Sunday, April 17, 2005
沙田馬場巧遇皮蛋黃 /11:58 PM
尋晚真係太累了!十二點就頂唔順
拿拿淋去訓,點知訓到四點又起左身
不過六點倒都訓得返,一訓就是十點鐘
不過訓醒都仍然覺得好唔夠訓
不過都冇得再訓,因為十二點又要開工
兩點收工,再梳下洗下
就入左馬鞍山探阿麻,聽講阿麻病左
不過今日佢地差唔多都好返了,好好精神
同佢講左陣買新屋既事,畀左d相佢睇
佢都好鬼鐘意!
說時遲那時快,老豆就打個電話黎,話間新屋firm實左
聽日要入錢落戶口落訂!
大家都好開心,因為我地都好鐘意間新屋!
真係鐘意想喊果隻!
響阿麻果到食埋din,食到8點倒
就走了,因為要去馬場睇波
於是我就搭巴士去大學,轉架的士去馬場
去到馬場,真係唔知響邊個位睇波!
原來響沙圈睇的!
去到就搵阿博啦,原來佢同Stephenie一齊買野食
之後佢出左黎join我
再之後,就去左馬會個投注站買野
我諗住買曼聯2-1 x 維拉利爾2-1,二串三咁啦!
我買完之後,對一對d飛
大檸樂!兩場個位填錯左!
買曼聯贏2-1,點知就填錯左輸1-2
買同維拉利爾同樣比數,又係填錯左輸同樣比數......
不過都費事補返飛了,因為冇錢!
之係就見到偶像黃興桂!即刻同佢say hi啦!
更重要既係,即刻同佢話影相!
江忠德見到我咁踴躍,即刻話開波前個訪問搵我做!
我又有得上電視啦!
但直頭close up既鏡頭,就真係第一次!
佢訪問我果陣,我又唔係話好緊張
但答佢野就係九唔搭八咁,搞到畀Kenny話我好騰咁
其實唔係架喎,哈哈!
畀江忠德訪問完之後,都捉住同佢影相啦!
佢真人係一點都唔肥,我覺得有d似咸契!
不過就高過咸契啦!
過多陣,都開波了!
今場直播係ESPN做,先發覺原來大佬瑜過左去做!
不過要聽佢旁述,真係好惡頂!
佢一邊講,我同阿博就一邊笑!一邊串佢九唔搭八!
講返場波!今日成隊波都虎虎生威!
曼聯精神終於返黎!成隊都好肯走!
最開心既係,雲佬今場好fit!
自上年9月28號(嘩!半年啦!)之後,最好既一場!
佢成場都好勤力!射開意慾都好好!!
上半場,佢同史高斯各入一球!
曼聯以2-0領先!
而馬會既中場賠率,紐卡素由6.5倍,急升到201倍!
而曼聯就由1.45跌到1.01
即係買十蚊賠一毫!
當然我就冇買啦!
而阿博就請我飲左杯啤酒!
杯啤酒真係好大杯,一杯我諗有罐半倒
因為我地睇波既沙圈,唔畀人食野!
結果就要十五分鐘內飲晒呢杯beer!
大家都知,我平時生活健康,滴酒都不沾既!
咁飲法真係有d難度(哈哈哈哈....)
飲緊既時候,都有好多馬會既cameramen影我地
其實我頭先填緊飛既時候,都畀左佢地影左一次
我仲同鏡頭笑,哈哈!
半場完,落返沙圈睇波!
冇耐又話雲佬入多球,3-0!
咁都好d,即係我冇填錯飛都唔中!哈哈!
畀人追返粒之後,C朗入多粒,曼聯贏4-1!入決賽!!!!
打到一半果陣,有班馬會人,搵左kenny
叫佢上鏡,一齊叫口號!
支持曼聯贏足總杯!
Kenny就搵左佢個fd、我、阿博同阿傑一齊叫!
佢個fd同阿博、阿傑就叫「雲佬有入波,曼聯冇甩拖!」
我同Kenny就大叫「曼聯捧硬足總杯!」
我最後再大叫「首名入球,買硬加利仔!」
呢個廣告如無意外,將會響5月21號果期出黎
即係我又會再上電視了!哈哈!
講返場波,今場曼聯真係返晒黎!
個個都肯不停走位!製造到好多空位出黎!
令整個進攻節奏,都十分明快!
更開心既係,傑斯同費查,出返黎了!
5月21,曼聯捧硬FA cup!
|
|
|
Peter叫我香港加利仔!哈哈! |
|
|
|
|
|
睇完場波之後,留左響沙圈
黎幅超大型合照!
之後好多人都走左,我同阿傑、阿博就比較遲走
因為再想影多幾幅相!
但原來黃興桂上左第一部team coach
而我地就上左第三部!
冇幾耐,就落左車,有d更驚喜既事!
原來Peter坐左響度,自備左一相,係佢同林伯特既合照!
之後就逐個問我地叫乜名,然後就寫我地個名去幅相
再寫一d內容畀我地!
而且佢份人好率真!我地問佢係咪畀球迷投訴得多,所以冇得講曼聯?
佢就話,公司入面,總有人想陷害你,想你死,夾硬入你罪,第你慢慢就冇得撈!
哈,呢d都講得!真係好真!
佢仲同我地講,歡迎我地搵佢做訪問!
如果時間許可,下次親身黎我地睇波活動都得添!
呢個60歲既老人家,真係好可愛!好nice又好有心!
搞到我今晚都鬼死咁開心!
黃興桂簡介:
英文名Peter Wong,人稱「皮蛋黃」。79年轟動一時的「三狼案」中,
慘遭撕票的商人黃應求乃其父親,曾任香港甲組荃灣、南華的主教練。
亦是南華會百多年歷史中,唯一一個曾令南華需要降班的主教練。其最為
香港球迷熟識的,乃是其旁述時自創的「金句」。筆者最愛的有:
「加利仔有三大缺點:冇速度、唔夠快、跑得慢!」
「十二碼有兩個可能,一係入,一係就唔入!」
「拿!球迷們,足球就是這樣的!」
「愛華頓呢隊波蔗渣既價錢,但係踢出燒鵝既味道!」
「史高斯呢球,其實好有機會入,但佢冇機會起腳」(聽過一次,但好深刻!)
「現代足球,最緊要....(好多配搭)」
另外皮蛋黃還有「燈神」之稱號!因其在報章專欄上,估波經當開對家。
據網上一些統計,他在37次估波中,有24次是開對家!「命中」率奇高!
但筆者最欣賞乃是其樂觀、豁達的性格!故特意呈上兩篇皮蛋黃的訪問!
希望各位喜歡,並有所得著!
Labels: I am who I am, I Kiss Futbol, 吹水唔抹咀
0 had their say | have yours?
黃興桂:我自己都輸 /11:43 PM
貼士狂輸被封燈神 黃興桂﹕我自己都輸
【明報專訊】貼波中逾7成難,貼唔中逾7成同樣難。一向語出驚人的足球評論員黃興桂最近就因為貼波經常「開對家」,被球迷冠以「燈神」(如明燈指引球迷投注)的稱號。有球迷在網站「開壇供奉」為他作統計,甚至有人將主禱文改寫成稱頌「燈神」的內容。
對於球迷的種種批評,60歲的黃興桂一笑置之,他說﹕「這世界總有10個人鍾意你,11個人唔鍾意你。如果那麼容易受人影響,就不是我自己。」他補充﹕「我覺得做人最緊要對得住自己、不做壞事,講波講錯或貼波唔中都不算是壞事。」
網民「開壇」供奉
有 球迷為他最近33場的貼士作統計,結果逾7成的24場「開對家」,上周他推介車路士,結果拜仁最後一刻神奇反勝,貼大熱祖雲勝利物浦,最後又只能和波。黃 興桂承認貼波很難,若可以貼中7成,很多人都不用工作。他表示﹕「貼不中我都沒有辦法,我自己都有買,自己都輸。其實這個世界沒有人不想威,我都想中,不 過有時在報章的專欄屬擂台戰,要貼不同的聯賽,除非你專注某幾個聯賽,否則唔中亦不出奇。我有時候也會貼中,不過,我只會說是幸運。」
他 舉例上周車路士對拜仁的賽事,車路士可以說是坐和也不會輸,怎料最終落敗,實在是時也命也。他說﹕「如果讓我即場看一場比賽,我很快就可以評估出誰勝誰 負,單靠賽前的資訊來預測是很難準確,因為許多教練都喜歡在賽前放煙幕影響判斷。前幾天祖雲達斯對利物浦,我便推介祖雲達斯,但開波不久我就知道自己在這 場賽事又會觸礁,因為我看到迪比亞路的表現實在太糟。」
Peter黃喜歡賭馬多於賭波,但他不認為這影響了估波的準確度,他說﹕「我喜歡賭馬是因為可以小博大,賭波賭1元才贏1元,而且整場波每分每秒都在折磨自己的細胞,賽馬最長的比賽亦只不過是兩分幾鐘。」他表示平日收到不少球迷傳真,有讚也有彈,這位「燈神」都已看化了。
Labels: I Kiss Futbol, 吹水唔抹咀
0 had their say | have yours?
黃興桂訪問 /11:41 PM
做個快活人黃興桂:足球是財源是樂園
當黃興桂以「八股」語調,時而「九唔搭八」地講波,球迷捧腹大笑之餘,該會想像他是個爆笑阿叔。實情是,黃興桂年少喪父,還要是很轟烈的那一種,結婚5年的太太又死於空難,很多人都無法再笑了,他卻努力讓自己快樂,起碼表面如此。「這些遭遇,讓我覺得人生無常,所以做人一定要開心,我所做的事、衝口而出的金句,都只是隨心而行。喜歡我,我好多謝;挖苦我,都無所謂。」
人稱「皮蛋黃」的黃興桂,開心形象令他深受友人歡迎,這次從工作基地新加坡(ESPN總部)回港小休,友人不斷來電請吃飯,訪問進行中,他已安排好一晚走三場飯局。
「我今次回香港,有五成是為了幫你做這個訪問,多謝你地咁俾面。」黃興桂說話時聲浪震天,但又客客氣氣,逗人歡喜,這種道行大抵就是他相識滿天下的法門。
亡父黃應求在50年代已經贊助傑志、中華足球,那是姚卓然、莫振華的黃金歲月,其家族是球圈的活躍分子。在美國唸書的黃興桂,每到假期便拖著爸爸看球,自幼與體育圈相熟。
後來父親橫死,黃興桂長大後希望進入足球圈,在黃文偉、故友簡而清等的幫忙下償了心願,「我對他們永遠都心懷感激。」
ESPN任職金句源源不絕
78至90年間,黃興桂先後出任東方、南華、荃灣的教練,90年忽然懷念北美的悠閒生活,加上九七因素,便移民美國,在貿易公司謀了一職,兩年後興之所至,做中間人開辦美國世界杯睇波團;95年受聘ESPN,做其全職評述員,憑著講波時源源不絕的「金句」,另類風格,輕易成為球迷的話題。記者都拋句孔子金句,形容球迷心情:「愛之欲其生、惡之欲其死」。
熟悉他的朋友,就知他是半個鬼佬,尤其談到愛妻死亡、事業上的挫折時,
情緒激動就會忽然變成英語對白。他的半鬼背景,說明他何以講波時,有時會咬字不清、有時會用了莫名其妙的形容詞。
「皮蛋黃」足球語錄
互聯網流傳的「黃興桂足球語錄」,有網友打哈哈,但也有粗口問候。把語錄列印給「皮蛋黃」黃興桂看,他笑說早看過了。
「我每句話都是隨心隨意,由於我受美式教育,中文麻麻,思考都是用英文的,有時把句子直譯中文就會出現好笑效果。世界著名評述員馬田泰拿便有很多佳句,又有很多運動員本身具大學程度,評述時都有精警句子,我聽多了,不自覺便會運用。還有一些句子,是童年時聽爺爺說過,我很記得這些字眼,講波時又會自動冒出來。」
原來是童年回憶,難怪他別有滋味。
「用蔗渣價錢,踢出燒鵝味道。」黃興桂解釋,做廠的爺爺說窮人用蔗渣來做鞋子,令賤價形象入了腦,「燒鵝是我自己加的,細個時覺得燒鵝好好味!」
「呢位球員打法好經濟。」黃興桂說,外國人會用經濟(economy)形容踢得「輕輕力」,求求其其。
「呢場賽事已經放入雪櫃。」緣於NBA至尊級評述員的名句(The game isin the refrigerator),下文是「ぅ喱、牛油都雪硬了」,即大局已定。
其他金句:「呢球波,如果冇龍門就入啦!」「12碼呢樣,一係入,一係就唔入。」「呢球波一係入,一係龍門救到,一係出界。」「保方保方,保住後方。」
未能盡錄。
笑過罵過的球迷,若干年後,這將是我們的集體回憶,信不信由你。
講波分享球員教練睇法
「我都知球迷對我的看法很極端,喜歡的會記得我教東方時拿了好多獎杯,討厭的,就罵我教到南華降班。」黃興桂一點也不動氣,「我熱愛足球,因為它是快樂來源和財源!我講波是想分享作為球員、教練的睇法,我很享受這份工作。」
熱愛賭博玩意的黃興桂,回香港不忘買本馬簿鑽研,「新加坡都有香港馬賭,我都會玩一百幾十,賭波都有,但比較少。」
說著說著,想起一番偉論,吩咐小記無論如何要寫下:「踢波的是人,人不是上帝,總會有高低潮,佢都想踢好波,但踢不到都無辦法,球迷豈可因為自己估錯,便把責任推在球員、球會身上?如果真係覺得球員打假波,點解唔買對家?點解仲要賭?」
老婆空難死女友一籮籮
長居星洲的黃興桂已經完全習慣炎熱氣候,閒時聽爵士樂、賭幾手,還會「識d馬拉female」,即「拍散拖」。黃興桂太太不幸於82年在美國死於空難,當年他忙於工作,太座獨個兒旅行,連如此罕有的災難都碰上,黃興桂雖未致心如止水,但再婚難免存有陰影。
據黃興桂所講,女友一個接一個,「當然依家追女仔難度高,老嘛!」有時會想到結婚,但過不了多久便改變主意,他展示了女友的照片,年輕貌美,恨死隔籬,但他不許刊登,他笑說擔心見報之日,已經換了畫!「尹佬(尹志強)話,PeterWong結婚是最信不過的消息。」
與「三狼案」之不解情仇
發生在59年轟動一時的「三狼案」,3名綁匪綁架富商黃應求,在人間蒸發年多以後,綁匪再擄走其父黃錫彬。黃應求不幸被撕票,警方對緝兇本來茫無頭緒,但匪徒竟當街發生爭執,「鬼拍後尾枕」自爆身份,案件水落石出,「三狼」被判環首死列,是本港最後一次執行死刑。受害人黃應求育有五名子女,長子正是黃興桂。
面對即將八十大壽、精神爽利的黃老太,實在開不了口重提舊事,倒是黃老太主動說起:「你知啦,佢爸爸去得早,我一個女人帶住幾個孩子,日子好難過。我有美國籍,於是把他們全部送去美國讀書,依家仔女分散到新加坡、夏威夷、上海,我就四圍飛。」
要謀生甚在乎薪水多寡
家庭劇變後,黃興桂說長輩沒有收緊他的自由度,大學畢業後便讓他自行選擇職業,他對足球、籃球、棒球興趣特濃,但香港只有足球進行職業化,故決意走上教練之路。
「有些老闆因為我的背景,以為我是有錢仔,唔使做,要我收順d。其實,家族的光輝已是很久以前的事,我們本來就不是大富大貴,後輩都要努力打拼,所以我
是很在乎收入的。我是在謀生,不是鬧著玩!」「有時看到影片重拍《三狼案》,把家人溫和的個性都扭曲了,幸好我是個心智正常的男人,我照舊去看,當作睇古仔。」
Labels: I Kiss Futbol, 吹水唔抹咀
0 had their say | have yours?