我經常地一無聊，就上一上YouTube再重溫一下佢d名句！好記得好記得我老豆講過，呢個世界，係得兩種人出到位，一係主角，二係丑角！你明明做唔到主角，但又唔肯做丑角，咁就注定你上唔到位，仲要係成世果隻！

其實我覺得巴士阿叔都深明呢個道理！自從上位後，依然的不停攪小動作！好似扒王之王個老細肯請佢，佢就話入去做係為左搞人地個女！講真，佢一定知自己搞唔到啦，但又要講？因為佢知自己身份囉！

其實呢個世界係冇懷才不遇，只有唔認識自己同唔認識世界！真係好憎人怨天怨地！屌，你不如撞你個頭埋牆，死左佢好過啦！你睇下自己個樣，你做到主角咩？！

其實巴士阿叔，講d野都係幾有智慧的！我平時同屎人、童哥同龜頭鋤dee，都好用得著！

「屌呀屌呀屌，唔通打你兩鎚咩！」(講下粗口，都係發洩下之嘛！關你乜事！)

「我鍾意屌呀屌，你鍾意小呀小，屌人呢，就冇害既，呢d係中國粗口」(係囉，關你乜事！)

「你而家做埋d唔公平既野，係咪要同你傾下計呀！」(屌！係囉，你炒我做乜攬野！)

「你好好打咩屌你老母！？」(你仲炒我！！？)

「你知我乜撚野姐我屌你老母！」(咪係囉，炒完就算啦，仲講！？)

「第個就dup你既我話你知，你想隻dup就隨時！」(真係dup架啦下次！)

「何必呢？老友！無謂架，岩唔岩呀？」(係啦，都玩完啦！)

其實，講真，我對呢個巴士阿叔，已經真係有種迷戀的地步！響好多場合，我都用佢d名句！尤其響球場！肥仔都問過我，你唔怕畀人打架咩？講真，而家響球場，仲邊有吹雞架！係得把聲架姐！

點解話我迷戀巴士阿叔？因為我連呢d野都買得落！
真係未解決！

生日月．次章

2007-03-03T23:59:00.000+08:00

一入波，後面班YSB全部靜晒！！(圖片：sina.cn)

一年的球季入面，小弟最期待的，一定係曼聯對利物浦，聯賽的兩場主客賽事，如果足總杯、聯賽杯又或者歐聯都有對利狗的，都會十分期待！！無他，因為我憎佢地，所以都期待我的愛隊同我愛的一班球員，一年殺佢地兩次！


打死你班YSB！ (圖片：Sina.cn)

YSB (You Scouse Bastard)係一眾利物浦人的稱號，意思係利物浦的雜種！其實我老豆都係好愛曼聯，而又好憎利物浦的，所以呢一年兩度的時間，我地都會寧舍的緊張！寧舍的集中睇呢場大戰！

講返今場，曼聯真係幾乎幾乎輸，成場畀YSB壓住黎打！最後史高斯仲要拎埋紅牌出場！而老費又將豬維豬達換入黎。果一下，真係以為你老人家買了對家！而且YSB還踢傷了肥仔，搞到佢成腳都係血！不過YSB們點都諗唔到，佢地呢個舉動，係幫左我地！

因為肥仔踢唔到就換入了奧沙，而奇跡就響補時出現了！傑斯響左路進攻，畀YSB拉衫，而球證就畀個罰球曼聯！C朗負責操刀，大力抽埋龍門口度，YSB 撲出，個波就響離門六碼倒的奧沙腳下！Goal~!!!好波好波好波！殺左YSB了又一次，又一次係奇跡地！

而我，就不停的大聲笑！「哈哈哈哈哈，仲唔X贏你班X樣！！？贏第二隊都冇咁開心，贏呢隊X頭，我就最開心！！！哈哈哈哈哈哈哈哈哈哈！」我起碼對住我老豆重複左三次以上既說話！我講的時候，係攬住了我老豆不停咁跳！Yeah!!!!!

另外，我最好的兩個朋友，竟然都係YSB，我謹祝你兩位，早日回頭是岸！因為你地捧的球隊，係唔抵捧的！唔信你睇下！

時間返返去上年的1月23號，呢場曼聯對YSB，已經膠著左90分鐘，直到第91分鐘.......

李奧升起，銅頭一搖！會入嗎？.......

當然會！仲係網仔入！童哥，你記得嗎？我地係一齊睇的！你記得你係點離開的嗎？你那晚講到的，就只有「唉」呢個單聲而帶有傷感的字！

我地較快d個時間....去返上年的10月28號！

再次係李奧，再次的網仔入，唔同的，係用了腳！但我地還是贏了2:0！

仲有係傑斯，佢為曼聯上陣了700場！好多謝傑斯，你出道的那年，我成為了紅魔鬼，你已經陪了我有足足的16年了！唔係短數目！希望你可以踢足20年！多謝你！！

Thank you for great memories! Happy 700 playing!!

生日月．序章

2007-03-03T13:54:00.000+08:00

屎人：「你好好打咩！屌你老母！」(絕對唔係設計對白！)

生日月終於黎到了，總覺得2007年都係仲係岩岩黎到，但原來已經係3月！oh!又到我生日了！估唔到21歲的生日月，第一次踢波，就有咁多野好講！

一去到，成為左一球好靚組織的入球者，由我先響後場發板，傳畀左翼位的杰杰，杰杰再傳畀右面底線的家樂，家樂再即時的傳個波去遠柱的我，我好輕易的撞到了。呢個入波令我信心完全地大增，我完全的有信心mark住小明，mark住呢個同杜奧巴打法係完全一樣的人！呢場肯定地係呢一年踢得最好的一場！！

之後又發生了一d趣事，話說茄輪踢左個波出公路，之後仲畀車轆爆埋！而個波係人地隊的！班友就叫我地賠錢，一係就賠返個波出黎！最好笑就係，班傻仔講：「你地好快d賠，唔係我報警架啦！我地影左相！」

嘩！我X丫，響球場嗌報警，係我地係龍足球隊的專利，唔係你地d蛋散能夠做的事！況且我地係畀人打先報警之嘛！響呢個時候，大家都笑左出黎！而屎人就眾人皆笑佢獨走，原來佢去隔離隊班小朋友果度，40蚊買左個爛波！咁就仲好笑！果個波，一忽紅又一撻黑咁，班友吹到脹，但無奈自己又講過話要我地賠波，當然的O了咀！屎人加多句：「你又話要賠波，家下畀你又O咀！老友，算數，唔好投訴！」

呢件事，作為生日月的序章，好！

馬交兩日遊

2007-02-06T21:21:00.000+08:00

尋日我女友本身打算過馬交，同佢的同學玩下。點知有人臨時放飛機，當然就即刻去左頂呢個位了！

馬交呢個地方，對我黎講就係賭錢同賭錢的地方！我去了以往去過的葡京，一樣都係輸到仆街，買果瓣，就輸了果瓣！而新葡京卻下星期才開，唯有下次先去了！

之後又去過永利，又去了響「乙水」仔的希臘神話，果度真係不得了！有一d超靚既靚女表演，一個個SM皮裝、高跟鞋、短到冇得再短的熱褲，oh！條女突然撐大個脾！係一條喱士底橫！賭緊21點的我，真係完全的掛住了睇！

好彩冇畀佢分薄了贏錢的能量，足足贏了成千蚊！因為其實一鋪，買中了對子，一賠十一的彩金，真的好和味！！

之後第二日，去左金沙，真係好大好靚！我迷上了「加勒比海啤」，最後都係要輸，但呢個遊戲真係好好玩！

就只係兩日，我賭癮更深了！哈哈！

「再這寂靜的一角，有被遺忘者唱唱著...」

黐線，呢首鐵窗邊緣黎架大佬！

新囡囡

2007-01-26T23:19:00.000+08:00

我飛，我飛，我飛飛飛！

其實我同女友都係，對芝娃娃都可以話係情有獨鍾的！所以又頂唔順買了一隻返黎，呢隻比奶咀好好多了，睇落都健康好多，而且又精甩鞭，一凍又識自己卷埋一舊咁！所以都唔錯！

其實買返去，都驚骰仔會呷醋，點知又唔會，仲玩得好開心添！不過玩就有d危險！因為大家size相差太遠了！

真係差好遠，同完骰仔玩完，都要就返力同奶B玩！丫係，竟然唔記得講，佢叫奶B！用個「奶」字，係因為想紀念奶咀，而叫B，係因為佢仲細隻過奶咀！你可以當佢的全名係「奶咀BB」吧！但我諗佢應該係唔會理你的！

生日快樂

2007-01-25T09:28:00.000+08:00

最近都唔好開心，人的運都總係黑黑的咁！家中有Now TV的電影台，不停宣傳呢套戲！出品人曾志偉當然賣花讚花香，講到係近年罕見的愛情文藝片，如果喊唔出就真係唔係人。剛巧都疏通一下淚腺，於是就同女友入左場。諗諗下，拍左一年拖，原來只係我地的第四套，但竟然就係第二套的古天樂了。

整套戲都好慢，都絕不乏溫馨位。彼此相愛的小米(劉若英)同小南(古天樂)，佢地的相處中一舉一動、一言一語，都有一份難以形容的溫馨。但相愛而一齊唔到的那份無奈，只有最後數幕感受到，絕對唔夠深刻！

整個故仔，令人愛的除左係當中既溫馨，當中的配角都好正！吳嘉龍自龍鳳鬥再黎一次係黐情男人，good!

但總括黎講，有點失望！還有好憎恨女人要圍住「安全感」呢個問題發揮太多！冇安全感咪又係冇自信！香港女人，其實所有香港人都係，畀多點自信吧！

Work in Process

2007-01-23T10:24:00.000+08:00

網站工程仍然邊行，請等等！

So 9 嗡

有一種失落

啟事一則

一個電台節目

失敗並不可怕

Come on kick my ass now.....

負能量

向前看，2009！

今年，唔會再係銀牌

急屎學生字

就係呢種感覺啦！

返工了

十字路口

潮語作文

工程進行中

魘

有乜好睇！？

觸動，進步

唉...

舊屎

Double Double!! Again!!!

CHAMP10N of MAN. UN17ED!!!

反省

真係服得你好交關！

馬騮仔終於打飛機

XX三人組！

潺蝦

我個仔好開心！

始終最鍾意都係贏你地！

老麻子，八十快樂！

Special thanks to.......my BROS!!!

我家有一隻新BB

Say Goodbye to my 21!!!

好彩！冇行錯路！

The Bucket List

神與女人

多謝Jim Sir！你給我的總是驚喜！

心不在焉

過癮的一年

心死！

上報...

一則呼籲

暫告段落

I am the special one!

我認輸

敬請支持！

The best is yet to come!

半天假？半天價！

165.8!!!

工作月

胡九你是甚麼人？

輕取車仔！

摩連奴追悼會

捐血

小粉果！

出埃及記

一分鐘漂亮

食、色，性也！

性 工 作 坊 女 士 發 洩 對 男 伴 不 滿「 睇 AV 多 屈 人 性 冷 感 」

專 家 ： 欠 缺 溝 通

香 港 男 女 對 性 伴 侶 看 法

紫 藤 出 性 教 育 雜 誌

如果這一秒你跟我講你不愛我

如你有興趣 我對你講一下近況

兩日濠遊（二）

爆粗王

萬子哥！

兩日濠遊（一）

一條波罅

如果個天畀一億你（下）

如果個天畀一億你（上）

讀屎片

我欣賞你的過份！

陶 傑 短 評 ： 焚 滅 淫

新貨部筍！

做運動

孫耀威 - So Far So... Close(新歌+經典精選)

號碼

時辰未到！

以前...

性工作坊　女士發洩對男伴不滿
「睇 AV 多屈人性冷感」

專家：欠缺溝通

香港男女對性伴侶看法

紫藤出性教育雜誌

如你有興趣我對你講一下近況

陶傑短評：焚滅淫