呢幅相響夜晚11點半影的。

其實香港的學生，我講係中學生，真係好鬼累的！晨早返學鬼咁早，未訓夠又話要起身；返到學，上堂又悶(我慶幸，我中學的老師大都鬼馬，呢個感覺唔多)，放學又要十萬樣功課、又要補習......仲有中學生都畢竟只係青少年，都要有耍樂時間！搞呢樣搞果樣，冇八、九點都返唔到屋企！遇著會考，又要死鋤爛鋤，真係成十一點幾先話返屋企都唔出奇！

係啦，就係溫書的問題！點解要溫咁耐？因為太多野太死板，我唔覺得書本有問題，而係考得太冇創造力！要求千篇一律的答案，稍走偏的個人見解就要抹殺！咁香港既前途會點？可能唔會話有好大問題既，平平穩穩咁囉，但就唔會有新事物出現了！

記得今年暑假，科大破格收錄左一名中五生，成個社會一陣嘩然！最後會考派彩，最後得12分，已經英文唔合格。朱經武(科大校長)已經話，佢唔會介意陳易希(即係果個入科大的中五生)的合考成績，佢睇中的係陳易希對發明的頭腦！當時好多人取笑呢個12分的發明家，同時質疑科大呢個的決定，包括各大傳媒！

但會考真係咁重要咩？考完又代表乜？社會有太多死板的標準去限定一個人的能力，但呢個只會令社會毫無創造力！

當大家仲質疑緊呢位英文唔合格的大學生時，佢又有新發明了！仲搵到盲既奧運金牌選手(你冇睇錯，佢係響正常人奧運會贏長跑金牌)尹約基試用！到你唔服咩！更到你唔服就係香港傳媒，十月十三日的報紙(呢篇係10月3日的日記，但報導黎自13日)就有如此標題：《陳易希響鬧杯 失明跑手激讚》！香港人冇創造力？唔係呀！陳易希有，香港傳媒就更有！