So 9 嗡: 香港足球...

journal (Click Here) my profile I've said... recommended

So 9 嗡

7 up、9 up、心up up，都是會講
(The So's-Files Version 5.0)

Sunday, July 09, 2006

香港足球... /1:08 PM

今日唔知醒，但又要開工，又要去黃大仙講波咁。趕到我做左個喇星
超人（無啦啦想改呢個名，冇解的！）今日途中都發生左d事，包括
響兆康撞到Kitlam啦。不過最抵死的，都係我搭地鐵果陣，有對夫婦
，佢地應該係鬧左交，佢地個表情都相當之有趣，咁我就緊係想捕捉
落黎啦！我竟然畀個女的發現左！大佬，你都淆啦！當然影唔到之餘
，都要扮打電話啦，哈哈哈！

今日講波就勁啦，因為請左李偉文、陳志康同郭裕洪黎，同個賽事既
兩組冠軍踢兩腳咁。踢兩腳之前，我就同三個夾下，佢地有d乜會表
演一下咁！響李偉文同郭裕洪黎之前，阿Cow(陳之花名)早左到，咁
除左同佢夾之外，都同佢吹左兩咀香港波經。佢覺得呢一代既o靚仔
太多野玩，根本就唔會擺好多時間落去踢波果度！以前佢地，一放學
就係去踢波；仲話而家d o靚仔，個個都唔實際玩花式，基本功都未
得又話踢甲組！以前踢得甲組，基本功就係必須的，就算唔出名果班
，都一定好波！而家？睇下香港08就知啦！同埋阿Cow都話，解散體
院令而家既球員，根本就得唔到正統既訓練，咁家下香港又點會有起
色丫！

不過你話踢波就係波牛，講野一定粗聲粗氣，咁又錯喎！(雖然我本
人都係咁)阿Cow畀我既印象，係一個好冷靜師文的球員，佢每講一句
之前，都真係會諗諗先講的！

咁同阿Cow講左一陣之後，雞仔(郭裕洪)同隊長(李偉文，現役愉園隊
長)就黎到了！咁就同佢兩位夾下一陣會表演d乜咁啦！隊長一句就講
：「花式？我唔識架喎！你搵佢啦！(指住雞仔)佢有研究！」雞仔就
口快快：「我！？好耐之前啦！」隊長同我踢同一個位，連專長都係
一樣，第一就係講粗口，第二就係球場上的事：「屌，花式真係唔撚
識喎，剷波踢腳架咋喎我淨係識」咁當然，佢級數好我好多好多啦！
佢畀我印象係一個好風趣好多野講的球員，成日撩另外兩個講笑！而
雞仔，就同相完全唔同，真人黑好多，眼睫毛長到有d誇！響呢三球
員入面，控波最黐腳就係佢！

不過我真係最鍾意隊長，雖然我係憎恨愉園，但我真係好鍾意佢踢法
！粗枝大葉！不過呢班香港頂級球員第一場對住少年組冠軍，竟然輸
左5-8，不過當然班友就緊係玩玩下咁玩下！之後對住青年組，拎佢
地黎出氣！7-1！當然呢場其實係肯定未盡全力的！呢場睇到隊長包
波既功架！嘩！真係好勁！！！出腳果下，真係好快！同埋身位方面
真係好勁，其實佢同我差唔多高之嘛！！厲害厲害！

咁除左佢三位，都仲有和仔，不過佢冇份落場，佢做呢個反賭波推廣
大使！哈，大會搵佢反賭波！？講玩笑了真係！

不過今日做MC，竟然有錯漏！今日終於要響台上用貓紙先完成到，真
係唔掂！不過算啦！都完了！

返黎果陣，去到屯門輕鐵站，見到當年風靡萬千少女、碧咸都讚佢好
波既張羽！我就搭505去市中心方向，佢就響反方向月台！佢今日仍
然好有型！本來有諗過落車印佢相，不過見下一班輕鐵要等4分鐘，
都係搭車算了！！

夜晚，成班友上黎睇波，事關今日係世界杯既決賽。94世界杯，我第
一次完完整整的睇晒成場波，亦係我真真正正愛上足球的一晚！(其
實我話讀幼稚園高班果陣(91年)，已經係曼聯fans，只係跟老豆嗌，
同埋會老積的同其他人講，自己鍾意曼聯同足球，但其實極其量只可
以話係留意足球呢樣東西。當然，最後真係鍾意左曼聯同足球。但其
實真真正正愛上足球，絕對係12年前的那晚！) 不過講到世杯決賽同
我同足球間既關係咁密切，其實我上屆就冇睇到，我最憎的巴西，未
睇都知佢贏硬，有乜好睇！！？

開波之前，就鋤下dee，玩下show hand！哈哈，轉個頭就贏左成舊水
，不過大家都係兄弟，冇計呢d既！不過講開又講，鋤dee咁大個仔連
拎兩鋪同花順！旺成咁，你班友抵輸啦！

玩左一輪，就到開波時間啦！法國幫有屎人同童哥，而意大利粉果面
有兩隻龜：龜頭同阿龜！而我同砵仔鴨，都係中立的！講真，邊隊贏
對我黎講都冇所謂，法國贏到，我會戥沙夏、施維斯達兩位曼聯球員
，同埋巴夫斯呢位前曼聯球員高興！而意大利，我又鍾意兩個茅躉王
馬達拉斯同加度素，所以真係冇乜所謂！！

咁當然唔駛講，結果大家都知，法國輸左十二碼，球王施丹畀我偶像
馬達拉斯挑釁成功，一個頭頂埋去馬達拉斯度，咁就Red Card啦！衰
響我偶像手，你都算光榮退役了！哈哈哈！其實講真，一個職業球員
，仲要係球王級的球員，竟然會咁沉唔住氣，絕對係法國輸波原因！
法國，你唔係輸畀人，係輸畀自己！

當賽事完結後，屎人同童哥當然就好失落架啦！但我都有點唏噓，睇
到意大利同法國射十二碼都咁好之際，免不了會諗起自己愛隊英格蘭
就射得過份地差！唉！四年後，我們的加利、碧咸呢條黃金右路會唔
會已經冇得睇呢？不過講冇得睇，可能黎緊都冇得睇奧雲了！點都好
，我係寄望麥卡倫的！所謂新官上任三把火！佢一上任，未搞班球員
就先搞佢地班老婆同女朋友！禁止大賽時候跟出跟入，以免球員唔專
心！講真，我絕對唔Buy禁慾的！唔係因為我咸濕，而係我的確覺得
比賽前有適量既性愛，係會有助發揮的！但講係咁講，我就好同意麥
卡倫的做法，第一真係可以令班球員專心踢波，起碼英國d報紙冇咁
多花邊野煩住班球員；第二呢個下馬威既管治方法，的確會比之前艾
歷臣的一套work！我覺得艾生一路太斯文啦，咁樣管成班大帝係冇人
會show佢的！你發癲人人驚左你，反而仲會聽你講！所以睇到麥卡倫
做呢個舉動，我對英格蘭既前途，係抱樂觀態度的！

睇完都五點了，佢班友都走，我再執埋d手尾就訓了！

p.s.
Eric哥夜晚搵過我，叫我返學校同I like Peer道歉，原來你都幾可
愛的，hohoho！

再p.s.
呢個日記由今日起，響大多數日子，都會「是日金句」一欄，希望可
以再谷一谷呢度既收視！(當然，呢度收視一向唔低的！)

是日金句：
「問黎都多舊魚啦」
　　( - 當執屎響icq問我，今晚有乜人到，龜頭響我傍邊講)

「隊長都去，必有怪異」
　　( - 玩Show hand下下唔去既砵兄，竟然跟注，執屎驚訝的講)

Labels: I am who I am, I Ｋiss Futbol

0 had their say | have yours?