大酒店者，殯儀館也。今晚我堂細佬個阿公出殯，本來我老豆會出席的，但上年又畀相士批過，佢呢個月有一個劫，唔適宜去醫院同埋大酒店，於是我就代佢去。

主角已經七十五歲，已經係笑喪，或者係咁，場內既氣氛都非常歡樂，包括主角的老婆，據我阿叔講，其實主角臨終前，一直多病痛，佢老婆都唔忍心見到呢d情況，所以都想佢早d去，所以去左唔覺得傷心。而主角的好多老朋友都聚埋一齊有講有笑，或者人老左，大家有自己的事業、屋企，好難得有機會見到，於是一聚埋又可以吹一大堆野出黎。

當然有人歡喜的時候，亦總有人愁。坐我隔離的一個阿伯，我諗都應該係主角的老友黎！佢都喊過一輪，生離死別的事，總有人接受唔到。講真，之前童哥話佢個心有事，我真係喊了出黎！好彩最後都係冇事了。睇到呢個阿伯喊，再加埋諗起自己喊的事，突然又諗起，如果主角係我，大家又係會點樣呢？我地幾個究竟邊個早走d呢？屎人、童哥、龜頭佢地甩晒頂毛，黎坐我呢個堂果陣，係喊又定係笑呢？響我腦中果下有一幅好過癮的圖畫！

之後又撞返我孻叔的第一個印傭，原來嫁了畀場中的其中一個阿伯。真係愛？定係為錢？但阿伯睇落都冇乜錢喎！不過點都有兩餐溫飽掛！講真，有時生活所迫，嫁畀一個唔鍾意的，又有何出奇？記得之前響鄒海灘的blog度講過，人生好多野好無奈，其中一樣可能係愛情。好多人一生中最後一個，好可能又唔係佢一生中最愛；但到畀左一生中最愛，可能又覺得唔岩一齊生活。你而家揀了佢，只係佢係你的最適合！可能係最適合愛你，又可能係最適合養你。

其實我覺得一個人，鍾意佢d錢又好，鍾意佢對你好又好，其實又有乜分別？其實都係你的一個賣點之嘛！點解前者會咁畀人鄙視，而後者就係抵讚呢？呢個問題自己諗！

仲有d紙紮呢，係咁燒，下面d人係咪真係收到呢？收唔收到，其實都好濕滯下！收到的話，下面爆棚；收唔到，我地戇居！不過講真，應該就收唔到的，因為我聽過一個講法，響東漢時，發明造紙術的蔡倫，岩岩發明左紙之後，冇人買佢。於是佢就諗到用紙燒野畀先人，再為賣紙既方法，結果真的大賣！不過呢個都係信不信由你，我自己都係響網上睇返黎！