Friday, September 29, 2006
心境老 /11:38 PM
人老左,心態自然唔同
今日去左「健康工房」,又飲左一劑苦茶,老婆笑我老餅左。其實諗諗,又係事實喎!
以前出親街,實要gel到頭衡一衡,家下求其ok就算啦,原來過左去到邊都要執到正一正的時期了;以前覺得星期六、日留響屋企好傻仔(其實以前咁諗真係好傻仔),冇野做夾硬搵d野做,夾硬搵藉口出街,但而家真係覺得有時間在家休息下就夠了!個心淡如止水,一點「野」的感覺都冇;最近仲要覺得西藥一點都信唔過,次次都話要睇中醫,飲苦茶先會好!
記得幾得月前,同阿茵出街,佢笑我老了!其實我當時都不以為然,但到今日,真係唔到我唔認了!
Labels: I am who I am
0 had their say | have yours?
Thursday, September 28, 2006
麗晶大賓館Buffet /12:11 PM
成間酒店,竟然最好食已經係呢三杯外來既雪糕...
老豆一個月前,畀左兩張coupon我,兩張一樣,都係去荃灣的悅來酒店的免費兩客Dinner Buffet,但就十月前到期。於是就搵埋家姐同佢男友,加埋我老婆,就一行四人的食返餐。
入到去個環境其實都好唔錯!樓底非常的高,令個感覺非常十分的舒服,一點兒壓迫感都冇!另外又有一部投射電視,今晚就做Michael Jackson的演唱會,感覺的確有d High!MJ雖然樣衰,但佢的而且確係舞台王者,你睇到佢的舞步,真係會完全的吸引住!響未進食任何野之前,就好似楊利偉的名句一樣:感覺良好!
|
|
|
朱古力生果,即係屎一篤...
|
|
不過食過野之後,個感覺就完全唔同了!我去食Buffet,最愛就係生蠔,但呢度d生蠔,竟然有鐵味!魚生唔知係咪畀燈管照得太耐,竟然係暖的,三文魚而是,北寄貝如是!好在拖羅就響一個冇咁猛燈光的位置,所以都仲係ok!熟食方面,更加係完全徹底的失敗!最好味就係飯煲出黎的「絲苗白飯」......
而甜品方面,有一d既蛋糕仔,其實就係一d cream加響塊餅入面,而塊餅響口感,就好似細個成日會食的花塔餅(肚臍餅)咁,我係指花塔餅上面的果舊類似屎的物體果舊!呢舊野咁怪,其實已經算係全部甜品中,比較好少少的一樣!最好味的,竟然係Wall's杯裝雪糕!我的天呀!而最唔掂的,就係右面果篤野,果度有一部朱古力機,有源源不絕的液態朱古力流出黎,你可以用生果或者綿花糖去點黎食!唔駛問,又係反胃之作啦!
好彩我地係免費,唔係就盛惠259一位!不過我見個個都係拎Coupon黎食!其實今日的感覺,就好似《國產凌凌漆》入面,星爺落到香港,滿懷期待的心情,去住麗晶酒店,但點知原來司令只係幫佢book左響旺角唐樓的麗晶大賓館一樣,吹到啤啤聲!
不過今日都唔係完全的冇收獲,呢間「麗晶大賓館」的「人民飯堂」側跟,有間性商店。入面的野千奇百怪,有何B仔型的唇膏、兩性性器形狀的蛋糕、奇形怪狀的吹氣公仔......真係好多!原來一條假撚,最靚的要成1500蚊!嘩,唔知係咪貴過叫鴨呢!哈哈哈!
呢日係9月28日,雖然我打已經係10月13了!但我都要同陳小姐講聲,生日快樂!Good Luck!
0 had their say | have yours?
Sunday, September 24, 2006
萬世歌王 /11:59 PM
由《
買兇拍人》開始,已經好留意Jim Sir。所以上年一知道Jim Sir要上《
男人之虎》時,做野完全冇幹勁的我,都即刻地去通利度買飛,結果好順利,成功買到頭場的《男人之虎》。(《男人之虎》已經公演左79場,黎緊29號,又會開始第五度公演,直至到10月8日,如無意外,演出場數將會突破100大關,去到第104場!但Jim Sir都宣佈左,第五度公演已經賣晒!)記得果晚,我見到林嘉欣在場迎賓(佢係Jim Sir的弟子),又見到好樣衰的快必,仲有粉厚得好過分的容祖兒!不過更記得係Jim Sir拍案叫絕的演出,既切合社會時弊,又不失好笑的演出!更重要係,我真的迷上了呢個演員了!佢成為我心中愛欣賞的演員,只要有佢份的戲,我都一定會睇!
五月時首度公演《萬世歌王》,因為知得太遲而錯過左!家下再度上演,真係拿拿淋去買!個半月前,終於的買到今晚的飛!
等左九年咁耐,終於去到今晚了!幾乎因為老豆同阿妹遲到,而要遲13分鐘入場,好彩就岩岩好入到去!一開始,Jim Sir就扮郭富城跳左兩隻舞,《對你愛不完》同埋《聽我講》,兩隻都同舞王跳得一模一樣,一開始已經帶起左個氣氛!
講明係「萬世歌王」,再加入左對香港樂壇非常了解的林奕華做導演之一(另一係Jim Sir本人),唱歌當然就係呢一套劇的最主要元素!全場唱左幾多歌,講真唔知亦數唔到,但有幾個真係好突出,好似要退出樂壇,又轉眼復出的一個(梅艷芳?),狠批樂壇千篇一律,所有野都係形式化,其中一樣,就係「K歌」呢樣野,所有歌都要填到d詞滿晒、順口咁。Jim Sir雖有此慨嘆,但覺得而家係咁都冇計,用一個固步自封女教徙講,新野你可以不滿,但唔可以完全抗拒,始終凡是都有好的一面!(這就是我的「灰色論」,世界只有百份之一係絕對黑,百份之一係絕對白,另外淨返果九十八份,都係唔同程度的灰色。)但當然,Jim Sir覺得只有K歌的香港絕對唔健康,應該要多一點既選擇!
除左講要接受新事物外,記得阿傑睇完《萬世歌王》之後,講呢套劇最強調係自由同選擇,選擇響前響已講;而自由,Jim Sir就用了佢一個響英國教佢唱歌的老師的一句話,要做「萬世歌王」,最緊要就係「Freedom」,即係「自由」,Jim Sir話響唱歌黎講,就即係「話知佢」,佢唔要全部都係K歌,佢要自由!佢拎Janice的歌黎亂唱,用極端的手法去追求「自由」。
而除左呢兩樣外,我覺得Jim Sir更強調的,係「我」!仲播了張國榮的「我」,全場得呢一首醬係可以唔係佢唱而又唱足全首的!呢首歌,我其實響哥哥未死之前,已經好鍾意!
《我》
唱:張國榮
詞:林夕
曲:張國榮
編:趙增熹
I am what I am
我是我 多麼特別的我
多慶幸 大地有不只一種足印
神做世人 種種色色都有他公允
我很慶幸 站在我屋頂快樂做人
拿著我心 告訴世界何謂勇敢
我是甚麼 在十個當中只得一個
葡萄園裡 響起水仙子的讚歌
我是甚麼 是萬世沙礫當中一顆
石頭大這麼多 我也會喜歡這個我
我很慶幸 萬物眾生中磊落做人
懷著誠懇 告訴世界何謂勇敢
我是甚麼 在十個當中只得一個
葡萄園裡 響起水仙子的讚歌
我是甚麼 是萬世沙礫當中一顆
石頭大這麼多 感激天生這個我
我愛呢首歌的,的確就係詞填得好,據聞亦係張國榮最滿意的自己作品。Jim Sir話,香港人、中國人唔岩聽呢首歌,中國人太重視整體,普遍唔重視個人。香港人,畀d信心自己,要日日都信心爆硼先得架嘛!自己係獨一無二,千祈唔好睇小自己!
講返Jim Sir的老本,形體動作,依舊突出,歌係表面的主題,但始終形體動作才是佢值錢之處!今次佢比《男人之虎》時,玩得更堅,已經唔係逐個逐個角色的出場,玩到同時間扮Cookies九件女,每件唔同表情特徵;玩到做人格分裂,同時扮一男一女造愛、同時扮一男鍊頸,一女作出反抗;玩埋觀眾一份,搵個呆呆地的觀眾上台,玩Dino遊戲的變形版......所有都令觀眾忍俊不禁!創意十足的佢,為左配合主題,特登整左首《千山我獨行(n年劇集楚留香主題曲)英文版》,用返原來的歌曲,配上英文的歌詞,全部都絕對岩音的!唔信大家上
百度Download返隻中文版,睇住下面的英文歌詞,用英文試唱!
《Thousand mountains I go alone》
Ah~~~ (呀呀呀~ 呀呀呀~ 呀呀~ 呀呀呀呀~)
Ocean wash my heart and chest (湖海洗我胸襟)
Mountains follow my shadow (河山飄我影踪)
Colour clouds want to go dont go (雲彩揮去卻不去)
Win a body clean wind (贏得一身清風)
The dust never touch my heart (塵不沾上心間)
Emotion never to my soul (情牽不到此心中)
Come and go being com for table (來得安去也寫意)
Never say life is painful (人生休說苦痛)
Easy come and easy go (聚散匆匆莫牽掛)
Don't remember the problem hero made (未記風波中英雄勇)
Let the big name pass it away (就讓浮名輕拋劍外)
Thousand mountains I go alone (千山我獨行不必相送)
Ah~~ Ah~~ Mountain i go alone (啊 啊 獨行 不必相送)
而Jim Sir十月同佢老婆將會回歸草根(藝術學院、演藝學院始終都係高一級的感覺),去到葵青劇院,做一套叫《
廁客浮士德》的,最貴飛都係300蚊,但學生冇半價。
另外就係我比較大興趣的《
棟篤交響曲》,雖然係貴d,要成420蚊一張,但我真係好想睇下嚴肅的交響樂,點樣溝埋搞笑的Jim Sir!而呢套野的另一主角葉詠詩,記得以前響中七做闊讀理解,睇過佢的介紹,係音樂世家出生,老豆以至佢地四姊妹(定唔記得係三姊妹),都係香港頂級的音樂家!呢一段零碎片段,令我更想去睇!
但...冇錢啦...
Labels: 戲言一下
0 had their say | have yours?
Friday, September 22, 2006
執屎俊~~~ /3:46 AM
|
|
屎人:小你呀收皮傑!夜媽媽響我朵! |
|
岩岩同老婆帶骰仔散步,順便諗住去買下野食咁,行到屎人樓下的一段單車徑,我想起了屎人,為左抒發一下我對佢的掛念,於是響深夜兩點幾響街上大叫:「執屎俊~~~~~~~!」個「俊」字仲要拉到好長下咁樣!
之後樓上面就有d人小我,咁夜都嘈生晒、問候我娘親等等...
原來其中一個回應我的,係另一邊響單車徑上面拎單車踩的一個中年漢。佢踩架單車去到我面前,咁岩骰仔就行左過個中年漢果面,咁我就嗌骰仔咁啦!
點知條中年漢又玩埋一份,拎個電筒出黎照骰仔,嚇到骰仔走夾唔抖!但條友仔意猶未盡,一路行就下路跟我大嗌「執屎俊」、「執屎俊」......前後都嗌左五、六次!而我同老婆,好當然地,就匿埋了笑啦!哈哈!笑到我「mud」左響度!
好!下次又玩過!
Labels: I am who I am
0 had their say | have yours?
Monday, September 18, 2006
紅魔首敗 /12:29 PM
吃一記悶棍。(圖片:中國新浪網)
去到第五場聯賽,曼聯終於要輸了,只係輸的對手係阿仙奴,感覺真係唔好!傑斯、朴智星等重要主力缺陣唔係輸波原因,人地都有雲佩斯同亨利缺陣,如果要賴人腳唔齊,真係只會畀人笑你冇o者架唧!
|
|
|
叻仔,第一次出場就救到十二碼,錫晒你!
(圖片:中國新浪網) |
|
其實今場一睇條中場條,就知死係遲早的問題!我認為現時曼聯中場最搶得既費查,又畀人屈左去打右邊,用一個紙板人奧沙黎同人鬥搶中場!抵輸!今場點抵輸我都唔想講咁多,心情的確好納悶!不過響西布朗借返黎新龍門古斯錫真係ok,踢到上晒身咁樣,十二碼都救到!雖然最後都要輸,但呢條友仔響呢場波的表現,的確有一種眼前一亮的感覺!加埋外借到愛華頓既候活,仲有外借到屈福特的賓科士打,曼聯真係唔愁門將的位置!如果下年兩位外借出去的龍門會返黎,古斯錫又留響度,雲達沙又會未走的話,就足足有四個唔錯的龍門!不過如果下年d後防仍然係好似今場咁發晒夢,亦都係冇用!
今晚雖然輸左,而且利物浦都輸了!阿Q精神d,都有個安慰獎既!至少在我黎講!
Labels: I Kiss Futbol
0 had their say | have yours?
Friday, September 15, 2006
桂神又一金句! /2:19 PM
一面之緣 前幾日的車仔都不來梅比賽中,黃興桂又一金句!
「……相信呢 車路士出番依個彼德……施治會好好多 畢竟古迪仙尼都只係比較靈活 拿 你睇下依球手鎚呀 真係龍門生得矮d都打唔到呀 施治呢 我相信佢打多車仔兩年既 就會開始……」咁我就諗佢係咪想講過多兩年就係世界級龍門呢?但係而家都已經算係啦點知佢係講……「……就會開始……甩頭髮架喇 你睇佢今年既頭髮都已經少過舊年架喇」你好野!皮蛋黃,你咁都諗到!
(綠色字Copy from 高登討論區)>>
當年馬場遇見皮蛋黃>>
皮蛋訪問 1>>
皮蛋訪問 2Labels: I Kiss Futbol
0 had their say | have yours?
Thursday, September 14, 2006
香港地震 /11:52 PM
震央遠成咁,唔怪得我feel唔到!(圖片:東方日報) 香港發生黎克特制3.5級地震,據聞高過2級就叫「有感地震」,但今次3.5級我都feel唔到佢震乜野!其實「黎克特制」呢家野,如果我冇記錯,每高一級,就等如之前果級的二次方,即係七級既二次方,先等如八級,八級既二次方,就係係九級!
其實如果呢件事,發生響日本、菲律賓的話,根本就係小事一樁!夜晚同童哥icq,童哥話香港都地震,係咪世界末日呢!我只能回答:你黐左!不過如果就算係,更加應該及時行樂啦!
Labels: 吹水唔抹咀
0 had their say | have yours?
Monday, September 11, 2006
北京手信 /12:57 PM
北京的黎明,等待升旗的一刻,係幾靚的!我都經歷過,不過好凍! 北京,呢個地方對我黎講都幾特別,除左我第一次搭飛機就係去呢度之外,都因為係我同老婆相戀的地方。岩岩的星期六,老豆同佢的四個同事,五條友仔發姣發凳的上左北京!而老豆就買左三件手信過我,而其中兩件係咁樣的:
大家一定以為我好唔鍾意呢份手信!其實我係好鍾意改革開放(1978)前的油畫。事實上我覺得呢d油畫好特別,有好味道!呢幾年都見到香港好多廣告,都用左呢隻styel黎做廣告!記憶中有線就玩過幾次了!但其實我鍾意呢隻styel,卻唔太鍾意呢兩幅的message,我對老毛都幾反感,不過作為一個民族主義者(我得承認我愛國),我更討厭外國人!其實老豆買呢兩張野畀我,都唔係冇道理的!!事關我上年同佢去過摩囉街,見到一幅反美的poster,我其實係想買的,但頂佢個肺要$380!最後當然冇買!但認識我的人都知道,我一定地會偷.......拍左落黎啦!就係呢幅啦:
Labels: I am who I am
0 had their say | have yours?
Sunday, September 10, 2006
松屋 /11:56 PM
因為老婆的家姐有vip卡,尋日就用佢的vip卡,黎到呢間響柯士甸路的日本菜食餐Buffet!一入到去,就覺得個地方有點兒簡陋,就如
Openrice.com上好多食評一樣,話呢間野既裝修,仲差過茶餐廳。唔少食評都話呢間野連食物都好差!我入到去食頭幾樣都唔太ok!
|
|
|
真係夠膽死一碟一舊! |
|
|
|
|
|
事實上佢有分三樣野畀你order的,每樣都有一張紙畀你點野食的,一款張魚生、壽司;一張係一品料理,即係沙律、飯、金菇肥牛卷等;最後一張就係串燒,有燒粟米、肉等等例牌野,又有我好喜歡的特別野。其中大蔥豬肉、燒蒜頭、燒大蔥、燒雞胸軟骨等等。
一開頭就叫左d炒雜菇同三文魚等,炒雜菇唔夠熱,三文魚又唔夠鮮咁,最搞笑你響單上寫「1」,佢就真係畀一件野響一張碟上面,真係幾吹漲的!
不過慢慢食之後又發覺d野唔係咁差,第二轉既三文魚明顯較之前鮮甜,另外赤寄貝同白拖羅等都非常鮮!但要頂佢的就係甜蝦冇刺身!要迫我食埋舊飯落肚!不過都唔係乜野都大損失丫!因為呢度的甜蝦的確唔多得!而一品料理方面,我覺得一般,但個蒜蛋牛肉飯的確都幾香口!其他果d都冇乜突出,尤其千祈唔好食果個炸餃子,硬過你個頭!而d串燒,除左燒粟米之外,都非常好,我推介大蔥豬肉、燒蒜頭、燒大蔥、燒雞胸軟骨,仲有燒鵪春蛋!好唔錯!
最後service方面,我覺得唔錯的的確!d waiter有講有笑,做野又快,最後仲唔問我有冇vip都畀左個七折我,就送左兩杯雪糕同兩杯布甸畀我添!最後388兩個,除返一個都唔駛200,都算差唔多!第日返學,其實都可以落返去食個平平的午市,扮下poly學生都好!哈哈哈!
Labels: 食.玩.糞
0 had their say | have yours?
賭(倒)神上身 /3:13 PM
尋晚同左屎人、童哥、龜頭鋤左成晚dee,第一鋪就拎了同花順,玩左成晚拎左五次順!講真,有晚一日都未必拎到一次!另外又拎到四條2!我F.3之後第一次鋤dee拎到的!都係我呢世人第二次!但成晚d牌就一期好一期唔好,無啦啦畀人屈左兩鋪機,輸左兩鋪39!又講真,我呢世人都係第一次畀人一晚炒兩鋪!
仲唔係畀賭神上身?唔止!仲有倒屎神!
Labels: I am who I am
0 had their say | have yours?
Saturday, September 09, 2006
車品品重開! /11:52 PM
星期四晚無無聊聯的上左
Openrice.com,諗住睇下近期有乜好食,點知上一上就有收獲!之前執左的好好味小食店,車品品竟然搬左竇重開!而且一眾既食友都話水準冇變!尋日即刻同老婆去食!
尋日真係好好彩,有新鮮炸起的豬油渣,呢個唔係日日有的!拎黎浸湯食,有d煙肕,又有d脆口!正!
我最愛就係呢碗魯肉餃!哈食淨兩粒先記得影!佢面層用一層好好味的調味粉響面(後來知道左係蝦籽),一層厚薄適中的粉皮包住,入面包住一d魯肉!頂!打打下又想食!
另外呢個魚肉翅,都係幾好味,佢同出面比都係高於average,但同呢間最出名的,我覺得就唔夠突出啦!!
仲有呢兩杯金牛(忌廉加雲呢拿雪糕)同黑牛(可樂加朱古力雪糕),一倒d可樂落去,不停的起泡,口感好好!
其實去車品品,真係要食蘿蔔,可以整到好鮮甜,而且又可以整到冇渣的!真係好正好正!仲衰唔記得影落黎!頂!呢個真係要食!
就係因為尋日的好食,老婆話今日要再去!雖然去到都只係七點幾,但已經冇左魯肉餃同豬油渣了...雖然仲有蘿蔔同兩隻牛,但都係有點失望了....
Labels: 食.玩.糞
0 had their say | have yours?
Lack of confident... /1:45 PM
今日踢波仍然係踢到一pat屎咁,但都叫比上星期稍稍好少少!不過距合格根本差超大段的距離!作為後衛的我,竟然經常猶豫!九哥,你猶乜溝呀!你點打後衛呀!!
下星期!下星期我一定踢得好好睇睇!
Labels: I Kiss Futbol
0 had their say | have yours?
Friday, September 08, 2006
未足秤 /11:40 PM
144啦!仲差六磅都唔夠咋!!
今日同好耐冇見的狂呼榮傾左幾句,佢唔知響邊度得知,我家下瘦到得返排骨!不過呢個已成過去,今日磅一磅,雖則都唔夠秤,仲距離我心中既理想磅數都有差唔多六磅,但應該一個月可以完成任務!!
好鍾意狂呼榮的一句:「你肥過癮d!」
喂,點只d呀,係過癮好多!
Labels: I am who I am
0 had their say | have yours?
Saturday, September 02, 2006
狀態... /7:02 PM
你仆左街啦蘇九! 響係龍踢左八年波, 今年真係最差最差的一年!雖然今年第一次拎到足球的獎牌,但踢得差的事實又係冇得賴d乜......
好似今日咁,不停的走甩人,又離門兩碼的情況都入唔到,將個波頂走左......最慘係搞到成條防線都亂晒!白頭健大聲小我:「收皮傑,你以前d冷靜去晒邊呀!」
呢句我真係好震撼!!係囉!去晒邊呀!!
我保證,下星期六,係屬於我的!!!
Labels: I Kiss Futbol
0 had their say | have yours?
Friday, September 01, 2006
新貨入手!! /11:59 PM
其實好憎日本仔漢字,香港太多假日本仔,用日本漢字都唔用中國正統的稱呼!其實係好討厭的!當然有d中文本身冇而只有日本有的,你跟佢就唔係咩問題,就好似「顏射」呢類咁,香港人用都可以接受!但有d明明有又要用日本仔的稱呼,好多有d粉腸,叫足球領隊做監督!小!領隊咪領隊囉!不過我今次都要做呢類人,因為「入手」真係好貼切!我d新寵兒真係入左我手了!哈哈哈!
今年係畢樹比爵士(Sir Matt Busby)帶領曼聯第一次拎聯賽冠軍的五十週年紀念,Nike特登出了主場同作客兩件紀念版球衣,而我對作客呢件,的確係一見就鍾情!咁又點可以唔買呢!
而今次印左沙夏(Louis Saha),其實唔係特別鍾意沙夏,但逐個字計數咁印,沙夏真係最平的一個!而且沙夏唔似得朗尼(Wayne Rooney)、傑斯(Ryan Giggs)等咁受歡迎,出街都冇咁易見到第二個沙夏!同埋點解加利佬(Gary Neville)響細佬去左拖肥糖之後,都唔將件波衫轉做「NEVILLE」,仲要留返個「G.」響前面呢!?如果唔係咁,我一定再印多次2號!
當然唔止一個新貨入手,仲有同老婆一齊轉台去3之餘,仲買左呢部N73!真係好正,呢個係一部有電話功能的相機!用的係專業相機用的「蔡司鏡頭」、2.4吋mon同相機都係差0.1吋、數碼變焦都成20倍!仲有唔同既mode去影相!你話係咪一部有電話功能的相機?我就覺得係了!不過仲有d好抵死功能,有人打電話黎,部機會講佢個名出黎,好機械人的咁講,好正!
呢幅係部機的第一幅相了,真的幾清!.....................
不過破產了!!
Labels: I am who I am
0 had their say | have yours?
愛得太遲 /10:43 PM
愛得太遲
歌手:古巨基 | 作曲:楊鎮邦@宇宙大爆炸
填詞:林夕 | 編曲:雷頌德
我過去 那死黨 早晚共對 各也紮職以後沒法暢聚
而終於 相約到 但無言共對 疏淡如水
日夜做 見爸爸 剛好想呻 卻霎眼看出他多了皺紋
而他的蒼老感 是從來未覺 太內疚擔心
最心痛是 愛得太遲 有些心意 不可等某個日子
盲目地發奮 忙忙忙其實自私
夢中也習慣 有壓力要我得志
最可怕是 愛需要及時 只差一秒 心聲都已變歷史
忙極亦放肆 見我愛見的相知
要抱要吻要怎麼也好 偏要推說等下一次
我也覺 我體質 彷似下降 看了症得到是別要太忙
而影碟 都掃光 但從來未看 因有事趕
日夜做 儲的錢 都應該夠 到聖誕正好講跟我白頭
誰知她開了口 未能挨下去 已恨我很久
錯失太易 愛得太遲 我怎想到 她忍不到那日子
盲目地發奮 忙忙忙從來未知
幸福會掠過 再也沒法說鍾意
愛一個字 也需要及時 只差一秒 心聲都已變歷史
為何未放肆 見我愛見的相知
要抱要吻要怎麼也好 不要相信一切有下次
相擁我所愛又花幾多秒
這幾秒 能夠做到又有多少
未算少 足夠遺憾忘掉
多少抱憾 多少過路人 太懂估計 卻不懂愛錫自身
人人在發奮 想起他朝都興奮
但今晚未過 你要過也很吸引
縱不信運 你不過是人 理想很遠 愛於咫尺卻在等
來日別操心 趁你有能力開心
世界有太多東西發生 不要等到天上俯瞰
響我眼中,一首好歌同一套好戲一樣,係有共鳴!戲,要對白有共嗚;歌,當然就係詞會有共嗚啦!第一句,未有共鳴,我諗極都諗唔到,有一日我約童哥同屎人行街而冇野好講!但第二句,體驗真係好深!Yr1時好多時都好夜先返屋企,老豆其實都好擔心我完全唔夠訓!我體重足足少左三十磅!試過有幾星期都冇見過老豆,突然覺得佢殘左好多!其實做一個仔果下真係心up左一下!zero響佢的blog講,呢首歌聽到佢眼濕濕,但果下我冇留心睇歌詞。不過今日一聽,再睇歌詞,咪又係眼濕濕!其實其他好多句我都覺得有共鳴的。最後果兩段都好應,理想真係好遠,但諗到果下,又的確好興奮!不過因為未來而錯失好多野,都係無謂丫!及時行樂好d!呢種性格都感染到老婆,呢排真係好玩好多!開心好多!
Labels: 戲言一下
0 had their say | have yours?