Sunday, October 19, 2008
就係呢種感覺啦! /11:42 AM
呢個月都過左一半有多了,即係話,我已經返左半個月工了!
每朝六點半一定要起身,刷牙、洗臉、剃鬚(好討厭日日都要做呢個動作)、著衫、畀未訓醒的女友一個Goodbye kiss、六點十一前要出門口、搭輕鐵、西鐵、地鐵、八點返到公司、八點三開早會、食早餐、打Cold call、出街見客或者搵客、食lunch、再見客或者搵客、返歸、終於見到醒左的女友、上網、食飯、再上網、十一點幾又要訓、發夢、又起身...
基本上,人人返工都係咁上下,分別可能只係你要面對的係唔同既人;可能係返唔同的日數,可能你係一個消防員,你返一日、放兩日,你搵多份工都仲得!可能你係一個普通文員,應該要返五日或者五日半。又可能你係一個工作狂,又或者你老細係工作狂,要你返六日甚至七日。可能我老細就係呢類工作狂,因為我一星期要返六日,even係一日假都冇。
日日如是,理應係枯燥,但對我黎講,又唔係果回事。初初真係好唔慣,一星期要返六日,仲日日倒屎咁早起身,返到屋企真係到仆街!而且初初冇卡片,出唔到去搵客,又係十分的悶。你只能夠響公司入面不停的打電話,但又顆粒無收,做好多野都係o徙氣。第一個星期時,放工果陣就係搵工。到第二個星期,有卡片就可以周圍洗樓(即陌生拜訪),雖然都係冇咩實質作用,周圍行亦好,但我反而就覺得好開心!
經濟差,我賣的卻是要成百萬的高爾夫球會會藉。初初都覺得係mission impossible,但灰左幾日,又有返果種感覺,上年十至十一月果種!當時又係忙到有氣冇訂抖,不過又忙得好過癮!果陣有三位好好的拍檔,而家又有一班好搞鬼的同事!縱使呢份工絕對唔係我夢想工作,但挑戰性真係好夠,呢個絕對就已經可以令我用心去玩了!
家下屋企得我一個出黎做野,負擔真係好重,所以呢個遊戲,我一定會用心的去玩!又係進步的好時機!我鍾意曼聯原來又已經足足17年了,曼聯就係一技遇強愈強的球隊,我覺得我係一份子黎,所以都一定有呢個性質!哈哈哈哈!掂呀!上啦!胡九!
Labels: I am who I am, 吹水唔抹咀
0 had their say | have yours?
Friday, October 03, 2008
返工了 /9:54 PM
今日終於投身社會了!第一日感覺好不錯呢!返工係幾開心,不過都好累!
既然第一日返工,咁我覺得都應該同大家講講吧!
至於做老世的事,到搵到錢,買到幢樓,娶埋老婆,咁先再諗啦下!暫時封箱先!
Labels: I am who I am
1 had their say | have yours?